মাটিৰ পট্টা দিয়াৰ চল লৈ ভোটৰ অংকৰে প্ৰধান মন্ত্ৰী নৰেন্দ্ৰ মোদী শিৱসাগৰলৈ আহিছিল বুলি দাবী কৰিছে প্ৰাক্তন বিজেপি সাংসদ তথা ন-কংগ্ৰেছী নেতা ৰাম প্ৰসাদ শৰ্মাই।
তেওঁ কয় ‘মোদীয়ে যাতে এখন ঐতিহাসিক ঠাইত আহি পুনৰ মিছা প্ৰতিশ্ৰুতি দি নাযায় বা আঁভুৱা ভাৰি ভোট লোৱা বুদ্ধি নকৰে। মাটিৰ অধিকাৰ থাকে ৰাজ্য চৰকাৰৰ হাতত, এইক্ষেত্ৰত কেন্দ্ৰৰ কোনো অধিকাৰ নাই।‘
‘ভাৰতৰ ইতিহাসত প্ৰথমবাৰলৈ প্ৰধান মন্ত্ৰী আহি মাটিৰ পট্টা বিলাইছে। মুখ্যমন্ত্ৰী বা ৰাজ্য চৰকাৰৰ ৰাজহ মন্ত্ৰীয়ে ভূমিৰ পট্টা প্ৰদান কৰিব পাৰে। কিন্তু তেওঁ ৰাজনৈতিক তথা ভোটৰ অংকত অসমলৈ আহিছে।‘ শৰ্মাই মোদীৰ অসম ভ্ৰমণৰ কাৰণ বাখ্যা কৰি কয়।
ইপিনে, ১৬ মে’ৰ পাছত বাংলাদেশীয়ে টালি-টোপোলা লৈ যাব লাগিব বুলি কোৱা প্ৰধানমন্ত্ৰীয়ে এইবাৰো মিছা প্ৰতিশ্ৰুতিৰ টোপোলা ৰাইজলৈ দলিয়াই গ’ল বুলি শৰ্মাই আমাৰ সাংবাদিকৰ আগত কয়।
তেওঁ লগতে কয় ‘মানুহে পূৰ্বতে ভুল গৈছিল মোদীৰ কথাত। পৰিৱৰ্তনৰ হেঁপাহৰে মানুহে বিজেপিক ভোট দিছিল। কিন্তু এতিয়া আঁভুৱাভাঁৰা প্ৰতিশ্ৰুতিৰ পৰা এতিয়া মানুহে পৰিত্ৰাণ বিচাৰিছে।‘
ইয়াৰোপৰি, বিজেপিয়ে দিয়া এটাও প্ৰতিশ্ৰুতি বিজেপিয়ে পালন নকৰিলে বুলি উল্লেখ কৰি শৰ্মাই লগতে কয় ‘মাজুলীৰ দলং, টুইন টাৱাৰ, এক্সপ্ৰেছ হাইৱে সপোন হৈয়ে থাকিল। আনকি চাৰিলাইন যুক্ত ৰাষ্ট্ৰীয় ঘাইপথ নিৰ্মাণৰ কাম বিজেপিয়ে সম্পূৰ্ণ কৰিব নোৱাৰিলে।‘
২০২১ ত ৰাইজক সেয়েহে ভাবি-চিন্তি ভোট দিবলৈ শৰ্মাই অনুৰোধ জনাই লগতে কয় ‘চীনৰ পৰা সামগ্ৰী ক্ৰয় কৰি মেড ইন ইণ্ডিয়া ষ্টাম্প মৰাত মোদী চৰকাৰ ওস্তাদ।‘
