‘দলং’ নামৰ গুৱাহাটীৰ সামাজিক-সাংস্কৃতিক গোষ্ঠীয়ে আজি মহানগৰীৰ লক্ষীধৰ বৰা ক্ষেত্ৰত ‘চেনেহৰ মেহফিল’ শীৰ্ষক ঈদ মেহফিলৰ আয়োজন কৰিছে।
অনুষ্ঠানত প্ৰতিযশা সংস্কৃত পণ্ডিত তথা ২০০৯ চনৰ ৰাষ্ট্ৰীয় সাম্প্ৰদায়িক সম্প্ৰীতি বঁটা প্ৰাপক মহম্মদ হানিফ খান শাস্ত্ৰীয়ে মুখ্য অতিথি হিচাপে অংশগ্ৰহণ কৰিব।
জনসাধাৰণৰ মাজত সম্পৰ্ক ৰক্ষাৰ ক্ষেত্ৰত বিশেষ ভূমিকা পালন কৰি অহা গোষ্ঠীটোৱে বিভিন্ন জাতি-জনগোষ্ঠীৰ লোকৰ মাজত মানৱতা আৰু ভাতৃত্ববোধৰ বান্ধোন শক্তিশালী কৰাৰ উদ্দেশ্যৰে মেহফিল খনি আয়োজন কৰা বুলি জনাইছে।
দলঙৰ মুখ্য আহ্বায়ক ৰাজীৱ ভট্টাচাৰ্য্যই দলঙে বাট হেৰুৱা মানুহক পুনৰ মানুহৰ মাজলৈ ঘুৰাই অনাৰ বাবে সংযোগ ৰেখা হিচাপে কাম কৰি আহিছে বুলি উল্লেখ কৰে। তেওঁ বিভিন্ন ছালৰ ৰং, বেলেগ দেশ, বেলেগ ভাষা, বিভিন্ন ধৰ্মৰ উপাসনা কৰা লোকসকলে এটাই মানৱ জাতিক প্ৰতিনিধিত্ব কৰে বুলি তাৎপৰ্য্যপূৰ্ণ মন্তব্য কৰে।
‘‘মানৱ সমাজ ধনী আৰু দুখীয়া, শাসক আৰু প্ৰজা, প্ৰথম বিশ্ব আৰু তৃতীয় বিশ্ব আদি ধাৰণাৰে ভৰি আছে। এনেধৰণৰ ধাৰণাই ভৌগলিক, সামাজিক, ঐতিহাসিক, ৰাজনৈতিক, আৰ্থনৈতিক আৰু অন্যান্য সংঘাতৰ সৃষ্টি কৰে’’। দলঙে মানুহক এনেধৰণৰ সংঘাত ওফৰাই প্ৰকৃত পথৰ সন্ধান দিয়াৰ বাবে চেষ্টা কৰি আহিছে বুলি ভট্টাচাৰ্য্যই আমাৰ সাংবাদিকৰ আগত মত প্ৰকাশ কৰে।
