বিজয় হাজাৰে ট্ৰফীত ৰিয়ান পৰাগৰ ১১৬ টা বলত ১৭৪ ৰাণৰ বিস্ফোৰক ইনিংছ; মুগ্ধ ক্ৰিকেট অনুৰাগী

ৰাজস্থান ৰয়েলছে সোমবাৰে বিজয় হাজাৰে ট্ৰফীৰ কোৱাৰ্টাৰ ফাইনেলত ১৭৪ ৰাণ সংগ্ৰহ কৰা মিডল অৰ্ডাৰ বেটছমেন ৰিয়ান পৰাগৰ বাবে এক চুপাৰহিৰো ষ্টাইলৰ  পোষ্ট শ্বেয়াৰ কৰি অভিনন্দন জনায়। পৰাগে কোৱাৰ্টাৰ ফাইনেলত ৩৫১ ৰাণৰ লক্ষ্য অনুসৰণ কৰি মাত্ৰ ১১৬ টা বলত ১২ টা চাৰি আৰু ১২ টা ছয়েৰে ১৭৪ ৰাণৰ বিস্ফোৰক ইনিংছ খেলে। অসমৰ হৈ তেওঁৰ দুৰ্দান্ত ইনিংছে বিজয় সহজ কৰি তোলে।

প্ৰথমবাৰৰ বাবে বিজয় হাজাৰে ট্ৰফীৰ কোৱাৰ্টাৰ ফাইনেলত উপনীত হোৱাৰ পিছত জম্মু-কাশ্মীৰে অসমক ৩৫১ ৰাণৰ লক্ষ্য নিৰ্ধাৰণ কৰি দিছিল। ৰিয়ান পৰাগ আকৌ এবাৰ প্ৰতিযোগিতাখনত দলৰ বাবে শ্ৰেষ্ঠত্ব প্ৰতিপন্ন কৰি দুৰ্দান্ত প্ৰদৰ্শন আগবঢ়ায়।

গ্ৰুপ পৰ্যায়ত তেওঁ পূৰ্বে প্ৰতিযোগিতাখনত দুটা শতক আৰু দুটা অৰ্ধশতক অৰ্জন কৰিছে। পৰাগে কোৱাৰ্টাৰ ফাইনেলতো দলৰ প্ৰয়োজনত নিজৰ আক্ৰমণাত্মক ধাৰা অব্যাহত ৰাখে।

ৰাজস্থান ৰয়েলছে পৰাগক এটা পোষ্টৰ জৰিয়তে তেওঁৰ অবিশ্বাস্য প্ৰয়াসৰ বাবে অভিনন্দন জনাইছে য’ত মিডল অৰ্ডাৰ বেটছমেনজনে মাৰ্ভেল চিনেমেটিক ইউনিভাৰ্ছৰ (এমচিইউ) চুপাৰহিৰো, আইৰণ মেন, হাল্ক আৰু কেপ্টেইন আমেৰিকাৰ দৰে অৱতাৰ লোৱা দেখা গৈছে।

how J&K bowlers saw Riyan today: pic.twitter.com/hsEJbjg7gt

— Rajasthan Royals (@rajasthanroyals) November 28, 2022

“জম্মু-কাশ্মীৰৰ বলাৰসকলে আজি ৰিয়ানক কেনেদৰে দেখিছিল,” যুৱ ক্ৰিকেটাৰজনক অভিনন্দন জনাই ৰাজস্থান ৰয়েলছে টুইটাৰত লিখিছিল।

পৰাগে অসমক বিজয় হাজাৰে ট্ৰফী ২০২২-ৰ ছেমিফাইনেলত উপনীত হোৱাত সহায় কৰিছে আৰু তেওঁৰ দুৰন্ত ফৰ্মেৰে দলটোক আগলৈ লৈ যাব বুলি আশা কৰা হৈছে।

𝘈𝘴𝘴𝘢𝘮 𝘩𝘢𝘪, 𝘢𝘢𝘴𝘢𝘢𝘯 𝘯𝘢𝘩𝘪. 👏👏 pic.twitter.com/dIbFwk7AOk

— Rajasthan Royals (@rajasthanroyals) November 28, 2022

বহুতে ৰিয়ানক ২০২৩ ৰ নিলামৰ বাবে ৰখাৰ ওপৰত প্ৰশ্ন উত্থাপন কৰা স্বত্বেও তেওঁক আই পি এলত স্থান দিয়া ৰাজস্থান ৰয়েলছে এটা পৃথক টুইটত লিখিছে,  “আসাম হে, আসান নেহী’’।

উল্লেখ্য যে অসমৰ উপৰিও কৰ্ণাটক, মহাৰাষ্ট্ৰ আৰু সৌৰাষ্ট্ৰই বিজয় হাজাৰে ট্ৰফী ২০২২ৰ ছেমিফাইনেলৰ বাবে যোগ্যতা অৰ্জন কৰিছে।