প্ৰয়াত ভাৰতৰ প্ৰাক্তন প্ৰধানমন্ত্ৰী মনমোহন সিং।মৃত্যুৰ সময়ত তেওঁৰ বয়স আছিল ৯২ বছৰ। বৃহস্পতিবাৰে শ্বাস-প্ৰশ্বাসৰ তীব্ৰ সমস্যাৰ বাবে তেওঁক দিল্লীৰ এইমছত ভৰ্তি কৰোৱা হয়। প্ৰবীণ ৰাজনীতিবিদগৰাকীক প্ৰথমে জৰুৰীকালীন বিভাগলৈ লৈ যোৱা হয়। পিছত তেওঁক আই চি ইউত ভৰ্তি কৰা হয়। কিন্তু নিশা ১০ বজালৈকে খবৰ আহিল, মনমোহন সিঙৰ মৃত্যু।
এজন প্ৰখ্যাত জাতীয় নায়কক হেৰুৱাই শোক প্ৰকাশ কৰে প্ৰধানমন্ত্ৰী নৰেন্দ্ৰ মোদীয়ে। আনহাতে, ৰাহুল গান্ধী আৰু প্ৰিয়ংকা গান্ধীয়েও নিজৰ এক্স হেণ্ডেলত প্ৰয়াত প্ৰাক্তন প্ৰধানমন্ত্ৰীৰ মৃত্যুত লিখিছে, ‘মনমোহন সিঙে অপৰিসীম জ্ঞান আৰু সততাৰে ভাৰতক নেতৃত্ব দিছিল। তেওঁৰ বিনম্ৰ আচৰণ আৰু অৰ্থনীতিৰ গভীৰ প্ৰশংসাই সমগ্ৰ জাতিটোক অনুপ্ৰাণিত কৰিছিল। শ্ৰীমতী কৌৰ আৰু পৰিয়ালৰ প্ৰতি মোৰ আন্তৰিক সমবেদনা। এজন গাইড আৰু গুৰুক হেৰুৱালোঁ।’
প্ৰিয়ংকাৰ ভাষাত ‘চৰ্দাৰ মনমোহন সিংজীৰ দৰে ৰাজনীতিত অনুপ্ৰেৰণা যোগোৱা মানুহ কমেইহে আছে। তেওঁৰ সততা আমাৰ বাবে সদায় প্ৰেৰণা হৈ থাকিব।’
২০০৪ চনৰ পৰা ২০১৪ চনলৈ ভাৰতৰ চতুৰ্দশ প্ৰধানমন্ত্ৰী হিচাপে কাৰ্যনিৰ্বাহ কৰিছিল ড০ মনমোহন সিঙে। তেওঁ দেশৰ অৰ্থনৈতিক সংস্কাৰৰ অন্যতম পথ প্ৰদৰ্শক হিচাপে পৰিচিত। তেওঁৰ নেতৃত্বত ভাৰতে আন্তঃৰাষ্ট্ৰীয় অৰ্থনীতিত এক শক্তিশালী স্থান লাভ কৰাৰ লগতে দেশৰ অৰ্থনৈতিক খণ্ডত গুৰুত্বপূৰ্ণ সংস্কাৰ ৰূপায়ণ কৰে।
তেওঁৰ প্ৰধানমন্ত্ৰীত্বৰ সময়ছোৱাত ভাৰতীয় অৰ্থনীতিত যি পৰিৱৰ্তন ঘটিছিল তাৰ ভিতৰত তথ্য-প্ৰযুক্তি খণ্ডৰ দ্ৰুত বৃদ্ধি, বিদেশী বিনিয়োগ যথেষ্ট বৃদ্ধি, আৰু বিশ্বৰ বজাৰত ভাৰতৰ অংশগ্ৰহণ। ডঃ সিঙৰ নেতৃত্বত প্ৰৱৰ্তন কৰা নীতিসমূহে দেশৰ অৰ্থনৈতিক উন্নয়নত উল্লেখযোগ্য ভূমিকা পালন কৰিছিল।
