শৰাইঘাট দলঙৰ ওপৰত চলি থকা বিৰক্তিকৰ যানজঁটে আৰু সহজতে আপোনাক সকাহ দিয়াৰ সম্ভাৱনা নাই। দলঙখনৰ মেৰামতিৰ দায়িত্ব লাভ কৰা উত্তৰ পূব সীমান্ত ৰে’লৱেই কামটোত সম্পূৰ্ণ মনযোগ নিদিয়াৰ অভিযোগ উঠিছে।
অতি কম সংখ্যক কৰ্মশক্তি নিয়োগ কৰি উত্তৰ পূব সীমান্ত ৰে’লৱেই যিধৰণে মেৰামতিৰ কাম চলাই আছে, সেইদৰে হ’লে আৰু কেইমাহৰ বাবে শৰাইঘাটৰ ওপৰেৰে যাত্ৰা কৰিবলগীয়া যাত্ৰীসকলে দীঘলীয়া তথা বিৰক্তিকৰ যানজঁটৰ সন্মুখীন হ’বলৈ সাজু থাকিব লাগিব।
উল্লেখযোগ্য যে পুৰণি শৰাইঘাট দলঙৰ মেৰামতিৰ কাম চলি আছে আৰু যোৱা মাৰ্চ মাহত মেৰামতিৰ বাবে দলংখন তিনিমাহৰ বাবে বন্ধ ৰখা হৈছিল।
অতি দ্ৰুত গতিত কাম চলিবলগীয়া দলংখনৰ কাম বৰ্তমান ইমানেই লেহেম গতিত চলিছে যে দলংখনৰ মেৰামতি কেতিয়ালৈ সম্পূৰ্ণ হৈ উঠিব সেয়া কোৱাটো কঠিন হৈ পৰিছে।
ইপিনে, শৰাইঘাটেৰে পাৰ হ’বলগীয়া গাড়ীৰ যাত্ৰীসকলে সদায় তিনি-চাৰি ঘন্টা যানজঁটত ৰৈ থাকিবলগীয়া হৈছে। অত্যন্ত গৰমত যাত্ৰীসকলে এক অশান্তিকৰ সময় পাৰ কৰিবলগীয়া হৈছে।
আনহাতে, শৰাইঘাট দলঙৰ মেৰামতিৰ কামৰ এনে মন্থৰ গতিত অসন্তুষ্টি প্ৰকাশ কৰিছে জিলা প্ৰশাসনে। কামৰূপ জিলাৰ(গ্ৰাম্য) উপায়ুক্ত কমল কুমাৰ বৈশ্যই সাংবাদিকৰ আগত কয় যে উত্তৰ পূব সীমান্ত ৰে’লৱেই যি গতিত দলঙখনৰ মেৰামতিৰ কাম চলাইছে, এইদৰে অহা মাহত কাম সম্পূৰ্ণ হোৱাৰ কোনো সম্ভাৱনা নাই। ৰে’লৱেই এই বৃহৎ দলংখন মেৰামতিৰ বাবে মাত্ৰ ১৩জন কৰ্মীক নিযুক্তি দিছে। গতিকেই এই দলঙৰ ওপৰেৰে যাত্ৰা কৰিবলগীয়া যাত্ৰীসকলে দুৰ্ভোগ ভূগিবলগীয়া হ’ব।
এনেদৰে কাম চলিলে শৰাইঘাট দলঙৰ মেৰামতিৰ কাম সম্পূৰ্ণ হ’বলৈ আৰু কমেও তিনি চাৰি মাহ সময় লাগিব বুলি অনুমান কৰা হৈছে।
কাম আৰম্ভ হোৱাৰ পাছত এতিয়ালৈ দলংখনৰ মেৰামতিৰ মাত্ৰ ২০ শতাংশ কামহে সম্পূৰ্ণ হৈছে। সেয়েহে শৰাইঘাট পাৰ হৈ যাবলগীয়া যাত্ৰীসকলে যানজঁটৰ যাতনা সহ্য কৰিবলৈ সাজু থকাৰ বাহিৰে আন বিকল্প নাই।
