অসম বিধানসভা নিৰ্বাচনৰ দ্বিতীয় আৰু তৃতীয় পৰ্যায়ৰ ভোটগ্ৰহণলৈ মাজত মাথো কেইটামান দিন বাকী থকা অৱস্থাত তামুলপুৰ বিধান সভা সমষ্টিত বিভিন্ন ৰাজনৈতিক দলৰ প্ৰচাৰ কাৰ্য তুংগত উঠিছে।
সমষ্টি কুক্ষিগত কৰাৰ বাবে আপ্ৰাণ প্ৰচেষ্টা অব্যাহত ৰাখিছে বিপিএফ দলে। মংগলবাৰে দলীয় প্ৰাৰ্থী ৰংজা খুঙগুৰ বসুমতাৰীৰ সমৰ্থনত নিৰ্বাচনী প্ৰচাৰ চলাই বিপিএফ দলৰ মুৰব্বী তথা বিটিচিৰ প্ৰাক্তন মুখ্য কাৰ্যবাহী সদস্য হাগ্ৰামা মহিলাৰী আৰু অসম প্ৰদেশ কংগ্ৰেছ কমিটিৰ সম্পাদক অপূৰ্ব ভট্টাচাৰ্যই।
তামুলপুৰৰ বৰখোপা উচ্চ মাধ্যমিক বিদ্যালয় খেলপথাৰত অনুষ্ঠিত এই বিশাল নিৰ্বাচনী সভাখনৰ আঁত ধৰে বিটিচিৰ প্ৰাক্তন কাৰ্যবাহী সদস্য মহেশ্বৰ বসুমতাৰী আৰু তামুলপুৰ জিলা বিপিএফৰ সাধাৰণ সম্পাদক উপেন বসুমতাৰীয়ে।
নিৰ্বাচনী প্ৰচাৰ সভাত বিপিএফ প্ৰধান হাগ্ৰামা মহিলাৰীয়ে কয় “এইবাৰ কংগ্ৰেছ দলৰ নেতৃত্বত মহাজোঁটে অসমত চৰকাৰ গঠন কৰিব। প্ৰথম পৰ্যায়ত মহাজোঁটে ৩০ৰ পৰা ৩৫ খন আসন লাভ কৰিব। সামগ্ৰিকভাৱে মহাজোঁটে ৭০ খনতকৈ অধিক আসন লাভ কৰিব।”
তেওঁ লগতে আৰু কয় যে মাটি বাৰীৰ সমস্যা, কিনা বেচাৰ সমস্যা মহকুমা বা চক্ৰ বিষয়াৰ কাৰ্যালয়ত দূৰ কৰা হ’ব। সকলো জাতি জনগোষ্ঠীৰ উন্নয়ন পৰিষদ গঠন কৰা হ’ব বুলিও হাগ্ৰামাই কয়। ইফালে বিজেপি দলে বন্ধ কৰা মাদ্ৰাছাসমূহ খোলা হ’ব মন্তব্য কৰে মহিলাৰীয়ে।
সভাত কংগ্ৰেছ দলৰ সম্পাদক অপূৰ্ব ভট্টাচাৰ্যয়ো উদাত্ত ভাষণ ৰাখি বিজেপি দলক মিছলীয়া আখ্যা দিয়ে আৰু এইবাৰ কংগ্ৰেছ মহাজোঁট বন্ধনে চৰকাৰ গঠন কৰিব বুলি দাবী কৰে।
অপূৰ্ব ভট্টাচাৰ্য্যই কয়- “মহাজোঁটে চৰকাৰ গঠন কৰিলে চাহ শ্ৰমিকৰ দৈনিক মজুৰি ৩৬৫ টকালৈ বৃদ্ধি কৰা হ’ব।”
