প্ৰধানমন্ত্ৰী নৰেন্দ্ৰ মোডীৰ নেতৃত্বত কেন্দ্ৰৰ বিজেপি চৰকাৰ গণতন্ত্ৰ বিৰোধী আৰু সংবিধান বিৰোধী। বিহাৰৰ দাৰভাঙা বিশ্ববিদ্যালয়ত এইদৰেই আক্ৰমণ কৰিছে কংগ্ৰেছ সাংসদ ৰাহুল গান্ধীয়ে। তেওঁ কয় যে এই চৰকাৰ আদানী, আম্বানীৰ দৰে বৃহৎ উদ্যোগপতিৰহে, সাধাৰণ মানুহৰ নহয়।
ৰাহুল গান্ধীয়ে কয় যে যদি কংগ্ৰেছ চৰকাৰ বিহাৰত ক্ষমতালৈ আহে তেন্তে তেওঁলোকে এই নীতি সলনি কৰি দুখীয়া আৰু বঞ্চিত লোকৰ বাবে কাম কৰিব। একে সময়তে অনুসূচিত জাতি আৰু অনুসূচিত জনজাতিৰ পিছপৰা ছাত্ৰ-ছাত্ৰীৰ হোষ্টেললৈ গৈ তেওঁলোকৰ সৈতে মত বিনিময় কৰিব বিচাৰিছিল যদিও বিহাৰ চৰকাৰে তেওঁক বাধা দিবলৈ চেষ্টা কৰিছিল।
তেওঁ দাবী কৰে যে ৰাজ্য চৰকাৰে তেওঁ ছাত্ৰ-ছাত্ৰীক লগ কৰি সংসদত তেওঁলোকৰ হৈ মাত মতাটো নিবিচাৰে।
কংগ্ৰেছ নেতা তথা লোকসভাৰ বিৰোধী দলপতি ৰাহুল গান্ধীয়ে বিহাৰৰ দাৰভাঙা জিলাত শিক্ষা ন্যায় সংবাদ কাৰ্যসূচীত অংশগ্ৰহণ কৰিছিল। আম্বেদকাৰ হোষ্টেলত আয়োজন কৰা হৈছিল এই অনুষ্ঠান। য’ত তেওঁ ছাত্ৰ-ছাত্ৰী আৰু যুৱক-যুৱতীসকলৰ সন্মুখত কেন্দ্ৰীয় চৰকাৰৰ নীতিক প্ৰত্যক্ষভাৱে আৰু তীব্ৰ আক্ৰমণ চলায়।
