২৯ এপ্ৰিলৰ নিশা প্ৰায় ১২ বজাত বৃহৎ পৰিমাণৰ ধন আৰু সোণৰ সৰবৰাহ কৰি ফটাশিল আৰক্ষীৰ জালত পৰিছে গুৱাহাটী ৰে’লৱে আৰক্ষীৰ নিলম্বিত আৰক্ষী উপ-পৰিদৰ্শক শ্ৰৱণ কুমাৰ ঝা আৰু তেওঁৰ ভাতৃ সঞ্জয় কুমাৰ ঝা।
এখন বাইকৰ সৈতে প্ৰায় ৭০ লাখ টকাৰ সোণ আৰু নগদ ২২ লাখ টকাসহ ফটাশিল আৰক্ষীয়ে কৰায়ত্ত কৰে দুয়োগৰাকীকে। ফটাশিল আৰক্ষীৰ উচ্চস্তৰীয় সূত্ৰই এই কথা জনাইছে।
উল্লেখযোগ্য যে, ৰে’লযাত্ৰীৰ সুৰক্ষাত নিয়োজিত থকাৰ নামত চলিত বৰ্ষৰ ফেব্ৰুৱাৰীত ৪৫ লাখ টকাৰ সোণ আত্মসাৎ কৰি গ্ৰেপ্তাৰ হৈছিল এই উপ-পৰিদৰ্শক গৰাকী। তেওঁ জামিন লাভ কৰি নিলম্বিত হৈ আছিল বুলি জানিব পৰা গৈছে।
আৰক্ষী সূত্ৰই জনোৱা অনুসৰি, নিলম্বিত উপ-পৰিদৰ্শকগৰাকীয়ে নিজ ভাতৃৰ সৈতে মিলি মহানগৰীৰ লালগণেশৰ কোনো এঘৰ লোকৰ ঘৰত লুকুৱাই ৰখা ২২ লাখ টকা ধনসহ প্ৰায় ১.৫০ কিলো ওজনৰ ১০ খন সোণৰ বিস্কুট আৰু আ-অলংকাৰ লৈ আহি আছিল।
প্ৰথমে ফটাশিল আৰক্ষীয়ে লোক দুগৰাকীক আটক কৰে আৰু তাৰ পিছত সেই সোণ আৰু নগদ ধনৰ সঠিক তথ্য আৰক্ষীক যোগান ধৰিব নোৱৰাৰ বাবেই তেওঁলোকক গ্ৰেপ্তাৰ কৰে ফটাশিল আৰক্ষীয়ে।
সেই সোণখিনিৰ মাজতে গুৱাহাটী ৰেইলৱে ষ্টেচনত আত্মসাত কৰা সোণ খিনিও আছে বুলি প্ৰাথমিক তদন্তত সন্দেহ প্ৰকাশ কৰিছে আৰক্ষীয়ে।
বৰ্তমান ফটাশিল আমবাৰী থানাতে ৰখা হৈছে দুয়োকে। ঘটনাৰ অধিক তথ্যৰ বাবে আৰক্ষীয়ে তদন্ত অব্যাহত ৰাখিছে।
আৰক্ষী উপ পৰিদৰ্শক গৰাকীৰ পৰা ডাকঘৰ আৰু ষ্টেট বেংকৰ বহু কেইখন পাছবুক জব্দ কৰিছে আৰক্ষীয়ে।
জনতাৰ সুৰক্ষাত স্বাৰ্থত নিয়োজিত একাংশ খাকী পোছাকধাৰীৰ এনে স্বৰূপ বিভিন্ন সময়ত পোহৰলৈ আহিছে।
