ৰিলায়েন্স ইণ্ডাষ্ট্ৰীজৰ অধ্যক্ষ মুকেশ আম্বানীৰ বৃহৎ ঘোষণা । অহা ৫ বছৰত ৰিলায়েন্সে উত্তৰ-পূবত বিনিয়োগ কৰিব ৭৫ হাজাৰ কোটি টকা । ৰাইজিং নৰ্থ-ইষ্ট ইনভেষ্টৰ্ছ ছামিট ২০২৫ত ভাষণ প্ৰদান কৰি মুকেশ আম্বানীয়ে এই কথা ঘোষণা কৰে । আম্বানীৰ মতে এই বিনিয়োগে উত্তৰ-পূবত ২৫ লাখতকৈ অধিক প্ৰত্যক্ষ আৰু পৰোক্ষ নিয়োগৰ সুযোগ মুকলি কৰাৰ সম্ভাৱনা আছে ।
মুকেশ আম্বানীয়ে লগতে উল্লেখ কৰে যে ৰিলায়েন্স ৰিটেইলে উত্তৰ-পূবৰ ৰাজ্যসমূহত অঞ্চলটোৰ শীৰ্ষ এফএমচিজি সামগ্ৰীৰ কাৰখানাত বিনিয়োগ কৰিব আৰু অঞ্চলটোৰ শিল্প অৰ্থনীতিক প্ৰচাৰ কৰিব ।
মুকেশ আম্বানীয়ে লগতে উত্তৰ-পূবত ৩৫০ টা ইণ্টিগ্ৰেটেড কম্প্ৰেছ বায়’গেছ উদ্যোগ স্থাপন কৰি বিশাল পৰিত্যক্ত ভূমিক সম্পদলৈ ৰূপান্তৰিত কৰাৰ লক্ষ্য ৰাখিছে ।
উত্তৰ-পূবত স্বাস্থ্যসেৱাৰ ক্ষেত্ৰত পৰিকল্পনাৰ কথা উল্লেখ কৰি মুকেশ আম্বানীয়ে কয় যে উত্তৰ-পূৰ্বাঞ্চলত শ্ৰেষ্ঠ কেন্সাৰ কেয়াৰ ব্যৱস্থা অনাৰ পৰিকল্পনা কৰা হৈছে ।
উল্লেখ্য যে ২৩ মে’ৰ পৰা দুদিনীয়া কাৰ্যসূচীৰে নতুন দিল্লীৰ ভাৰত মণ্ডপমত অনুষ্ঠিত হৈছে ৰাইজিং নৰ্থ ইষ্ট ইনভেষ্টৰ্ছ সন্মিলন ২০২৫ । প্ৰধানমন্ত্ৰী নৰেন্দ্ৰ মোদীয়ে উদ্বোধন কৰা এই সন্মিলনৰ লক্ষ্য হৈছে উত্তৰ-পূব অঞ্চলক সুযোগ প্ৰদান কৰি বিশ্বব্যাপী আৰু ঘৰুৱা উভয় বিনিয়োগক আকৰ্ষণ কৰা ।
