বেটছমেনসকলে মেচৰ আৰম্ভণিতে জয়ৰ ভেটি তৈয়াৰ কৰিছিল। তাৰপিছত ৰাজস্থানৰ বলাৰসকলে শীতল মগজুৰে খেলখন শেষ কৰে। প্ৰথমে বেটিং কৰি যশস্বী, সঞ্জু, আৰু ৰিয়ানে পঞ্জাৱৰ বলাৰক মূৰ তুলিবলৈকে নিদিলে। ৰাজস্থানে ৪ উইকেটত ২০৫ ৰান সংগ্ৰহ কৰে।
দ্বিতীয় ইনিংছত বলিঙেৰে জিলিকি উঠে জোফ্ৰা আৰ্চাৰ, হাছাৰংগাৰ বাহিনী। আৰ্চাৰে এককভাৱে ৩টা উইকেট দখল কৰি পঞ্জাৱৰ বেটিং লাইন আপ ভাঙি পেলায়। নেহাল ৱাধেৰা আৰু মেক্সৱেলৰ আপ্ৰাণ প্ৰচেষ্টা বিফল হয়। ৫০ ৰানৰ বিশাল ব্যৱধানত পৰাস্ত হয় পঞ্জাব।
পঞ্জাৱৰ অধিনায়ক শ্ৰেয়াছ আয়াৰে টছত জয়লাভ কৰি প্ৰথমে বলিং কৰাৰ সিদ্ধান্ত লয়। তেওঁৰ লক্ষ্য আছিল ঘৰুৱা খেলপথাৰত ৰান অনুসৰণ কৰি জয়ী হোৱা। তেওঁ নিজেও আছিল দুৰ্দান্ত ফৰ্মত। কিন্তু এই মেচত পঞ্জাৱৰ বলাৰসকলে কোনো প্ৰভাৱ পেলাবলৈ ব্যৰ্থ হয়। ৰাজস্থানে আৰম্ভণিৰে পৰাই ডাঙৰ পাৰ্টনাৰশ্বিপ গঢ়ি তুলিছিল। অপেনিং পাৰ্টনাৰশ্বিপত যশস্বী জয়ছৱাল আৰু সঞ্জু চেমচনে ৮৯ ৰান সংগ্ৰহ কৰে। লকি ফাৰ্গুচনে সঞ্জুক ৩৮ ৰানত আউট কৰি পাৰ্টনাৰশ্বিপ ভংগ কৰে। কিন্তু যশস্বীয়ে হাৰ নামানিলে।
প্ৰথম তিনিখন মেচত ডাঙৰ ৰান নাপালেও শনিবাৰে পুনৰ ফৰ্মলৈ ঘূৰি আহে জয়ছোৱাল। বৰ্তমানৰ আই পি এলত তেওঁ প্ৰথমটো অৰ্ধশতক অৰ্জন কৰে। তেওঁ ৪৫টা বলত ৬৭ ৰান সংগ্ৰহ কৰি ফাৰ্গুচনৰ বলত আউট হয়। যোৱা মেচখনত বৃহৎ ৰান সংগ্ৰহ কৰা নীতিশ ৰাণাই ১২ ৰান সংগ্ৰহ কৰি উভতি যায়। হেটমায়াৰে ৫ নম্বৰত নামি ২০ ৰান সংগ্ৰহ কৰে।
কিন্তু শেষলৈকে বৰ্তি থাকিল ৰিয়ান পৰাগ। ৰিয়ানে ২৫টা বলত ৪৩ ৰানৰ এটা দুৰ্দান্ত ইনিংছ খেলে। ৩টা চাৰি আৰু ৩ টা বিশাল ছয় কোবায়। ৰাজস্থানে ৪টা উইকেট হেৰুৱাই ২০৫ ৰান সংগ্ৰহ কৰে।
ইয়াৰ প্ৰত্যুত্তৰত প্ৰথম অভাৰত দুটা উইকেট হেৰুৱাই অস্থিৰ হৈ পৰে পঞ্জাৱ কিংছ। প্ৰথমটো বলত জোফ্ৰা আৰ্চাৰে প্ৰিয়াংশ আৰ্য্যক বল্ড কৰে। শ্ৰেয়াছে বেটিং কৰিবলৈ নামি দুটা বাউণ্ডেৰী মাৰিছিল যদিও প্ৰথম অভাৰৰ শেষ বলত আৰ্চাৰে তেওঁৰ উইকেট লয়। ইংলেণ্ডৰ এই পেচাৰজনে প্ৰথম তিনিখন মেচত সন্মুখীন হোৱা সমালোচনাৰ উত্তৰ যেন প্ৰথম অভাৰতে দিছিল।
মাৰ্কাছ ষ্টইনিছ মাত্ৰ ১ ৰানতে আউট হৈছিল। ১৭ ৰান সংগ্ৰহ কৰি উভতি যায় প্ৰভসিমৰণ সিঙে। ৪৩ ৰানত ৪ টা উইকেট যোৱাৰ পিছত দলটোৰ দায়িত্ব লয় গ্লেন মেক্সৱেল আৰু নেহাল ৱাধেৰাই। তেওঁলোকে ৮৮ ৰানৰ পাৰ্টনাৰশ্বিপ গঢ়ি তোলে।
এটা সময়ত পঞ্জাবে মেচখনৰ নিয়ন্ত্ৰণ লৈছিল। কিন্তু একেৰাহে দুটা বলত দুটা উইকেট দখল কৰি পুনৰ খেলখনলৈ আহে ৰাজস্থানে। ৪১টা বলত ৬২ ৰান সংগ্ৰহ কৰি আউট হয় নেহালে। মেক্সৱেলে ২১টা বলত ৩০ ৰান সংগ্ৰহ কৰি উভতি যায়। শেষত পঞ্জাব ১৫৫ ৰানত অল আউট হয়।