লকডাউনৰ মাজতে পুনৰ ৰাজপথত দৌৰিবলৈ সাজু ‘Rapido’; দেশৰ ৩৯খন চহৰত আৰম্ভ হ’ব সেৱা
লকডাউনৰ ফলত সেৱা বন্ধ হৈ পৰাৰ ফলত নিজৰ ব্যৱসায় প্ৰায় সামৰিব লগীয়া অৱস্থা হৈছিল ৰেপিড’ৰ।
লকডাউন ৪.০ত এইবাৰ সকাহৰ মুখ দেখিছে সংস্থাটোৱে। বাইক টেক্সি এপটোৱে এইবাৰ গ্ৰীণ তথা অ’ৰেঞ্জ জ’নত লোকক সেৱা আগবঢ়োৱাৰ অনুমতি লাভ কৰিছে।
বুধবাৰে সংস্থাটোৱে জানিবলৈ দিয়ে যে দেশৰ ১১খন ৰাজ্যৰ ৩৯খন চহৰত Rapidoৱে পুনৰ সেৱা আৰম্ভ কৰিব।
সংস্থাটোৱে জাৰি কৰা এটা বিবৃতিত কোৱা হৈছে,’’এই মুহূৰ্তত আমাৰ বাইক টেক্সি সেৱা গ্ৰীম আৰু অ’ৰেঞ্জ জ’নতেই সীমাবদ্ধ থাকিব। লকডাউনৰ বিধি অনুসৰি এতিয়া আমি কন্টেইনমেন্ট জ’নত আমি সেৱা আগবঢ়াব নোৱাৰিম।‘’
তদুপৰি, সংস্থাটোৱে জনাইছে যে দেশৰ বিভিন্ন চহৰত Rapido বাইক টেক্সিত উঠাৰ বাবে সুৰক্ষা সম্পৰ্কীয় নিৰ্দেশনাসমূহো এপটোতেই আপডেট কৰি দিয়া হ’ব।
সুৰক্ষা সম্পৰ্কত কোৱা হৈছে যে চালকসকলৰ স্মাৰ্টফোনত আৰোগ্য সেতু এপ ডাউনলোড বাধ্যতামূলক কৰি দিয়া হৈছে। ইয়াৰ লগতে ছেনিটাইজ লগত ৰখা, হেলমেট পৰিধান কৰাৰ পূৰ্বে হেয়াৰ নেট ব্যৱহাৰ কৰিবলৈ কোৱা হৈছে।
এই হেয়াৰ নেট আৰু ছেনিটাইজাৰ প্ৰতিখন বাইকৰ চালকে তেওঁলোকৰ গ্ৰাহকক দিব বুলিও সংস্থাটোৱে প্ৰকাশ কৰিছে।
তদুপৰি, চালকসকলে প্ৰতিদিনে বাইক ছেনিটাইজ কৰিব লাগিব আৰু প্ৰতিজন গ্ৰাহকে বাইকত উঠাৰ পূৰ্বে ছীটটো ভালদৰে ছেনিটাইজ কৰিব লাগিব।
আনহাতে, Rapido ৰ ফালৰ পৰা চালকসকলক ব্যক্তিগতভাৱে স্বাস্থ্যবিধি মানি চলাৰ বাবে কঠোৰ নিৰ্দেশ দিয়া হৈছে।
চালকসকলে নিয়মসমূহ অমান্য কৰিলে গ্ৰাহকে এপটোৰ জৰিয়তেই অভিযোগ দিব পাৰিব।