শাসনভাৰ দখলৰ উদ্দেশ্যে শাসক-বিৰোধীয়ে প্ৰচাৰ কাৰ্য তীব্ৰতৰ কৰাৰ সময়তে আজি দ্বিতীয়বাৰৰ বাবে ভোটাৰৰ মন জয় কৰাৰ উদ্দেশ্যে অসমলৈ আহিব কংগ্ৰেছ অধ্যক্ষ তথা বিৰোধী দলপতি ৰাহুল গান্ধী। কংগ্ৰেছ অধ্যক্ষগৰাকীয়ে আজি বৰাক উপত্যকাত নিজ দলৰ প্ৰাৰ্থীৰ হৈ চলাব প্ৰচাৰ।
জানিব পৰা মতে ৰাহুল গান্ধীয়ে নতুন দিল্লীৰ পৰা ৰাওনা হ’ব শিলচৰলৈ। শিলচৰৰ পৰা পোনে পোনে তেওঁ হাইলাকান্দি জিলাৰ পাঁচগ্ৰামত আয়োজিত কংগ্ৰেছ দলৰ প্ৰচাৰ সভাত অংশ গ্ৰহণ কৰিব।
উল্লেখ্য যে দুটা লোকসভা সমষ্টি ক্ৰমে শিলচৰ আৰু কৰিমগঞ্জৰে গঠিত বৰাক উপত্যকা। আৰু এই সমষ্টি দুটাত অহা ১৮ এপ্ৰিল অৰ্থাৎ দ্বিতীয় পৰ্যায়ত ভোটগ্ৰহণ অনুষ্ঠিত হ’ব।
আজিৰ এই প্ৰচাৰ সভাত শিলচৰ সমষ্টিৰ প্ৰাৰ্থী তথা সাংসদ সুস্মিতা দেৱ আৰু কৰিমগঞ্জ সমষ্টিৰ প্ৰাৰ্থী সৌৰভ দাস উপস্থিত থাকিব। সভাত কংগ্ৰেছ অধ্যক্ষ ৰাহুল গান্ধীয়ে বৰাকৰ দুয়োজন কংগ্ৰেছ প্ৰাৰ্থীকে ভোট দি জয়যুক্ত কৰাৰ বাবে ৰাইজক অনুৰোধ জনাব।
জানিব পৰা মতে বৰাকত প্ৰচাৰ চলাই কংগ্ৰেছ অধ্যক্ষগৰাকী পোনে পোনে ৰাওনা হ’ব উৰিষ্যালৈ। আৰু তাৰ পাছত যাব বিহাৰলৈ। আজিৰ দিনটোত ৰাহুল গান্ধীয়ে কংগ্ৰেছৰ হৈ জোৰদাৰ ৰূপত প্ৰচাৰ অভিযান চলোৱা পৰিলক্ষিত হ’ব।
উল্লেখ্য যে যোৱা ৫ এপ্ৰিলত ৰাহুল গান্ধীয়ে প্ৰথম পৰ্যায়ত অনুষ্ঠিত হ’ব লগীয়া অসমৰ পাঁচটা লোকসভা সমষ্টিৰ বাবেও বিভিন্ন ঠাইত বিশাল জনসভা সম্বোধন কৰিছিল।
ইফালে কংগ্ৰেছৰ সমান্তৰালকৈ বিজেপিয়েও ব্যাপক ৰূপত চলাই আছে প্ৰচাৰ অভিযান। শাসনাধিষ্ঠ দলটোৰ প্ৰচাৰৰ বাবে ৰাষ্ট্ৰীয় পৰ্যায়ৰ বিভিন্ন নেতাৰ সোঁত বৈছে অসমলৈ। অহা ১১ এপ্ৰিলত পুনৰ এবাৰ দেশৰ প্ৰধান মন্ত্ৰী নৰেন্দ্ৰ মোদী অসমলৈ আহিব। সেইদিনা মোদীয়ে শিলচৰ আৰু কমলপুৰত নিৰ্বাচনী ভাষণ প্ৰদান কৰিব।
