চলিত বৰ্ষৰ ২ মে’ৰ দিনা দিচপুৰ থানাত প্ৰাক্তন মুখ্য সচিব ভি কে পিপাৰ চেনিয়াৰ বিৰুদ্ধে আৰ টি আই কৰ্মী দুলাল বৰাই সাৰদা কেলেংকাৰীৰ ফাইল লুকুৱাই ৰখাক লৈ এক গোচৰ ৰুজু কৰিছিল ১১৮৮/১৮ নং এক নম্বৰত।
কিন্তু পাঁচ মাহ উকলি যোৱাৰ পাছতো বৰ্তমানলৈকে প্ৰাক্তন মুখ্য সচিবৰ বিৰুদ্ধে কোনোধৰণৰ তদন্ত আৰম্ভ নকৰাৰ অভিযোগ তুলি আজি মুখ্য ন্যায়িক দণ্ডাধীশৰ কাষ চাপে আৰ টি আই কৰ্মী দুলাল বৰা।
উল্লেখযোগ্য যে পিপাৰচেনিয়াই চলিত বৰ্ষৰ ২৮ ফেব্ৰুৱাৰিত অৱসৰ গ্ৰহণ কৰাৰ দিনটোতে সেই ফাইলটো বিচাৰি পোৱা হৈছিল বুলি বৰাই ৩০ মে’ত দিচপুৰ প্ৰেছ ক্লাবত সম্বোধন কৰা এখন সংবাদমেলত সদৰী কৰিছিল।
তেওঁ লগতে কৈছিল যে পিপাৰচেনিয়াই চাকৰিৰ পৰা অৱসৰ লোৱা দিনাই ফাইলটো উদ্ধাৰ হয় বুলি মুখ্য সচিবৰ বিষয়াই মুখ্য তথ্য আয়ুক্তৰ কাৰ্য্যালয়লৈ প্ৰেৰণ কৰা শপতনামাত উল্লেখ আছে।
সেয়েহে দুবছৰ ধৰি ফাইল লুকুৱাই ৰখাৰ অভিযোগ তুলি আৰ টি আই কৰ্মীগৰাকীয়ে দিচপুৰ থানাত গোচৰ দিছিল বুলি নৰ্থ ইষ্ট নাওক আজি জানিবলৈ দিয়ে দুলাল বৰাই। তেওঁ লগতে কয় ‘৫ মাহ ওকলি যোৱাৰ পাছতো দিচপুৰ আৰক্ষীয়ে অভিযুক্ত পিপাৰচেনিয়াৰ বিৰুদ্ধে ৰাজনৈতিক মুনাফাৰ স্বাৰ্থত কোনো তদন্তই আৰম্ভ নকৰাৰ বাবে আজি আদালতৰ দ্বাৰস্থ হ’বলৈ বাধ্য হ’লো।‘
তাৰোপৰি আৰ টি আই কৰ্মী বৰাই মুখ্য দণ্ডাধীশ আদালতে দিচপুৰ থানাৰ ভাৰপ্ৰাপ্ত আৰক্ষী বিষয়া গৰাকীক এমাহৰ ভিতৰত তেওঁ ৰুজু কৰা গোচৰৰ দিচপুৰ আৰক্ষীয়ে তদন্ত প্ৰক্ৰিয়া কিমান দূৰ আগবঢ়াইছে তাৰ শপতনামা দাখিল কৰিবলৈ নিৰ্দেশ দিছে বুলি জানিবলৈ দিয়ে।
আনহাতে আৰ টি আই কৰ্মী বৰাই তথ্য বিভাগৰ মুখ্য আয়ুক্তই যোৱা ৮ অক্টোবৰত প্ৰদান কৰা ৰায়ৰ প্ৰতিলিপি এসপ্তাহৰ ভিতৰত প্ৰদান কৰিবৰ বাবে অনুৰোধ জনাই ৰাজ্যৰ মুখ্য মন্ত্ৰী, মুখ্য সচিব আৰু কৰ্মচাৰী বিভাগৰ সচিবলৈ আজি এখন চিঠি প্ৰেৰণ কৰে।
ইফালে ৰায়ৰ প্ৰতিলিপি প্ৰদান নকৰিলে এই সন্দৰ্ভত উচ্চ ন্যায়ালয়ৰ দ্বাৰস্থ হৈ গোচৰ ৰুজু কৰিব বুলি হুংকাৰ দিয়ে আৰ টি আই কৰ্মী বৰাই।
