ডিব্ৰুগড় জিলাৰ বৰবৰুৱা অঞ্চলত সোমবাৰে দুটাকৈ এটিএমত লুত-পাত চলালে ডকাইতে। সোমবাৰে নিশা চহৰখনৰ ষ্টেট বেংক অৱ ইণ্ডিয়া আৰু পঞ্জাৱ নেচনেল বেংকৰ দুটা এটিএমৰ পৰা ডকাইতে লুটি নিছে ৪৫.৩১ লাখ টকা।
স্থানীয় আৰক্ষীয়ে জানিবলৈ দিয়া মতে ডকাইতৰ দলটোৱে এটিএম দুটাৰ পৰা টকাখিনি লুটি লোৱাৰ পিছত প্ৰমাণ ধ্বংস কৰিবলৈ এটিএম যন্ত্ৰকেইটা জ্বলাই দিয়ে। দুয়োটা এটিএমত ক্ৰমান্বয়ে ১৪.৮ লাখ টকা আৰু ৩০.৫১ লাখ টকা আছিল বুলি আৰক্ষীয়ে লগতে উল্লেখ কৰে।
আৰক্ষীয়ে ডকাইতৰ দলটোৱে এই ডকাইতি কাণ্ডৰ বাৰে গেছ কাটাৰ আৰু অন্যান্য অত্যাধুনিক সঁজুলি ব্যৱহাৰ কৰিছিল বুলি সন্দেহ প্ৰকাশ কৰিছে।
স্থানীয় এজন বাসিন্দাই ঘটনা সন্দৰ্ভত দিয়া ভাষ্য মতে মাজনিশা প্ৰায় ১.৩০ বজাত তেওঁ তাঁৰ জ্বলাৰ দৰে এক গোন্ধ পাই আৰু শ্বৰ্ট চাৰ্কিটৰ সন্দেহ কৰি ঘৰৰ পৰা ওলাই আহে।
বাহিৰত ভালদৰে লক্ষ্য কৰাৰ পাছতে ব্যক্তিগৰাকীয়ে তেওঁৰ ঘৰৰ কাষতে থকা দুটা এটিএমৰ পৰা ক’লা ধোঁৱা ওলাই থকা প্ৰত্যক্ষ কৰে। তাৰ পিছতেই তেওঁ লগে লগে আৰক্ষী, বিদ্যুৎ কাৰ্যালয় আৰু অগ্নি নিৰ্বাপক বাহিনীক অৱগত কৰে।
আনহাতে ডিব্ৰুগড়ৰ অতিৰিক্ত আৰক্ষী অধীক্ষক (মুখ্য কাৰ্যালয়) বিতুল চেতিয়াই কয় যে এটিএম চোৰে চুৰিৰ বাবে এই নতুন পদ্ধতি অৱলম্বন কৰিছে।
ঘটনা সন্দৰ্ভত ইতিমধ্যে অনুসন্ধান আৰম্ভ কৰা হৈছে বুলি তেওঁ উল্লেখ কৰাৰ লগতে এই ডকাইতৰ দলটো আন বহি: ৰাজ্যৰ বুলি সন্দেহ প্ৰকাশ কৰিছে।
