দেশজুৰি বৰ্তমান সৰ্বাধিক চৰ্চিত ‘ৰেফেল’ক লৈ ফেপেৰি পাতি ধৰা বিৰোধী কংগ্ৰেছৰ গুৱাহাটীস্থিত প্ৰাদেশিক কাৰ্য্যালয় ঘেৰাও কৰিবলৈ গৈ প্ৰশাসনৰ বাধাত বুধবাৰে আদবাটৰ পৰাই উভটিব লগা হ’ল বিজেপিৰ কেইবা হাজাৰ প্ৰতিবাদকাৰী।
ৰাজীৱ ভৱনৰ পৰা প্ৰায় আধা কি. মিটাৰ নিলগত খ্ৰীষ্টানবস্তিৰ হ’তেল গ্ৰেণ্ড ষ্টাৰলাইনৰ সন্মুখতে আৰক্ষীয়ে আবদ্ধ কৰে বিজেপিৰ প্ৰতিবাদী সমদলটো।
আৰক্ষী-প্ৰশাসনৰ বাধাত কিছুসময় ৰাজপথতে প্ৰতিবাদকাৰীসকল বহি পৰে, কিন্তু মহানগৰীৰ ব্যস্ত জি এছ ৰ’ড (শ্ৰীমন্ত শংকৰদেৱ পথ)ৰ যান-জঁটে ক্ৰমাৎ তীব্ৰ ৰূপ ধাৰণ কৰাত অৱশেষত উভটিব লগীয়া হয় প্ৰতিবাদীসকল।
নিৰ্ধাৰিত সময়তকৈ ডেৰ ঘন্টা পলমকৈ গণেশগুৰিৰ গোপাল বড়ো উচ্চতৰ মাধ্যমিক বিদ্যালয় খেলপথাৰৰ পৰা ৰাজ্যিক সভাপতি ৰঞ্জিত দাসৰ নেতৃত্বত আৰম্ভ হোৱা প্ৰতিবাদী সমদলটোক গণেশগুৰিতে বাধা দিয়াৰ প্ৰথমে চেষ্টা কৰিছিল মহানগৰ আৰক্ষীয়ে।
অৱশেষত ৰাজীৱ ভৱন ঘেৰাও নকৰাকৈয়ে জিলা উপায়ুক্তৰ জৰিয়তে ৰাষ্ট্ৰপতিলৈ ৰাফেল বিমান সম্পৰ্কত কংগ্ৰেছৰ দাবীৰ বিৰুদ্ধে আপত্তি সম্বলিত স্মাৰক পত্ৰ দি খ্ৰীষ্টানবস্তিৰ ভিতৰুৱা পথ এটা হৈ পুনৰ খেলপথাৰখনলৈ উভটি আহে প্ৰতিবাদী বিজেপি নেতা-কৰ্মীসকল।
শাসকীয় দলটোৰ নেতা-কৰ্মীৰ কাৰ্য্যসূচীত বাধা প্ৰদানৰ বাবে আৰক্ষীয়ে জি এছ ৰ’ডৰ দুই-তিনি ঠাইত কেইবা তৰপীয়া নিৰাপত্তা বেষ্টনী গঢ়ি তুলিছিল।
ইফালে বিজেপিৰ প্ৰতিবাদৰ প্ৰত্যুত্তৰ দিবলৈ ৰাজীৱ ভৱনৰ সন্মুখত কংগ্ৰেছৰ কেইবাশও কৰ্মীসহ অৱস্থান লৈছিল দলৰ জ্যেষ্ঠ নেতা, প্ৰাক্তন মন্ত্ৰী শৰৎ বৰকটকী, প্ৰাক্তন সাংসদ দ্বিজেন শৰ্মা, প্ৰাক্তন মন্ত্ৰী ৰকিবুল হুছেইন, নেত্ৰী ববিতা শৰ্মাকে ধৰি কেইবাগৰাকীও নেতাই।
