বৰছলাত সন্ত্ৰাস চলাই অহা বাঘিনীক ট্ৰেংকুলাইজ বন বিভাগৰ
বিগত কিছুদিন ধৰি বৰছলাৰ পানবাৰী গাঁৱত সন্ত্ৰাস চলাই অহা এটা ঢেকীয়াপতীয়া বাঘিনীক আজি ওদালগুৰি জিলাৰ অন্তৰ্গত গৰিয়াপথাৰত বন বিভাগে ট্ৰেংকুলাইজ কৰে। বিভাগীয় চিকিৎসক ৰিংকু গোহাঁইৰ নেতৃত্বত যোৱা এটা দলে বাঘিনীটোক ট্ৰেংকুলাইজ কৰিবলৈ সক্ষম হয়।
ট্ৰেংকুলাইজ কৰা বাঘিনীটোক চিৰিয়াখানালৈ প্ৰেৰণ কৰা হৈছে বুলি ওৰাং ৰাষ্ট্ৰীয় উদ্যানৰ বন বিষয়া ৰমেশ গগৈয়ে জানিবলৈ দিয়ে।
বিশাল আকাৰৰ ঢেকীয়াপতীয়া বাঘিনীটোৱে গাঁওখনৰ চৰণীয়া পথাৰত বিচৰণ কৰি থকা দেখি স্থানীয় ৰাইজৰ মাজত হুৱা-দুৱা লাগে। বন বিভাগৰ কৰ্মচাৰীসকল ঘটনাস্থলীত উপস্থিত হৈ বাঘিনীটোক কৰায়ত্ত কৰিবলৈ চেষ্টা কৰে। অৱশেষত ৰিংকু গগৈয়ে দুবাৰ চেষ্টা কৰি দুপৰীয়া ২ বজাত বাঘটোক ট্ৰেংকুলাইজ কৰিবলৈ সক্ষম হয়।
আনহাতে, বন বিষয়া ৰামেশ গগৈয়ে কয় যে বাঘিনীটোৱে ওৰাং ৰাষ্ট্ৰীয় উদ্যানৰ পৰা ওলাই আহিছিল। মাজে সময়ে ৰাষ্ট্ৰীয় উদ্যানখনৰ পৰা এনেদৰে বনৰীয়া জীৱ-জন্তু ওচৰ চুবুৰীয়া গাঁৱলৈ ওলাই আহে যদিও জনসাধাৰণৰ কোনো ধৰণৰ ক্ষতি নকৰে বুলি গগৈয়ে মন্তব্য কৰে।
বাঘিনীটোক দেখি স্থানীয় জনসাধাৰণে শিলগুটি নিক্ষেপ কৰাৰ ফলত বাঘিনীটোৱে চকু আৰু শৰীৰত আঘাত পাই যাৰবাবে বাঘিনীটোক চিকিৎসা প্ৰদান কৰি থকা হৈছে বুলি বন বিভাগে জনাইছে।