চলিত বৰ্ষত প্ৰলয়ংকাৰী বানৰ কবলত পৰা ৰাজ্যবাসীক সহায়ৰ বাবে মুখ্য মন্ত্ৰী সৰ্বানন্দ সোণোৱালে কৰা আহ্বানৰ প্ৰতি সহাৰি দি শুকুৰবাৰে মুখ্য মন্ত্ৰী সাহায্য পুঁজিলৈ বৰঙনি আগবঢ়াই অসম গণ পৰিষদৰ বিধায়িনী দলৰ প্ৰতিনিধিসকলে।
অগপৰ সভাপতি অতুল বৰা, জলসম্পদ মন্ত্ৰী কেশৱ মহন্ত, ফনীভূষণ চৌধুৰীকে আদি কৰি দলটোৰ বিধায়কসকলে মুখ্য মন্ত্ৰী সোণোৱালক কাৰ্য্যালয়ত সাক্ষাৎ কৰি মুখ্য মন্ত্ৰী সাহায্য পুঁজিলৈ ৫ লাখ টকাৰ বৰঙনি আগবঢ়ায়।
উল্লেখযোগ্য যে, অগপ বিধায়িনী দলৰ প্ৰনিধিসকলৰ উপৰিও শুকুৰবাৰে কেন্দ্ৰীয় খাদ্য সংসাধন মন্ত্ৰী ৰামেশ্বৰ তেলীয়ে মুখ্য মন্ত্ৰী সাহায্য পুঁজিলৈ ১ লাখ টকাৰ বৰঙনি আগবঢ়ায়।
তদুপৰি, অসম চৰকাৰৰ মাননীয় ৰাজ্যিক মন্ত্ৰী ভবেশ কলিতা আৰু ঢেকিয়াজুলিৰ বিধায়ক অশোক সিংহালে ক্ৰমে ১.২৫ লাখ আৰু ৮০ হাজাৰ টকাৰ বৰঙনি আগবঢ়ায়।
মঙলদৈৰ বিধায়ক গুৰুজ্যোতি দাসে মুখ্য মন্ত্ৰীক সাক্ষাৎ কৰি মুখ্য মন্ত্ৰী সাহায্য পুঁজিলৈ ৬০,০০০ টকাৰ এখন চেক আগবঢ়ায়।
অসমৰ বানপিড়িত ৰাইজক সহায়ৰ বাবে ৰাজ্যৰ লগতে দেশৰ বিভিন্ন ক্ষেত্ৰৰ সৈতে জড়িত লোকসকল আগবাঢ়ি আহিছে।
