সদৌ শিৱসাগৰ জিলা ছাত্ৰ সন্থাৰ উদ্যোগত আজি লক্ষ্মী পূৰ্ণিমাৰ দিনটোত শিৱসাগৰত ৰসৰাজ লক্ষ্মীনাথ বেজবৰুৱাৰ জন্মদিন উদযাপন কৰা হয়।এই উপলক্ষে আজি নগৰৰ লক্ষ্মীনাথ বেজবৰুৱা শিশু উদ্যানত অসমীয়া ভাষা-সাহিত্যৰ কাণ্ডাৰী গৰাকীৰ প্ৰতিমূৰ্তিত বন্তি প্ৰজ্বলন কৰি সাহিত্যৰথী বেজবৰুৱাৰ প্ৰতি শ্ৰদ্ধাৰ্ঘ প্ৰদান কৰা হয়।
অসমীয়া ভাষা সাহিত্যৰ সকলো শিতানত নিজ সৃষ্টিৰে সাহিত্যৰ ভঁৰাল চহকী কৰি যোৱা সাহিত্যৰথী গৰাকীক প্ৰতিমূৰ্তিত বেজবৰুৱাৰ পৰিয়ালৰ হৈ অৰুন্ধতী বেজবৰুৱাই বন্তি প্ৰজ্বলন কৰি কাৰ্যসূচী আনুষ্ঠানিক ভাৱে মুকলি কৰে।অনুষ্ঠানত বিশিষ্ট শিক্ষাবিদ গড়গাঁও মহাবিদ্যালয়ৰ অৱসৰ প্ৰাপ্ত অধ্যাপিকা ডঃ অৰুন্ধতী মহন্তই সাহিত্যৰথীৰ জীৱন আৰু সাহিত্য কৰ্ম সম্পৰ্কে আলোকপাত কৰে।
এই অনুষ্ঠানতে শিৱসাগৰ জিলা ছাত্র সন্থাই বিগত ২০২১ চনৰ পৰা ধাৰাবাহিক ভাবে প্ৰদান কৰি অহা সাহিত্যৰথী ৰসৰাজ লক্ষ্মীনাথ বেজবৰুৱা বঁটা ২০২৪ ঘোষণা কৰে।২০২৪ বৰ্ষৰ বাবে ছাত্ৰ সংগঠনটোৱে এই বঁটা অসম সাহিত্য সভাৰ প্ৰাক্তন সভাপতি কুল শইকীয়াক প্রদান কৰা হব বুলি ঘোষণা কৰে।
জন্ম দিনৰ অনুষ্ঠানৰ পৰা ছাত্র সংগঠনটোৱে অসম চৰকাৰক সাহিত্যৰথীৰ সাহিত্য কৰ্ম আৰু তেওঁৰ স্মৃতি বিজড়িত প্রতিটো সম্পদ সঠিক ভাবে সংৰক্ষণ কৰি নৱ প্ৰজন্মক এই ঐতিহ্যৰ সৈতে পৰিচিত কৰোৱাৰ গুৰু দায়িত্ব গ্ৰহণ কৰাৰ বাবে কাৰ্যকৰী ব্যৱস্থা লোৱাৰ দাবী কৰে।
