ক্ৰিকেটৰ দুনিয়াত ‘খ্যাতিহীন’ নেপালৰ কিশোৰে ভাঙিলে শচীনৰ ২৯ বছৰীয়া অভিলেখ
ক্ৰিকেটৰ দুনিয়াত খ্যাতিহীন নেপালৰ এজন কিশোৰে মাষ্টাৰ ব্লাষ্টাৰ শচীন তেণ্ডুলকাৰৰ ২৯ বছৰীয়া এটা অভিলেখ ভংগ কৰি বিৰল কৃতিত্ব আৰ্জিছে। বৰ্তমান সংযুক্ত আৰব এমিৰেটছ ভ্ৰমণত থকা নেপাল ক্ৰিকেট দলটোৰ এই সদস্যজনৰ নাম ৰোহিত পৌডেল।
ৰোহিতে তিনিখন মেচৰ এদিনীয়া শৃংখলাটোৰ আজি অনুষ্ঠিত দ্বিতীয় খেলখনত সংযুক্ত আৰব এমিৰেটছৰ বিৰুদ্ধে ৫৫ ৰান কৰে, যিটো আছিল দলটোৰ কোনো এজন বেটছমেনৰ সৰ্বোচ্চ ব্যক্তিগত স্ক’ৰ। আৰু ইয়াৰ জৰিয়তেই তেওঁ শচীন তেণ্ডুলকাৰে আজিৰ পৰা প্ৰায় ২৯ বছৰ পূৰ্বে আটাইতকৈ কম বয়সত আন্তঃৰাষ্ট্ৰীয় ক্ৰিকেটত অৰ্ধশতক কৰাৰ যি অভিলেখ ৰচিছিল, সেয়া ভংগ কৰে।
শচীনে সেই অভিলেখ ১৬ বছৰ ২১৩ দিন বয়সত কৰিছিল পাকিস্তানৰ বিৰুদ্ধে হোৱা এখন টেষ্টত। ৰোহিতৰ আজিৰ তাৰিখত বয়স হ’ল ১৬ বছৰ ১৪৬ দিন।
ৰোহিতৰ অভিলেখৰ বিষয়ে আন্তঃৰাষ্ট্ৰীয় ক্ৰিকেট পৰিষদেও ইয়াৰ নিজৰ টুইটত উল্লেখ কৰে।
At the age of just 16 years and 146 days, Nepal's Rohit Paudel today became the youngest man to hit an international half-century, beating the likes of @sachin_rt and @SAfridiOfficial! 🇳🇵 🙌
➡️ https://t.co/lRo5UTfuFd pic.twitter.com/qsqZQDYX5y
— ICC (@ICC) January 26, 2019
৭ নম্বৰত বেট ধৰিবলৈ অহা ১৬ বছৰীয়া কিশোৰ ৰোহিতে তেওঁৰ ৫৫ ৰান ৫৮টা বল খেলি সংগ্ৰহ কৰে আৰু দলক এটা সন্তোষজনক স্ক’ৰ (২৪৯/৯) থিয় কৰাত সহায় কৰে। প্ৰত্যুত্তৰত সংযুক্ত আৰব এমিৰেটছে মাত্ৰ ১৯ অ’ভাৰ আৰু তিনিটা বল খেলি ৯৭ ৰানতে আটাইকেইটা উইকেট হেৰুৱায়।
যোৱা বছৰ মাত্ৰ ৰোহিতে আন্তঃৰাষ্ট্ৰীয় খেলত ভৰি দিছিল। তেতিয়া তেওঁৰ বয়স আছিল ১৫ বছৰ আৰু ৩৩৫ দিন আৰু সেইদৰে তেওঁ বিশ্বৰ চতুৰ্থজন কনিষ্ঠতম আন্তঃৰাষ্ট্ৰীয় ক্ৰিকেটাৰত পৰিণত হয়।