“মহাবিদ্যালয়বিৰোধী কাৰ্য্য-কলাপ আৰু কলেজৰ নীতি উলংঘা কৰা”ৰ অপৰাধত ছয়গাওঁ মহাবিদ্যালয়ৰ অধ্যক্ষই চন্দন দাস আৰু উপাসনা দাস নামৰ দুগৰাকী বিদ্যাৰ্থীক বৃহস্পতিবাৰে বহিষ্কাৰ কৰিছে।
কিন্তু শিক্ষা গ্ৰহণৰ অধিকাৰ উল্লেখেৰে ছাত্ৰ-ছাত্ৰীকেইজনে এই বহিষ্কৰণ বাতিলৰ দাবী জনোৱাৰ লগতে অধ্যক্ষ ৰাজু বৰদলৈৰ বিৰুদ্ধে উত্থাপন কৰিছে প্ৰতি-অভিযোগ। চন্দন ৰাজনীতি বিজ্ঞান বিভাগৰ স্নাতক পঞ্চম ষান্মাষিক আৰু উপাসনাই তৃতীয় ষান্মাষিকত পঢ়ি আছে।
তেওঁলোকৰ মতে দুখীয়া ছাত্ৰ-ছাত্ৰীৰ মাচুল ৰেহাইৰ দাবীত তেওঁলোকে কৰা আন্দোলনৰ অপৰাধতহে অধ্যক্ষই এই ব্যৱস্থা লৈছে। বিদ্যাৰ্থী সংগঠন এচ এফ আইৰ লগতে তেওঁলোকৰ সৈতে থিয় দিছে একাংশ শিক্ষাবিদ।
“চন্দন দা আৰু মোক নিলম্বন কৰাৰ যি জাননী দিছে, সেই জাননী উঠাই ল’ব লাগে। আমাৰ শিক্ষা গ্ৰহণ কৰাৰ সম্পূৰ্ণ অধিকাৰ আছে, গতিকে আমাক মহাবিদ্যালয়ত অধ্যয়ন কৰিবলৈ দিব লাগে। প্ৰতিবাদ কৰাৰ পাছদিনা প্ৰিন্সিপাল ছাৰে মোক ফোন কৰি কলেজলৈ মাতিলে। তেওঁ কৈছিল যে, তুমি কলেজলৈ আহা তোমালোক দুগৰাকীক কলেজৰ পৰা বাহিৰ কৰি দিয়া হৈছে, জাননী দিয়া হৈছে লৈ যোৱা। তেতিয়া মই কলেজলৈ গৈ ছাৰক সুধিলো, জানিব পাৰিম নেকি কি কাৰণে আমাক কলেজৰ পৰা বাহিৰ কৰিলে? তেতিয়া তেওঁ মোক বেয়াকৈ ব্যৱহাৰ কৰিছে। মই এই কাৰণে আচৰিত হৈছো যে কলেজখন আমাৰ ঘৰৰ নিচিনা আৰু ঘৰৰ মুৰব্বীজনে এনেদৰে ব্যৱহাৰ কৰিলে বহুত বয়া লাগে,” গুৱাহাটী প্ৰে’ছ ক্লাবত শুকুৰবাৰে এচ এফ আই-এ আয়োজন কৰা সংবাদমেলত এই মন্তব্য বহিষ্কৃত ছাত্ৰী উপাসনা দাসৰ।
অসমৰ শিক্ষা সঞ্চালকালয়ে যোৱা ২৯ মে’ত জাৰি কৰা এক চাৰ্কুলাৰৰ প্ৰতিবাদত প্ৰায় দুই শতাধিক ছাত্ৰ-ছাত্ৰীয়ে মহাবিদ্যালয়খনৰ গে’টত তলা ওলোমাই দিছিল।
প্ৰতিবাদৰ কথা উল্লেখ কৰি উপাসনাই জনায় যে তেওঁলোকে মহাবিদ্যালয়ৰ অধ্যক্ষৰ জৰিয়তে উচ্চ শিক্ষা সঞ্চালকালয়, অসমলৈ ছাত্ৰ-ছাত্ৰীৰ সমস্যা সন্দৰ্ভত স্মাৰক পত্ৰ প্ৰেৰণ কৰিব খুজিছিল।
“আমি গে’টত তলা ওলোমাই প্ৰতিবাদ কৰিছিলো, এই কথা সত্য। সেই সময়ত মহাবিদ্যালয়ত অধ্যক্ষ নাছিল। আমাৰ মহাবিদ্যালয়ৰ এগৰাকী শিক্ষকে আমাক স্মাৰক পত্ৰখন তেওঁৰ হাতত দিবলৈ কৈছিল। আমি তেওঁৰ হাতত তেতিয়া স্মাৰক পত্ৰ দি আমাৰ আন্দোলন স্থগিত ৰাখিছিলো। পাছদিনা ছাত্ৰ-ছাত্ৰীসকলে অধ্যক্ষক সাক্ষাৎ কৰি বিষয়টো অৱগত কৰাৰ কথা আছিল। কিন্তু আলোচনা বাদেই, আমাৰ দুগৰাকীকহে মহাবিদ্যালয়ৰ পৰা বাহিৰ কৰি দিয়া হ’ল,” উপাসনাই জনায়।
আনহাতে এছ এফ আই-এ ছাত্ৰ-ছাত্ৰী দুজনৰ বহিষ্কাৰৰ নিৰ্দেশ উঠাই লোৱাৰ বাবে দাবী জনাইছে। “অন্যথা স্বৈৰাচাৰী অধ্যক্ষৰ বিৰুদ্ধে তীব্ৰ আন্দোলন গঢ়ি তোলা হ’ব,” সংগঠনটোৰৰ ৰাজ্যিক সম্পাদক নিৰংকুশ নাথে কয়।
সংবাদমেলত উপস্থিত থাকি বি বৰুৱা মহাবিদ্যালয়ৰ প্ৰাক্তন অধ্যক্ষ দীনেশ বৈশ্যয়ো ছয়গাওঁ মহাবিদ্যালয়ৰ অধ্যক্ষৰ কামক “অগণতান্ত্ৰিক আৰু স্বৈৰাচাৰী” আখ্যা দিয়ে। এনে কামে “শিক্ষক আৰু ছাত্ৰ-ছাত্ৰীৰ মাজৰ পবিত্ৰ সম্পৰ্কত ঘূণে ধৰায়” বুলি উল্লেখ কৰি তেওঁ কয় যে তেওঁ আন কেইগৰাকীমান বিশিষ্ট ব্যক্তিসহিতে দুই-এদিনতে মহাবিদ্যালয়খনত উপস্থিত হৈ অধ্যক্ষগৰাকীক বিষয়টো পুনৰ বিবেচনা কৰি ছাত্ৰ-ছাত্ৰী দুগৰাকীৰ বহিষ্কৰণৰ নিৰ্দেশ বাতিল কৰিবলৈ অনুৰোধ কৰিব।
