আইচিচিৰ শীৰ্ষস্থান অক্ষুণ্ণ অশ্বিনৰঃ চতুৰ্থলৈ উন্নীত বুমৰাহ
আইচিচিয়ে প্ৰকাশ কৰা শেহতীয়া টেষ্ট ৰেংকিঙত বলাৰৰ শাখাত শীৰ্ষস্থান অক্ষুণ্ণ ৰাখিছে ভাৰতৰ অভিজ্ঞ স্পিনাৰ ৰবিচন্দ্ৰন অশ্বিনে। আনহাতে তাৰকা পেচাৰ যশপ্ৰীত বুমৰাহৰ চতুৰ্থ স্থানলৈ উত্তৰণ ঘটিছে।
ইংলেণ্ডৰ বিৰুদ্ধে চলিত টেষ্ট শৃংখলাৰ প্ৰথমখন টেষ্টত ভাৰত পৰাস্ত হ’লেও অশ্বিন আৰু জাদেজাই ছয়টাকৈ উইকেট দখল কৰিছিল। অশ্বিনে ৮৫৩ ৰেটিং পইণ্ট লাভ কৰাৰ বিপৰীতে ৮২৫ ৰেটিং পইণ্ট লাভ কৰি আছে বুমৰাহে।
ৰেংকিঙৰ শীৰ্ষ দহত স্থান লাভ কৰা আন এগৰাকী ভাৰতীয় বলাৰ হৈছে ৰবীন্দ্ৰ জাদেজা। জাদেজাই ৭৫৪ ৰেটিং পইণ্টেৰে তালিকাৰ ষষ্ঠ স্থানত আছে। লক্ষণীয়ভাৱে জাদেজাই টেষ্টৰ অলৰাউণ্ডাৰ ৰেংকিঙত শীৰ্ষস্থান অক্ষুণ্ণ ৰাখিছে।
জাদেজাই ৪২৫ ৰেটিং পইণ্টেৰে শীৰ্ষত থকাৰ বিপৰীতে অশ্বিন ৩২৮ ৰেটিং পইণ্টেৰে দ্বিতীয় স্থানত আছে। প্ৰথমখন টেষ্টত বেটিঙত বিশেষ সফল নহ’লেও বলিঙত সফল হোৱা ইংলেণ্ডৰ তাৰকা জ’ ৰুটে এই তালিকাত কেৰিয়াৰ শ্ৰেষ্ঠ চতুৰ্থ স্থানলৈ উন্নীত হৈছে।
অলৰাঔণ্ডাৰৰ তালিকাত অক্ষৰ পেটেলে লাভ কৰি আছে ষষ্ঠ স্থান। ইফালে টেষ্টৰ বেটিং ৰেংকিঙত শীৰ্ষ দহত থকা একমাত্ৰ ভাৰতীয় তাৰকাৰ ৰূপত বিৰাট কোহলী ষষ্ঠ স্থানলৈ আছে।