ৰাজপথত যমদূতৰূপী ডাম্পাৰৰ দৌৰাত্ম্যই পলকতে কালৰ গৰ্ভত চিৰকালৰ বাবে বিলিন কৰি দিলে এটি জীৱন।
নগাওঁ জিলাৰ পুৰণিগুদামৰ ন’আলিমুৰত সোমাবাৰে বিয়লি সংঘটিত এক ভয়ংকৰ পথ দুৰ্ঘটনাই শোকাকুল পৰিবেশৰ সৃষ্টি কৰিলে সমগ্ৰ অঞ্চলটোতে।
ন’আলিমুৰ স্থিত বৰ মছজিদৰ সন্মুখত নগাঁও অভিমূখী এ.এচ-0১ডি.ডি-১৫০২ নম্বৰৰ দ্ৰুতবেগী এখন ডাম্পাৰে মহতিয়াই নিলে এখন বাইক সহ এজন বাইক আৰোহীক।
দুৰ্ঘটনাটোৰ ফলত থিতাতে নিহত হয় চামগুৰিৰ ভগামুৰৰ প্ৰায় ৩৫ বছৰীয়া বাইক আৰোহী মকবুল হুছেইন।
উল্লেখ্য যে, ৩৭নং ৰাষ্ট্ৰীয় ঘাই পথেৰে এ.এচ-০২ডব্লিউ-৫৮৭৩ নম্বৰ এখন পালছাৰ মটৰ চাইকেল লৈ মকবুল হুছেইন নামৰ লোকজন নগাঁও অভিমূখে গৈ থকাৰ অৱস্থাত পিছৰ ফালৰ পৰা আহি ভয়াৱহ দুৰ্ঘটনা সংঘটিত কৰা ডাম্পাৰ খন এৰি ঘটনাস্থলীৰ পৰা পলায়ন কৰিবলৈ সক্ষম হয় ডাম্পাৰ চালক জন।
অৱশ্যে ঘটনাস্থলিত পুৰণিগুদাম আৰক্ষীৰ লোক উপস্থিতহৈ ততাতৈয়াকৈ মকবুলৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে মৃতদেহ নগাঁও অসামৰিক চিকিৎসালয়লৈ প্ৰেৰণ কৰে ।
দুৰ্ঘটনাটোৰ ফলত বহু সময় ধৰি তীব্ৰ যানজঁটৰ সৃষ্টি হয় ৰাজপথৰ দুয়ো দিশে।
