চৌদিশে নিৰ্বাচনী বতাহ। সকলো ব্যস্ত নিৰ্বাচনী প্ৰচাৰত। সোমবাৰে টীয়কৰ মুদৈজান ভৰলুৱা গাঁৱত ৰাজৈ বাদুলীপুখুৰী পঞ্চায়তৰ অধীনত কংগ্ৰেছ দলৰ এখন নিৰ্বাচনী সভাত প্ৰাৰ্থী পল্লবী গগৈৰ হৈ প্ৰচাৰ চলায় মৰিয়নিৰ কংগ্ৰেছ বিধায়ক ৰূপজ্যোতি কুৰ্মীয়ে।
বিজেপিক ভোঁট জলকীয়াতকৈও জলা বুলি আখ্যা দিয়ে মৰিয়নিৰ কংগ্ৰেছী বিধায়কগৰাকীয়ে।
নিজৰ সমষ্টিত নিৰ্বাচনী প্ৰচাৰৰ ব্যস্ততাৰ মাজতে নিকটতম টীয়ক সমষ্টিৰ উক্ত নিৰ্বাচনী সভাত উপস্থিত হৈ কুৰ্মীয়ে বিজেপি চৰকাৰৰ মিথ্যাচাৰ, ভ্ৰষ্টাচাৰক সমালোচনা কৰি দুখীয়াৰ দুখ বুজা তথা দেশ আৰু জাতি ৰক্ষাৰ স্বাৰ্থত কংগ্ৰেছৰ পক্ষত ভোট দিবলৈ আহ্বান জনায়।
তেওঁ লগতে চৰকাৰী আঁচনিত ভোল নগৈ প্ৰকৃত উন্নয়ন কোনে কৰিব তাক অনুধাৱন কৰি অহা ২৭ মাৰ্চত সকলোকে ভোটাধিকাৰ সাব্যস্ত কৰি পল্লবী গগৈক বিপুল ভোটত জয়যুক্ত কৰাবলৈ ৰাইজক আহ্বান জনায়।
ইপিনে সভাৰ অন্তত কুৰ্মীয়ে পল্লবী গগৈক লগত লৈ ঝুমুৰ নৃত্য কৰাৰ লগতে অহা ২২ মে’ত চৰকাৰ গঠন কৰি পুনৰ নৃত্য কৰি বিজয় উল্লাস কৰিব বুলি মন্তব্য কৰে।
