নাগৰিকত্ব বিধেয়কৰ বিৰুদ্ধে জাগি উঠা মিজো ৰাইজৰ সৰ্বাত্মক গণৰাজ্য দিৱস বৰ্জনৰ ফলত শনিবাৰে আইজলৰ চৰকাৰী কাৰ্য্যসূচীত এজনো সাধাৰণ নাগৰিক উপস্থিত নথকা সভাকে সম্বোধন কৰিব লগা হয় ৰাজ্যপাল কুম্মানাম ৰাজাশেখৰনে।
খোদ আৰক্ষীৰ ভাষ্য অনুসৰিয়ে চৰকাৰ, প্ৰশাসন আৰু নিৰাপত্তাৰক্ষীৰ বাহিৰে অনুষ্ঠানটোত উপস্থিত নাছিল এজনো সাধাৰণ নাগৰিক।
ৰাজধানী চহৰখনত কেন্দ্ৰীয় চৰকাৰী কাৰ্য্যসূচীত ভাগ নোলোৱা প্ৰতিবাদী মিজো ৰাইজে অনুষ্ঠানটোৰ প্ৰৱেশ পথৰ লগতে সমগ্ৰ পথচোৱাত সংগঠিত হৈ বিধেয়ক বাতিলৰ দাবী জনায়।
ৰাজধানী আইজলেই নহয়, গোটেই ৰাজ্যখনতে গণৰাজ্য দিৱসৰ কাৰ্য্যসূচী বৰ্জন কৰে মিজো জনসাধাৰণে।
সকলো মিজো নাগৰিক আৰু ছাত্ৰ সংগঠনৰ সমন্বয় সমিতি এন জি অ’ ক’-অৰ্দিনে’চন কমিতিয়ে এই বৰ্জন আহ্বান কৰিছিল। অতি প্ৰভাৱশালী মিজো জাতীয় ছাত্ৰ সংগঠন এম জেদ পি (MZP)কে ধৰি সকলো মিজো সংগঠন এই সমন্বয় সমিতিৰ অন্তৰ্ভুক্ত।
লগতে পঢ়ক– লালদেংগাক সোঁৱৰাই কেন্দ্ৰক সকীয়নি সহস্ৰ বিক্ষুব্ধ মিজো শিক্ষাৰ্থীৰ
লগতে পঢ়ক– ভাৰতক বিদায়, চীনক হেল্ল’ মিজো ছাত্ৰ-ছাত্ৰীৰ
“গণৰাজ্য দিৱস বৰ্জন আমাৰ প্ৰাৰম্ভিক কাৰ্য্যসূচীহে। বিধেয়কখন গৃহীত হ’লে আমি সৱ একেলগে বহিম আৰু আমাৰ পৰৱৰ্তী কাৰ্য্যপন্থা নিৰূপণ কৰিম,” নৰ্থ ইষ্ট নাও-ক জনায় য়াং মিজো এছ’চিয়ে’চনৰ সভাপতি ৱানলালৰুৱাতাই।
বিধেয়ক বাতিল নহ’লে মিজোৰামৰ স্বাধীনতাৰ দাবী উত্থাপিত হ’ব বুলি শেহতীয়াকৈ ঘোষণা কৰিছিল এম জেদ পিৰ সভাপতি ৰামদিনলিয়ানা ৰেন্থলেই।
বিধেয়কৰ বিৰুদ্ধে যোৱা ২৩ জানুৱাৰিত হোৱা মিজো ছাত্ৰ-ছাত্ৰীৰ অভূতপূৰ্ব জাগৰণত এই ঘোষণা কৰিছিল ছাত্ৰ নেতাজনে।
মিজো ৰাইজৰ প্ৰতিবাদৰ বিপৰীতে ৰাজ্যপালে নিজৰ ভাষণত মিজোৰামৰ সুৰক্ষাৰ কথা দোহাৰে।
