শনিবাৰে জনতা ভৱনত মুখ্যমন্ত্ৰী হিমন্ত বিশ্ব শৰ্মাই সম্বোধন কৰে সংবাদমেল। চৰকাৰৰ চতুৰ্থ বৰ্ষপূৰ্তিক লৈ অনুষ্ঠিত সংবাদমেলতে কেবিনেট সিদ্ধান্তও সদৰী কৰে মুখ্যমন্ত্ৰীয়ে। মুখ্যমন্ত্ৰীয়ে কয়, ‘আজিৰ দিনটো আমাৰ বাবে গুৰুত্বপূৰ্ণ দিন। অকংগ্ৰেছী চৰকাৰখনে ৯ বছৰ একেৰাহে পাৰ কৰিলোঁ। চাৰিটা বছৰত তিনিটা বিষয় অতি গুৰুত্বপূৰ্ণ। চাৰিটা বছৰে অসমে অভূতপূৰ্ব শান্তি লাভ কৰিছে। কোনো অশান্তিকৰ পৰিবেশৰ সূচনা হোৱা নাই।’
সংবাদমেলতে ৰাজ্যৰ GDP ৭.৫ লাখ কোটিলৈ টকালৈ বৃদ্ধি হৈছে বুলি উল্লেখ কৰে মুখ্যমন্ত্ৰীয়ে।
দেশৰ সাম্প্ৰতিক যুদ্ধকালীন প্ৰস্তুতিক লৈও মন্তব্য কৰে মুখ্যমন্ত্ৰীয়ে। তেওঁ কয়, ‘ক’ভিডৰ সময়ত যেনেকৈ হাস্পতাল সমূহত আমি অডিট কৰিছিলোঁ, তেনেকৈ পুনৰবাৰ কৰিব বিচাৰিছোঁ। আৰ্মী, এয়াৰ ফোৰ্চ কেম্পৰ ওচৰত থকা পৰিয়ালসমূহক কিছু প্ৰশিক্ষণ দিব লাগে। আৰ্মীৰ পৰিয়ালক কোনো সহায়ৰ প্ৰয়োজন হ’লে আমি সহায় কৰিব লাগে। পৰিয়ালসমূহত যি সুবিধাৰ প্ৰয়োজন হয় সেয়া চৰকাৰে কৰিব। ইয়াৰ বাবে জিলা প্ৰশাসনে কণ্ট্ৰল ৰূম আৰম্ভ কৰিব। অহা জুন মাহত ৰেচন কাৰ্ডৰ হিতাধিকাৰীয়ে তিনি মাহৰ চাউল একেলগে লাভ কৰিব।’
এই সন্দৰ্ভত মন্তব্য কৰি তেওঁ কয়, ‘প্ৰতিমাহত অসমলৈ চাউল আহে। ৰেচন কাৰ্ডৰ জৰিয়তে এই চাউল বিতৰণ কৰা হয়। ভাৰত চৰকাৰে বিচাৰিছে যে চৰকাৰৰ Logistics Responsibilityটো কমি যাব লাগে। যাতে চৰকাৰে অন্য দিশত শক্তি প্ৰয়োগ কৰিব পাৰে। ভাৰত চৰকাৰে অনুৰোধ কৰিছে যে তেওঁলোকে তিনিমাহৰ চাউল একেলগে দি দিব। নেচনেল ফুড ছিকিউৰিটীৰ এক্টৰ অধীনত তিনিমাহৰ চাউল একেলগে দিয়া হ’ব জুনত। পাঁচ কেজি চাউলেই থাকিব, কিন্তু তিনিমাহৰ বাবে একেলগে দিয়া হ’ব।’
আনহাতে, ব্যয়বহুল সন্মিলন সভা বাতিলৰ সিদ্ধান্তৰ বিষয়ে সদৰী কৰে মুখ্যমন্ত্ৰীয়ে। যুদ্ধসদৃশ পৰিৱেশৰ বাবে এই সিদ্ধান্ত মুখ্যমন্ত্ৰীৰ। বৰ্তমান সময়ত চৰকাৰে ক্ৰয় নকৰে নতুন বাহন। চৰকাৰৰ বিজ্ঞাপনত থাকিব দেশপ্ৰেমমূলক বাৰ্তা।
