দুৰ্দান্ত ক্ৰিকেট খেলাৰ বাবে স্কুল আৰু জুনিয়ৰ পৰ্যায়ত বাৰে বাৰে তেওঁৰ নাম চৰ্চালৈ আহিছে। কোৱা হৈছে ছমিত দ্ৰাবিড়ৰ কথা! উপাধিটোৱেই কয় যে তেওঁৰ লগত কোন জড়িত। ঠিকেই বুজিছে। কিংবদন্তি ক্ৰিকেটাৰ তথা ভাৰতৰ টি-২০ বিশ্বকাপ বিজয়ী দলৰ প্ৰশিক্ষক ৰাহুল দ্ৰাবিড়ৰ পুত্ৰ ছমিত। কথাতে আছে ‘বাপেক চাই পুতেক’।
তেনে পিতৃৰ পুত্ৰই এইবাৰ জাতীয় দলত প্ৰৱেশ কৰিলে। অষ্ট্ৰেলিয়াৰ বিৰুদ্ধে আগন্তুক ভাৰতৰ ১৯ বছৰ অনুৰ্ধৰ মাল্টি ফৰ্মেট শৃংখলাৰ বাবে ছমিত নিৰ্বাচিত হৈছে। এদিনীয়া আৰু চাৰিদিনীয়া শৃংখলাৰ বাবে দুটা বেলেগ বেলেগ দলত আছে ছমিতৰ নাম। এই শৃংখলাত তিনিখন পঞ্চাশ অভাৰৰ মেচ আৰু দুখন চাৰিদিনীয়া মেচ অনুষ্ঠিত হ’ব। পুডুচেৰীত এদিনীয়া আৰু চেন্নাইত চাৰিদিনীয়া শৃংখলা অনুষ্ঠিত হ’ব। এদিনীয়া দলটোৰ নেতৃত্ব দিব উত্তৰ প্ৰদেশৰ মহম্মদ অমনে আৰু চাৰিদিনীয়া শৃংখলাৰ অধিনায়ক হ’ব মধ্যপ্ৰদেশৰ সোহম পটৱৰ্ধনে।
ছমিত এজন পেচ বলিং অলৰাউণ্ডাৰ। বৰ্তমান তেওঁ নিজৰ গৃহ ৰাজ্য বেংগালুৰুত চলি থকা ASCA Maharaja T20 Trophy খেলি আছে। এতিয়ালৈকে তেওঁ ৭টা ইনিংছত সৰ্বোচ্চ ৩৩ ৰানকে ধৰি মুঠ ৮২ ৰান সংগ্ৰহ কৰিছে। কিন্তু ছমিতে বলিং কৰা নাই।
অৱশ্যে চলিত বৰ্ষৰ আৰম্ভণিতে কোচবেহাৰ ট্ৰফীত ছমিতে ভাল প্ৰদৰ্শন আগবঢ়াইছিল। প্ৰথমবাৰৰ বাবে কৰ্ণাটকক খিতাপ দখল কৰাত সহায় কৰাত ছমিতে যথেষ্ট বৰঙণি আগবঢ়াছিল। ১৮ বছৰীয়া ছমিতে ৮খন মেচত ৩৬২ ৰান সংগ্ৰহ কৰে। জম্মু-কাশ্মীৰৰ বিৰুদ্ধে তেওঁৰ ৯৮ ৰানৰ ইনিংছটো আছিল দৰ্শনীয়। ছমিতে বলিঙেৰেও টুৰ্ণামেণ্টত ছাপ পেলাইছিল। য’ত তেওঁ ১৬টা উইকেট দখল কৰিছিল। মুম্বাইৰ বিৰুদ্ধে ফাইনেলত তেওঁ ২টা উইকেট দখল কৰিছিল।
এদিনীয়া শৃংখলাৰ বাবে ভাৰতৰ দলটো : ৰুদ্ৰ পেটেল (উপ অধিনায়ক) (জিচিএ), চাহিল পৰখ (এমএইচচিএ), কাৰ্তিকেয় কেপি (কেএছচিএ), মহম্মদ অমন (অধিনায়ক) (ইউপিচিএ), কিৰণ চোৰমলে (এমএইচচিএ), অভিজ্ঞান কুণ্ডু (উইকেটকীপাৰ) ( এমচিএ ), হৰবংশ সিং পাংগলিয়া (উইকেটকীপাৰ) (এছচিএ), ছমিত দ্ৰাবিড় (এএছচিএ), যুধাজিৎ গুহ (চিএবি), সমৰ্থ এন (কেএছচিএ), নিখিল কুমাৰ (ইউটিচিএ), চেতন শৰ্মা (আৰচিএ), হাৰ্দিক ৰাজ (এএছচিএ), ৰোহিত ৰাজাৱত (এমপিচিএ), মহম্মদ এনান (কেচিএ)
চাৰিদিনীয়া শৃংখলাৰ বাবে ভাৰতৰ দলটো : বৈভৱ সূৰ্য্যবংশী (বিহাৰ চি এ), নিত্য পাণ্ডিয়া (বিচিএ), বিহান মালহোত্ৰা (উপ অধিনায়ক) (পিচিএ), সোহম পটৱৰ্ধন (অধিনায়ক) (এমপিচিএ), কাৰ্তিকেয় কেপি (কেএছচিএ), ছমিত দ্ৰাবিড় ( কে এছ চি এ) , অভিজ্ঞান কুণ্ডু (উইকেটকীপাৰ) (এম চি এ), হৰবংশ সিং পাংগলিয়া (উইকেটকীপাৰ) (এছ চি এ), চেতন শৰ্মা (আৰ চি এ), সমৰ্থ এন (কে এছ চি এ), আদিত্য ৰাৱাট (চি এ ইউ), নিখিল কুমাৰ (ই টি চি এ), আনমোলজিৎ সিং (পি চি এ), আদিত্য সিং (ইউপিচিএ), মহম্মদ এনান (কেচিএ)।
