কংগ্ৰেছৰ প্ৰাক্তন সভাপতি ৰাহুল গান্ধীয়ে ‘ভাৰত জোড়ো যাত্ৰা’ কাৰ্যসূচীৰে ৰাজনৈতিক ক্ষেত্ৰখনত জোকাৰণি তুলিছে। ৰাহুলৰ এই কাৰ্যসূচী মঙলবাৰে উত্তৰ প্ৰদেশত আৰম্ভ হৈছে। ইয়াৰ পূৰ্বে ৰাম জন্মভূমি মন্দিৰৰ প্ৰধান পুৰোহিত আচাৰ্য সতীন্দ্ৰ দাসে ছোনিয়া পুত্ৰলৈ এখন পত্ৰ লিখিছে।
ৰাম মন্দিৰৰ প্ৰধান পুৰোহিতজনে এক অভিনন্দন বাৰ্তাত লিখিছে, “ভগৱান ৰামৰ আশীৰ্বাদ ৰাহুলৰ সৈতে থাকিব।”
লগতে পঢ়ক: ভাৰত জোড়ো যাত্ৰাত আন এক মুখ: ৰাহুল গান্ধীক সংগ দিলে ৰ’- ৰ প্ৰাক্তন মুৰব্বী অমৰজিৎ সিং দুলাটে
ৰাম মন্দিৰৰ পুৰোহিতজনে ভাৰত জোড়ো যাত্ৰা কাৰ্যসূচীৰ জৰিয়তে সমগ্ৰ দেশক একত্ৰিত কৰাৰ ৰাহুল গান্ধীৰ প্ৰচেষ্টাক প্ৰশংসা কৰে। তেওঁ পত্ৰখনত লিখিছে, “আপুনি (ৰাহুলে) যি লক্ষ্যৰে এই কাৰ্যসূচী কৰি আছে, মই প্ৰাৰ্থনা কৰিছো আৰু আশা কৰোঁ যে ই সফল হ’ব। আপোনাৰ দীৰ্ঘায়ু কামনা কৰিছো।”
ৰাম মন্দিৰৰ প্ৰধান পুৰোহিতজনে পত্ৰখনত লগতে লিখিছে, “আপুনি সৎউদ্যোগ লৈছে। যিটো সকলোৰে বাবে ভাল। ভগৱান ৰামৰ আশীৰ্বাদ সদায় আপোনাৰ লগত থাকিব।‘’
তেওঁ ৰাহুল গান্ধীৰ ‘ভাৰত জোড়ো যাত্ৰা’ত যোগদান কৰাৰ ইচ্ছাও প্ৰকাশ কৰে। কিন্তু শাৰীৰিক কাৰণত তেওঁ যোগদান কৰিব নোৱাৰে। কিন্তু ৰাম মন্দিৰৰ প্ৰধান পুৰোহিতজনে ৰাহুলৰ কাৰ্যসূচীত নৈতিক সমৰ্থন ব্যক্ত কৰিছে।
উল্লেখ্য যে ৯দিনৰ বিৰতিৰ পিছত ৰাহুল গান্ধীৰ কাৰ্যসূচী মঙলবাৰে দিল্লীৰ পৰা পুনৰ আৰম্ভ হৈছে। ভাৰত জোড়ো যাত্ৰা মঙলবাৰে সন্ধিয়া উত্তৰ প্ৰদেশত উপস্থিত হয়। তাৰ পিছত এই কাৰ্যসূচী হিমাচল প্ৰদেশ হৈ জম্মু আৰু কাশ্মীৰত উপস্থিত হ’ব।
