দশক দশক ধৰি পঞ্জাৱৰ ভয়াৱহ বানপানীয়ে সৃষ্টি কৰি অহা পৰিস্থিতি সন্দৰ্ভত দেওবাৰে প্ৰধানমন্ত্ৰী নৰেন্দ্ৰ মোডীলৈ এখন পত্ৰ লিখি মুখ্যমন্ত্ৰী ভগৱন্ত মানে।
সংবাদ সংস্থা পিটিআইৰ তথ্য অনুসৰি মানে কেন্দ্ৰৰ পৰা ৬০ হাজাৰ কোটি টকা মুকলি কৰি দিবলৈ দাবী জনাইছে।
ৰাজ্যিক দুৰ্যোগ সঁহাৰি পুঁজিৰ অধীনত লাভ কৰা ধনৰ মানদণ্ড সলনি কৰাৰ বাবেও মুখ্যমন্ত্ৰীয়ে দাবী জনায়। তেওঁ কয় যে ৰাজ্য চৰকাৰে ক্ষতিগ্ৰস্ত কৃষকসকলক প্ৰতি একৰত কমেও ৫০ হাজাৰ টকা দিব বিচাৰে।
বৰ্তমান প্ৰচণ্ড বানৰ কবলত পৰিছে পঞ্জাৱ। চুতলেজ, বিয়াছ আৰু ৰবি নদীৰ পানী বাঢ়ি অহাৰ লগতে হিমাচল প্ৰদেশৰ লগতে জম্মু-কাশ্মীৰৰ বহু অঞ্চলত হোৱা প্ৰচণ্ড বৰষুণৰ বাবে পৰিস্থিতি অধিক ভয়াৱহ হৈ পৰিছে।
মুখ্যমন্ত্ৰীয়ে চিঠিখনত লিখিছে যে “বৰ্তমান প্ৰায় তিনি লাখ একৰ কৃষিভূমি, বেছিভাগেই ধাননি পথাৰ, বানপানীৰ পানীত ডুব গৈছে। ইয়াৰ ফলত শস্যৰ যথেষ্ট ক্ষতি হৈছে।”
ইয়াৰ উপৰিও পশুধনৰ বৃহৎ ক্ষতি হৈছে, যাৰ ফলত গ্ৰাম্য পৰিয়ালসমূহৰ ওপৰত বেয়া প্ৰভাৱ পৰিছে, কিয়নো তেওঁলোকৰ জীৱিকাৰ এক বৃহৎ অংশ দুগ্ধ আৰু পশুপালনৰ ওপৰত নিৰ্ভৰশীল।’
