শুকুৰবাৰে ৰাজ্যৰ চলচ্চিত্ৰ গৃহত মুক্তি পাব ৰীমা দাসৰ অস্কাৰ মনোনীত ছবি ভিলেজ ৰক্ষ্টাৰ্ছ। বিশ্বৰ বিভিন্ন চলচ্চিত্ৰ মহোৎসৱত ভাগ লৈ সুনাম অৰ্জন কৰা তথা শ্ৰেষ্ঠ ৰাষ্ট্ৰীয় চলচ্চিত্ৰ বঁটা লাভ কৰি ভিলেজ ৰক্ষ্টাৰ্ছ ইতিমধ্যে সকলোতে চৰ্চিত হৈ পৰিছে।
ভিলেজ ৰক্ষ্টাৰ্ছৰ জৰিয়তে ৰীমা দাসে অসমবাসীৰ লগতে সমগ্ৰ দেশবাসীৰ বাবে গৌৰৱ কঢ়িয়াই আনিছে। আজি গুৱাহাটীৰ লগতে ৰাজ্যৰ বিভিন্ন স্থানৰ চিত্ৰগৃহত ছবিখন বাণিজ্যিকভাৱে মুক্তি দিয়া হ’ব।
অসমৰ উপৰি মুম্বাই, দিল্লী, হায়দৰাবাদ, কলকাতা আদিতো ভিলেজ ৰক্ষ্টাৰ্ছ মুক্তি দিয়া হ’ব। বৃহস্পতিবাৰে গুৱাহাটী প্ৰেছ ক্লাবৰ এখন সংবাদমেল সম্বোধন কৰি ৰীমা দাসে ভিলেজ ৰক্ষ্টাৰ্ছ উপভোগ কৰিবলৈ অসমৰ ৰাইজক আহ্বান জনায়।
ভিলেজ ৰক্ষ্টাৰ্ছ নিৰ্মাণৰ প্রসংগত ৰীমা দাসে সদৰী কৰে যে নদী, পথাৰৰ লগত থকা সম্পৰ্কই তেওঁক ইয়াৰ বাবে অনুপ্ৰেৰণা যোগাইছিল। তেওঁ কয়, ‘’চিনেমাখন নিৰ্মাণৰ বাবেই মুম্বাইৰ পৰা গাঁৱলৈ আহিছিলোঁ। শিশুৰ মাজত বহু প্ৰতিভা থাকে। চিনেমাখনত অভিনয় কৰা বেছিভাগ শিশু শিল্পী দুখীয়া পৰিয়ালৰ। বহুতৰে পিতৃয়ে হাজিৰা কৰে। শিশু অৱস্থাত যিবোৰ সপোন থাকে, সময়ৰ সোঁতত সেই সপোনবোৰ নোহোৱা হৈ যায়। সেয়ে তেনেবোৰ সপোন জীয়াই ৰাখিবৰ বাবে চিনেমাখন নিৰ্মাণ কৰা হৈছে। এজনী সৰু ছোৱালীক লৈ চিনেমাখন আৰম্ভ হৈছে।‘’
ৰীমাই পৰিয়াল, ঈশ্বৰ, প্ৰকৃতিয়ে ভিলেজ ৰক্ষ্টাৰ্ছ নিৰ্মাণত সহায় কৰিছিল বুলিও অনুভৱ ব্যক্ত কৰে। ৪ টা বছৰৰ অক্লান্ত শ্ৰম, শ্বুটিঙৰ অন্ততহে মনে বিচৰা ছবিখনৰ নিৰ্মাণ সম্ভৱ হৈ উঠিছিল।
সংবাদমেলত ৰীমাই লগতে কয় যে তুৰস্ক, ফ্ৰান্স, বাৰ্লিন আদি আন্তৰ্জাতিক চলচ্চিত্ৰ মহোৎসৱত ছবিখন প্ৰদৰ্শিত হোৱাটো তেওঁৰ এক সপোন আছিল। তদুপৰি, চিনেমাখন চোৱাৰ পাছত বিদেশৰ দৰ্শকে তেওঁৰ ওচৰলৈ আহি কৰা প্ৰশংসা তথা মৰমত তেওঁ আপ্লুত হৈ পৰাৰ কথাও উল্লেখ কৰে ৰীমাই।
ইফালে ভিলেজ ৰক্ষ্টাৰ্ছৰ অস্কাৰ প্ৰম’শ্যনৰ বাবে প্ৰায় ৩ কোটি টকাৰ প্ৰয়োজন হোৱাৰ কথাও তেওঁ ব্যক্ত কৰে। এই ক্ষেত্ৰত অসম চৰকাৰে ৫০ লাখ টকাৰ সাহায্য প্ৰদান কৰিবলৈ লোৱা সিদ্ধান্তত ৰীমাই সন্তোষ প্ৰকাশ কৰে। আনহাতে বহু লোকে সহায়-সহযোগৰ প্ৰতিশ্ৰুতি দিয়া বুলিও ৰীমা দাসে সদৰী কৰে।
