ক্ৰমান্বয়ে স্পষ্ট হৈ পৰিছে যে মোডী-অমিত শ্বাহ শিবিৰ আৰু আৰ এছ এছ অৰ্থাৎ সংঘ পৰিয়ালৰ মাজত এক প্ৰবল সংঘাতৰ সৃষ্টি হ’বলৈ গৈ আছে। ক’ব পাৰি যে সংঘাতৰ বিষয়টো দমাই ৰখা হৈছিল। কিন্তু শুকুৰবাৰে মোডী-শ্বাহৰ ঘনিষ্ঠ বিজেপি নেতা তথা সাংসদ নিশিকান্ত ডুবেই সেয়া প্ৰায় মুকলি কৰি দিলে।
শুকুৰবাৰে পশ্চিমবংগৰ দুৰ্গাপুৰত গৈছিল প্ৰধানমন্ত্ৰী মোডী। সেই সময়তে নিশিকান্ত ডুবেই দিল্লীত বিস্ফোৰণ ঘটাই কয় যে নৰেন্দ্ৰ মোডীৰ নেতৃত্ব অবিহনে ২০২৯ চনৰ লোকসভা নিৰ্বাচনত বিজেপিৰ ফলাফল একেবাৰে ভাল নহ’ব।
তেওঁ স্পষ্টকৈ কয়, “মোডীজীৰ অবিহনে বিজেপিয়ে ১৫০খন আসনও নাপাব। আজিৰ বিজেপিৰ বাবে মোডীজী অপৰিহাৰ্য।”
সংবাদ সংস্থা এএনআইৰ সৈতে হোৱা এক সাক্ষাৎকাৰত ডুবেই কয়, “এতিয়া এই মুহূৰ্তত মই কেৱল নৰেন্দ্ৰ মোডীকেই অহা ১৫-২০ বছৰৰ বাবে দেশৰ নেতা হিচাপে দেখিছো। দল আৰু দেশৰ কৰ্মীসকলক আজি মোডীজীৰ প্ৰয়োজন, মোডীজীক আমাৰ প্ৰয়োজন নাই।”
তেওঁ লগতে কয়, “২০১৪ চনত মোডীজী ক্ষমতালৈ অহাৰ পিছত এটা গুৰুত্বপূৰ্ণ ভোট বেংকৰ সৃষ্টি হৈছে, যিটো বিজেপিৰ আগতে কেতিয়াও নাছিল। বিশেষকৈ দুখীয়া শ্ৰেণীৰ লোকৰ সমৰ্থন বিজেপিৰ ফালে স্থানান্তৰিত হৈছে। সেই আস্থা এতিয়াও অক্ষত আছে। সেইবাবেই মোডী তিনিবাৰৰ প্ৰধানমন্ত্ৰী।”
নিশিকান্ত ডুবেই যি তত্ত্বৰ ব্যাখ্যা দিছে তাতেই সংঘ পৰিয়ালৰ আপত্তি। আৰ এছ এছৰ বহুতৰে মতে, মোডী-শ্বাহৰ যুগত বিজেপিৰ চৰিত্ৰ সলনি হৈছে। বিজেপি মানেই মোডী হৈ পৰিছে, যিটো ঠিক নহয়। মোডীৰ পিছতো বৰ্তি থাকিব লাগিব বিজেপি। সেয়ে ইয়াৰ চৰিত্ৰৰ স্বাধীনতা থাকিব লাগিব। বিজেপি মানেই মোডী বুলি ধাৰণাৰ পৰা দলটোক মুক্ত কৰিব লাগিব।
সেইবাবেই সংঘ পৰিয়ালে এতিয়া তীব্ৰ চাপ সৃষ্টি কৰিছে যে দলটোৰ নতুন ৰাষ্ট্ৰীয় সভাপতিজন মোডী-শ্বাহৰ যাতে ‘হয় হুজুৰ’ ধৰণৰ নহয়। তেওঁলোকে জে পি নাড্ডাৰ দৰে কোনোবা এজনক সভাপতি হিচাপে নিবিচাৰে যিয়ে নামত পদত থাকিব, কিন্তু অমিত শ্বাহে আচলতে দলটো চলাব। বৰঞ্চ নাগপুৰে মোডী বিৰোধী নেতা হিচাপে পৰিচিত সঞ্জয় যোশীক বিজেপি সংগঠনৰ এটা ডাঙৰ পদত নিযুক্তি দিয়াৰ এক অভিযান আৰম্ভ কৰিছে। আৰু বহুতৰ মতে মোহন ভাগৱতে শেহতীয়াকৈ এই ক্ষেত্ৰত মোডীৰ ওপৰত হেঁচা প্ৰয়োগ কৰিবলৈ বয়সৰ বিষয়টো উত্থাপন কৰিছে।
এটা অনুষ্ঠানত মোৰোপন্ত পিংগলৰ উদ্ধৃতি দি ভাগৱতে কয় যে যেতিয়া কোনোবাই ৭৫ বছৰ সম্পূৰ্ণ কৰে তেতিয়া ইয়াৰ অৰ্থ হ’ল তেওঁৰ এৰি যোৱাৰ সময় আহি গৈছে। এতিয়া নতুনৰ বাবে স্থান এৰি দিব লাগিব। প্ৰসংগক্ৰমে ১৭ ছেপ্টেম্বৰত মোডীয়ে ৭৫ বছৰ সম্পূৰ্ণ কৰিব। বহুতৰ মতে ভাগৱতে মোডীলৈ কৌশলগতভাৱে বাৰ্তা প্ৰেৰণ কৰিব বিচাৰিছে।
এই পৰিস্থিতিত মোডী অনুগামী নিশিকান্তই মুখ খুলিছে। মোডীৰ পিছত কোন দলৰ নেতা বা দেশৰ মুখ হ’ব সেই প্ৰশ্নৰ উত্তৰত নিশিকান্তই কয়, “এতিয়া কেৱল মোডীজীকহে দেখিবলৈ পাইছো। এই মুহূৰ্তত কোনো বিকল্প নাই। ২০২৯ চনৰ লোকসভা নিৰ্বাচনতো তেওঁৰ নেতৃত্বতে যুঁজিব লাগিব। এয়া বিজেপিৰ ‘মজবুৰী’।”
মোডীৰ বয়স আৰু ভৱিষ্যতৰ নেতৃত্ব সন্দৰ্ভত চলি থকা জল্পনা-কল্পনাৰ উত্তৰত তেওঁ কয়, “বয়স কোনো বাধা নহয়। যদি মোৰাৰজী দেশাই ৮৩ বছৰ বয়সত প্ৰধানমন্ত্ৰী হ’ব পাৰে, তেন্তে মোডীজী এতিয়াও অতি সক্ৰিয়। ২০৪৭ চনৰ ভিতৰত যদি উন্নত ভাৰত বিচাৰে, তেন্তে মোডীজীকে বিচাৰক।”
নিশিকান্তৰৰ এই বক্তব্যক নাগপুৰৰ বাবে এক বাৰ্তা হিচাপে দেখা গৈছে। পৰ্যবেক্ষকৰ মতে ইয়াৰ স্পষ্ট অৰ্থ হৈছে সংঘৰ সৈতে সংঘাত তীব্ৰতৰ হোৱা। এতিয়া আৰম্ভ হ’ব প্ৰকৃত স্নায়ুৰ যুদ্ধ।
