বিৰাট কোহলী পুনৰ নেতৃত্বলৈ উভতি আহিল। পুনৰ জয়ৰ পথলৈ উভতিল ৰয়েল চেলেঞ্জাৰছ বাংগালুৰু। বৃহস্পতিবাৰে বিয়লিৰ খেলখনত ঘৰুৱা খেলপথাৰত পাঞ্জাব কিংছক ২৪ ৰানত পৰাস্ত কৰে ডু প্লেছিছ বাহিনীয়ে। প্ৰথমে বেটিং কৰি আৰ চি বিয়ে ৪টা উইকেট হেৰুৱাই ১৭৪ ৰান সংগ্ৰহ কৰে। ইয়াৰ উত্তৰত পঞ্জাব ১৮.২ অভাৰত ১৫০ ৰান সংগ্ৰহ কৰি অল আউট হয়।
আচৰিত কথা। কোহলীয়ে ছেম কৰনৰ সৈতে টছ কৰিবলৈ আহিছিল। পিছত জনা যায় যে আজিৰ দিনটোত ফাফ ডু প্লেছিছ ইমপেক্ট প্লেয়াৰ হ’ব। কিন্তু ৰান ৰেটত ইয়াৰ কোনো প্ৰভাৱ পৰা নাছিল। বিৰাট কোহলী আৰু ফাফ ডু প্লেছিছ আছিল দুৰ্দান্ত। আগৰ মেচত য’ত ৰৈছিল তাৰ পৰাই আৰম্ভণি কৰিছিল।
দুয়োজন অ’পেনাৰেই অৰ্ধশতক কৰে। তেওঁলোকৰ মাজত ডু প্লেছিছ অধিক আক্ৰমণাত্মক আছিল। বাংগালুৰুৰ নেতৃত্ববহনকাৰী খেলুৱৈজনে ৫৬টা বলত ৮৪ ৰান সংগ্ৰহ কৰে। ইয়াত ৫টা ছয় আৰু ৫টা চাৰিটা আছিল।
অ’পেনিং যুটিটোৱে ১৩৭ ৰান সংযোজন কৰে। ১৬.১ অভাৰত প্ৰথমটো উইকেট হেৰুৱায়আৰ চি বিয়ে। বিৰাট কোহলীয়ে ৪৭টা বলত ৫৯ ৰান সংগ্ৰহ কৰি উভতি আহে। পূৰ্বৰ মেচখনত তাণ্ডৱ সৃষ্টি কৰা গ্লেন মেক্সৱেলে প্ৰথম বলতে শূন্য ৰাণেৰে উভতি যায়।
দীনেশ কাৰ্তিক (৭) নট আউট। বিৰাট আৰু ডু’প্লেছিছৰ বাহিৰে আৰচিবিৰ কোনো বেটছমেনে ৰান লাভ কৰা নাই। প্ৰতিখন মেচতে অ’পেনিং যুটীটোৱে খেল ধৰি ৰাখিছে। তেওঁলোকে বিফল হ’লে এতিয়াও বাংগালুৰুৰ হাতত কোনো বিকল্প নাই। অৱশ্যে দিনটোৰ জয়ৰ সৈতে আৰ চি বিয়ে পঞ্চম স্থানলৈ উঠি আহিল।
ৰান অতিক্ৰমৰ লক্ষ্য আগত লৈ পঞ্জাৱৰ ইনিংছ তাচ পাতৰ দৰে খহি পৰিল। শিখৰ ধাৱনে খেলা নাছিল। তেওঁৰ ঠাইত অথৰ্ব টাইডে অ’পেন কৰে। কিন্তু মাত্ৰ ৪ ৰানতে উভতি যায়। ৪৩ ৰানত ৪ উইকেট হেৰুৱায় পঞ্জাবে। ইয়াৰ পৰা আৰু ঘূৰি উঠিব পৰা নাছিল। প্ৰভাসিমৰন সিঙে অকলে যুঁজ দিছিল। অ’পেনিঙত নামি তেওঁ ৩০টা বলত ৪৬ ৰান সংগ্ৰহ কৰে। ইয়াত ৪টা চাৰি আৰু ৩টা ছয় আছিল।
মেথিউ শ্বৰ্ট (৮), লিয়াম লিভিংষ্টনে (২), ছেম কেৰনে (১০) ৰান নাপালে। শেষত বহু চেষ্টা কৰিছিল জিতেশ শৰ্মাই। তেওঁ ২৭টা বলত ৪১ ৰান সংগ্ৰহ কৰে। কিন্তু উইকেটৰ সিটো মূৰত যুটীৰ অভাৱত জীতেশে দলটোক জয় কৰাৰ সুযোগ নাপালে। শেষত আক্ৰমণাত্মক হ’বলৈ গৈ আউট হয়।
মহম্মদ ছিৰাজে ৪ অভাৰত ২১ ৰান দি ৪ টা উইকেট দখল কৰে। আই পি এলত এয়া তেওঁৰ শ্ৰেষ্ঠ বলিং গড়।
