বিশ্বৰ ক্ৰীড়াজগতৰ অগণন ক্ৰীড়াপ্ৰেমীক বিচলিত কৰি আজি টেনিচ বিশ্বৰ মহাতাৰকা ৰজাৰ ফেডাৰেৰে সামৰণি পেলোৱাৰ কথা ঘোষণা কৰিলে নিজৰ বৰ্ণাঢ্য কেৰিয়াৰৰ। যোৱা প্ৰায় ২৫ টা বছৰে ক্ৰীড়া বিশ্বক মোহিত কৰা কিংবদন্তীগৰাকীয়ে আনুষ্ঠানিকভাৱে টেনিচক বিদায় দিয়াৰ কথা ঘোষণা কৰে।
ছুইচ তাৰকাগৰাকীয়ে লণ্ডনত অনুষ্ঠিত হ’বলগীয়া আগন্তুক লেভাৰ কাপৰ পিছতে এৰিব হাতৰ ৰেকেট। বিশ্বৰ ক্ৰীড়া জগতখনৰে এক মহানায়ক হিচাপে নিজকে প্ৰতিষ্ঠিত কৰা ২০ বাৰৰ গ্ৰেণ্ড শ্লেম চেম্পিয়নে ফেডাৰাৰৰ এই সিদ্ধান্তই আবেগিক কৰি তুলিছে ক্ৰীড়া প্ৰেমীসকলক।
৪১ বৰ্ষীয় ফেডাৰাৰে যোৱা বৰ্ষৰ উইম্বলডনৰ কোৱাৰ্টাৰ ফাইনেলত পৰাস্ত হোৱাৰ পিছতে আঁতৰি আছিল পেছাদাৰী টেনিচৰ পৰা। শেহতীয়াকৈ আঁঠুৰ আঘাতৰ বাবে কেৰিয়াৰত ব্যাপক বিধি-পথালি দিয়াৰ পিছত অৱশেষত টেনিচৰ পৰা সন্যাস লোৱাৰ সিদ্ধান্ত গ্ৰহণ কৰিবলৈ বাধ্য হয় তাৰকাগৰাকী।
এক ইনষ্টাগ্ৰাম পোষ্ট যোগে অৱসৰৰ কথা ঘোষণা কৰি ফেডাৰাৰে কয়, “আপোনালোক সকলোৱে জানে, যোৱা তিনি বছৰে আঘাত আৰু কেইবাটাও অস্ত্ৰোপচাৰে মোৰ সমুখত যথেষ্ট প্ৰত্যাহ্বানৰ সৃষ্টি কৰিছে। মই প্ৰতিযোগিতামূলক যুঁজলৈ ঘূৰি আহিবলৈ কঠোৰ পৰিশ্ৰম কৰিছো। কিন্তু মই মোৰ শৰীৰৰ সামৰ্থ্য আৰু সীমাৰ বিষয়ে জ্ঞাত।”
“মই বিগত ২৪ বছৰত ১,৫০০ তকৈও অধিক মেচ খেলিছো। টেনিছে মোক সকলোখিনি দিছে আৰু এতিয়া মই মোৰ প্ৰতিযোগিতামূলক কেৰিয়াৰ কেতিয়া সমাপ্ত কৰিম, সেই সময় চিনাক্ত কৰিব লাগিব। অহা সপ্তাহত লণ্ডনত অনুষ্ঠিত হ’বলগীয়া লেভাৰ কাপ মোৰ অন্তিম এটিপি ইভেণ্ট হ’ব। মই অৱশ্যে ভৱিষ্যতে অধিক টেনিচ খেলিম, কিন্তু এইয়া গ্ৰেণ্ড শ্লেম বা পেচাদাৰী ভ্ৰমণত নহয়।”- ফেডাৰাৰে লগতে কয়।
উল্লেখ্য যে ফেডাৰাৰে ২০১৮ চনত অষ্ট্ৰেলিয়ান অপেনৰ ৰূপত নিজৰ কেৰিয়াৰৰ অন্তিম গ্ৰেণ্ড শ্লেম খিতাপ জয়ী হৈছিল। ২০১৯ চনত উইম্বলডনৰ ফাইনেলত উপনীত হৈছিল যদিও ছাৰ্বিয়াৰ তাৰকা নোভাক জকোভিচৰ হাতত পৰাজিত হৈছিল তাৰকাগৰাকী।
টেনিচ জগতত ২০ টা গ্ৰেণ্ড শ্লেম খিতাপ জয় কৰা ইতিহাসৰ প্ৰথমগৰাকী খেলুৱৈ হিচাপে পৰিগণিত হৈছিল ফেডাৰাৰ। অৱশ্যে পিছত নাডাল আৰু জ’কভিচে ফেডাৰাৰৰ এই ৰেক’ৰ্ড অতিক্ৰম কৰিবলৈ সক্ষম হয়।
‘গ্ৰাছ ক’ৰ্টৰ বাদশাহ’ হিচাপে জনাজাত ফেডাৰাৰে কেৰিয়াৰত অভিলেখ ৮ টা উইম্বলডন খিতাপ অৰ্জন কৰিছিল। সেইদৰে ৬ টা অষ্ট্ৰেলিয়ান অপেন, ৫ টা ইউএছ অপেন আৰু ২০০৯ চনত একমাত্ৰ ফ্ৰেন্স অপেন খিতাপ দখল কৰিছিল তাৰকাগৰাকীয়ে।
