ইউক্ৰেইনৰ ৰাজধানী কীয়েভত ৰাছিয়াৰ ক্ষেপনাস্ত্ৰ আক্ৰমণত ইউক্ৰেইনৰ ‘ৰেডিঅ’ লিবাৰ্টি’ৰ মহিলা সাংবাদিক ভেৰা গিৰিচ নিহত হৈছে।
ৰেডিঅ’ লিবাৰ্টিয়ে জানিবলৈ দিছে যে ক্ষেপনাস্ত্ৰৰ আক্ৰমণৰ সময়ত গিৰিচ নিজৰ ঘৰতে আছিল। এগৰাকী অতি মেধাবী, স্পৰ্শকাতৰ আৰু প্ৰকৃতাৰ্থত পেছাদাৰী ব্যক্তি হিচাপে পৰিচিত আছিল গিৰিচ।
গিৰিচৰ এগৰাকী সহকৰ্মীয়ে সামাজিক মাধ্যমত লিখিছে যে ‘এগৰাকী সুন্দৰ ব্যক্তি গুচি গ’ল’।
কীয়েভৰ মেয়ৰে সেই অঞ্চলটোত ৰাছিয়াৰ ক্ষেপনাস্ত্ৰ আক্ৰমণৰ পিছত এটি মৃতদেহ উদ্ধাৰৰ কথা জানিবলৈ দিছে যদিও তেওঁ গিৰিচৰ পৰিচয় সদৰী কৰা নাই।
শুকুৰবাৰে আমেৰিকা যুক্তৰাষ্ট্ৰৰ পুঁজিৰে পৰিচালিত ৰেডিঅ’ ফ্ৰী ইউৰোপ/ৰেডিঅ’ লিবাৰ্টিয়ে ইয়াৰ সাংবাদিক তথা বাতৰি কাৰ্যসূচী প্ৰযোজক ভেৰা গিৰিচ কীয়েভত ৰাছিয়াৰ এক বিমান আক্ৰমণত নিহত হোৱা বুলি জানিবলৈ দিয়ে।
8th Journalist to be killed in Ukraine since 24th of February.Vera Gyrych, journalist for Radio Liberty.She was killed yesterday due to the missile attack in Kyiv. It’s a necessity to support journalists safety.Yet when it’s your home.. Stop this war!!! Support Ukraine! pic.twitter.com/4e757KVwHV
— Natalie Gryvnyak (@nataliegryvnyak) April 29, 2022
বৃহস্পতিবাৰে ৰাষ্ট্ৰসংঘৰ সচিব প্ৰধান এন্টনিঅ’ গুটেৰেছৰ কীয়েভ ভ্ৰমণৰ সময়তে সংঘটিত হোৱা ৰাছিয়াৰ ক্ষেপনাস্ত্ৰ আক্ৰমণত নিহত গিৰিচৰ মৃতদেহটো শুকুৰবাৰে পুৱা ধ্বংসাৱশেষৰ তলৰ পৰা উদ্ধাৰ কৰা হয়।
উল্লেখ্য যে ৰাছিয়াই ইউক্ৰেইনত সামৰিক অভিযান আৰম্ভ কৰাৰ পিছৰে পৰা ইউক্ৰেইনত এতিয়ালৈকে ৮গৰাকী সাংবাদিক নিহত হৈছে।
