সমাগত লোকসভা নিৰ্বাচনত বিজেপিক ৰুধিবলৈ আজি উত্তৰ-পূবৰ প্ৰথমখন জনসমাবেশত ভাগ ল’লে কংগ্ৰেছ সভাপতি ৰাহুল গান্ধীয়ে।
খানাপাৰাৰ অসম পশু চিকিৎসাবিজ্ঞান মহাবিদ্যালয়ৰ খেলপথাৰত আয়োজিত বিশাল সমাৱেশত অসমক পুনৰ বিশেষ ৰাজ্যৰ মৰ্য্যাদা ঘূৰাই দিয়াকে ধৰি ৰাহুল গান্ধীয়ে দিলে বহুকেইটা নিৰ্বাচনী প্ৰতিশ্ৰুতি।
“কংগ্ৰেছে অসমক বিশেষ ৰাজ্যৰ মৰ্য্যাদা দিছিল, কিন্তু বিজেপিয়ে সেই মৰ্য্যাদা কাঢ়ি ল’লে। ২০১৯-অত কংগ্ৰেছৰ চৰকাৰ হ’লে অসমক পুনৰ বিশেষ ৰাজ্যৰ মৰ্য্যাদা ওভতাই দিয়া হ’ব”, জনসমাৱেশ সম্বোধন কৰি অসমৰ ৰাইজক আশ্বাস কংগ্ৰেছৰ ৰাষ্ট্ৰীয় সভাপতিজনৰ।
তেওঁ লগতে উত্থাপন কৰে বিজেপিয়ে বন্ধ কৰি দিয়া ‘উত্তৰ-পূব ঔদ্যোগিক নীতি’ৰ কথা। কংগ্ৰেছ শাসনলৈ আহিলে এই ঔদ্যোগিক নীতি পুনৰ আৰম্ভ হ’ব বুলিও আশ্বাস প্ৰদান কৰে ৰাহুল গান্ধীয়ে। এই ঔদ্যোগিক নীতিৰ জৰিয়তে অসম তথা উত্তৰ-পূবৰ যুৱ প্ৰজন্মৰ নিয়োজনৰ বাট মুকলি হ’ব বুলিও মন্তব্য কৰে ৰাহুল গান্ধীয়ে।
বিজেপিৰ আমোলত সম্পূৰ্ণৰূপে বন্ধ হৈ পৰা নগাঁও আৰু কাছাৰ কাগজ কল দুটাও অন্তৰ্ভুক্ত হ’ল ৰাহুলৰ প্ৰতিশ্ৰুতিত। “কংগ্ৰেছ চৰকাৰ আহিলে কাগজ কল দুটা খুলি দেখুৱাম”, ৰাহুল গান্ধীয়ে কয়।
অসমৰ বানপানীয়ে বছৰ বছৰ ধৰি অসমৰ ৰাইজক জীয়াতু ভুগাই অহাৰ পাছতো এই সমস্যাৰ স্থায়ী সমাধানৰ ক্ষেত্ৰত পূৰ্বৰ কোনো এখন চৰকাৰেই গুৰুত্ব প্ৰদান কৰা নাই। কিন্তু আজি ৰাহুল গান্ধীয়ে এইবাৰ কংগ্ৰেছ শাসনলৈ আহিলে অসমৰ বানপানীৰ সমস্যা সমাধানক ‘ৰাষ্ট্ৰীয় প্ৰতিশ্ৰুতি’ হিচাপে গণ্য কৰা হ’ব বুলিও খানাপাৰাত উপস্থিত হাজাৰ হাজাৰ জনতাক আশ্বাস দিয়ে।
অসমক ‘টেকনিকেল এডুকেইশ্যন হাব’ হিচাপে গঢ়ি তোলাৰ প্ৰতিশ্ৰুতিৰে অসমৰ যুৱ-প্ৰজন্মক উচ্চ মানৰ শিক্ষা প্ৰদান কৰা আৰু চাহ শ্ৰমিকৰ ন্যূনতম মজুৰি নিশ্চিত কৰাৰো আশ্বাস দিয়ে কংগ্ৰেছ সভাপতিয়ে।
লগতে শেহতীয়াভাৱে চৰকাৰ গঠন কৰা ৰাজস্থান, মধ্য প্ৰদেশ আৰু ছত্তিছগড়ৰ উদাহৰণেৰে অসম তথা উত্তৰ-পূবৰ লগতে সমগ্ৰ দেশৰ সৰ্বসাধাৰণৰ ন্যূনতম আয় নিশ্চিত কৰাৰো প্ৰতিশ্ৰুতি দিয়ে।
কংগ্ৰেছ শাসনলৈ আহিলে অসমত চলি থকা এন আৰ চি উন্নীতকৰণ প্ৰক্ৰিয়াত কোনো প্ৰকৃত হিন্দুস্তানীৰ নাম এন আৰ চিৰ পৰা বাদ নপৰাটো নিশ্চিত কৰিব বুলিও তেওঁ আশ্বাস দিয়ে।
বিজেপি চৰকাৰে জাপি দিব বিচৰা নাগৰিকত্ব সংশোধনী বিধেয়কৰ বিৰুদ্ধে অসম তথা উত্তৰ-পূবত হোৱা আন্দোলনৰ প্ৰতি পূৰ্ণ সমৰ্থন আগ বঢ়াই তেওঁ কয়, “এই বিধেয়ক উত্তৰ-পূব বিৰোধী, আপোনালোকৰ ভাষা, সাহিত্য, সংস্কৃতি, অস্তিত্বৰ বিৰোধী। গতিকে এইখন কংগ্ৰেছৰো বিৰোধী”।
অসমৰ কৃষকৰ ঋণ ৰেহাই দিয়াৰো প্ৰতিশ্ৰুতি দিয়ে ৰাহুল গান্ধীয়ে। তেওঁ লগতে উপস্থিত ৰাইজক সম্বুধি কয়, “২০১৯ত কংগ্ৰেছে এক ঐতিহাসিক কাম কৰিব”।
গান্ধীয়ে নিজৰ নিৰ্বাচনী প্ৰতিশ্ৰুতি ৰক্ষাৰ উদাহৰণ হিচাপে ৰাজস্থান, মধ্য প্ৰদেশ আৰু ছত্তিছগড়ৰ নিৰ্বাচনৰ আগ মুহূৰ্তত দিয়া ভাষণবোৰ চাবলৈ অনুৰোধ জনায়।
উল্লেখযোগ্য যে উক্ত তিনিখন ৰাজ্যত কংগ্ৰেছ শাসনলৈ অহাৰ পিছ মুহূৰ্ততে ২৪ ঘণ্টাৰ ভিতৰত প্ৰতিশ্ৰুতি মতে কৃষকৰ ঋণ ৰেহাইৰ প্ৰক্ৰিয়া আৰম্ভ কৰিছিল কংগ্ৰেছ চৰকাৰকেইখনে।
আজিৰ ভাষণৰ আৰম্ভণিতে ‘সুৰা ট্ৰেজিডি’ৰ ঘটনাত দুখ প্ৰকাশ কৰে ৰাহুল গান্ধীয়ে। লগতে পুলৱামাত চহিদ হোৱা অসমৰ চি আৰ পি এফ জোৱান মনেশ্বৰ বসুমতাৰীকো স্মৰণ কৰে। ইয়াৰ উপৰি আজি ভাৰতীয় এয়াৰ ফ’ৰ্চে পাক অধিকৃত কাশ্মীৰত সন্ত্ৰাসবাদীৰ শিবিৰত আক্ৰমণ চলোৱা ঘটনাৰ বাবে এয়াৰ ফ’ৰ্চৰ পাইলটসকলক ধন্যবাদ জ্ঞাপন কৰে।
সমাবেশত অসমৰ লগতে মেঘালয় আৰু মণিপুৰৰ প্ৰাক্তন মুখ্য মন্ত্ৰী ক্ৰমে তৰুণ গগৈ, ডাঃ মুকুল চাংমা, ওক্ৰাম ইববি সিং, উত্তৰ-পূবৰ ৰাজ্যসমুহৰ কংগ্ৰেছ সভাপতি প্ৰমুখ্য শীৰ্ষ নেতৃত্ব উপস্থিত থাকে।
প্ৰাক্তন মুখ্য মন্ত্ৰী গগৈয়ে নিজৰ ভাষণত ৰাহুল গান্ধীৰ গাত চুকাফা আৰু লাচিতৰ তেজ আছে বুলি কয়।
খানাপাৰাৰ এই সমাবেশৰ পাছতেই কংগ্ৰেছৰ সভাপতিজন শ্ৰীমন্ত শংকৰদেৱ কলাক্ষেত্ৰৰ শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহত উত্তৰ-পূব কংগ্ৰেছ সমন্বয়ৰক্ষী সমিতি আৰু তাৰ পাছত উত্তৰ-পূবৰ জিলা কংগ্ৰেছ আৰু ব্লক কংগ্ৰেছৰ সভাপতিসকলৰ লগতো বৈঠকত মিলিত হয়।
