ৰাছিয়া–ইউক্ৰেইন যুদ্ধ সমাপ্তিৰ প্ৰস্তাৱ: ডনবাছ আৰু পাৰমাণৱিক কেন্দ্ৰক লৈ মতবিৰোধ অব্যাহত

ৰাছিয়াৰ সৈতে চলি থকা প্ৰায় চাৰি বছৰীয়া যুদ্ধৰ অন্ত পেলোৱাৰ পৰিকল্পনাত আমেৰিকা আৰু ইউক্ৰেইন কেইবাটাও গুৰুত্বপূৰ্ণ বিষয়ত সহমতত উপনীত হৈছে। অৱশ্যে, পূব ইউক্ৰেইনৰ ভূখণ্ড আৰু এটা গুৰুত্বপূৰ্ণ পাৰমাণৱিক শক্তি কেন্দ্ৰৰ (Nuclear Power Plant) নিয়ন্ত্ৰণক লৈ এতিয়াও বিবাদ অব্যাহত আছে। ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিয়ে প্ৰস্তাৱিত ২০ দফীয়া এই পৰিকল্পনাৰ সবিশেষ ৰাজহুৱা কৰি কয় যে ইয়াত ইউক্ৰেইনৰ নিৰাপত্তা নিশ্চিত কৰা আৰু অৰ্থনৈতিক পুনৰুত্থান ত্বৰান্বিত কৰাৰ ব্যৱস্থা অন্তৰ্ভুক্ত কৰা হৈছে।

ফ্ল’ৰিডাত অনুষ্ঠিত হোৱা দীঘলীয়া আলোচনাৰ অন্তত এই পৰিকল্পনা প্ৰস্তুত কৰা হৈছে আৰু অতি শীঘ্ৰেই ইয়াক ৰাছিয়াৰ ওচৰত উপস্থাপন কৰাৰ সম্ভাৱনা আছে। জেলেনস্কিৰ মতে, এই প্ৰস্তাৱৰ অধিকাংশ দফাই ইউক্ৰেইনৰ মূল দাবী আৰু লক্ষ্যৰ সৈতে সংগতিপূৰ্ণ। ইয়াত বিশেষকৈ সুৰক্ষা নিশ্চয়তা, বিনিয়োগ বৃদ্ধি আৰু যুদ্ধোত্তৰ অৰ্থনৈতিক স্থিতিশীলতাৰ ওপৰত বিশেষ গুৰুত্ব প্ৰদান কৰা হৈছে।

তথাপিও, কিছুমান স্পৰ্শকাতৰ বিষয়ত এতিয়াও অমীমাংসিত হৈ আছে। আটাইতকৈ ডাঙৰ বিতৰ্কটো ইউক্ৰেইনৰ পূবাঞ্চলৰ ডনবাছ (Donbas) অঞ্চলক লৈ সৃষ্টি হৈছে। ৰাছিয়াই বৰ্তমান ডনেটস্কৰ প্ৰায় ৭০ শতাংশ আৰু লুহানস্কৰ অধিকাংশ অংশ নিজৰ নিয়ন্ত্ৰণত ৰাখিছে আৰু এই ভূখণ্ড ইউক্ৰেইনে স্থায়ীভাৱে ত্যাগ কৰাটো বিচাৰিছে। ইউক্ৰেইনে ৰাছিয়াৰ এই দাবীক স্পষ্টভাৱে নাকচ কৰিছে। জেলেনস্কিয়ে এই ভূখণ্ডৰ বিবাদক শান্তি আলোচনাৰ আটাইতকৈ জটিল অংশ বুলি অভিহিত কৰিছে।

সম্ভাৱ্য আপোচ হিচাপে আমেৰিকাই এই অঞ্চলসমূহক ‘মুক্ত অৰ্থনৈতিক অঞ্চল’ হিচাপে গঢ়ি তোলাৰ প্ৰস্তাৱ আগবঢ়াইছে। ইয়াৰ বিপৰীতে ইউক্ৰেইনে স্থানীয় জনগণৰ মাজত গণভোট, সংশ্লিষ্ট অঞ্চলৰ নিৰাপত্তা বাহিনী প্ৰত্যাহাৰ কৰা আৰু নিৰাপত্তাৰ বাবে আন্তঃৰাষ্ট্ৰীয় শান্তিৰক্ষী বাহিনী মোতায়েনৰ দাবী উত্থাপন কৰিছে।

তদুপৰি ইউৰোপৰ সৰ্ববৃহৎ জাপোৰিজ্জিয়া (Zaporizhzhia) পাৰমাণৱিক শক্তি কেন্দ্ৰৰ নিয়ন্ত্ৰণো এক গুৰুত্বপূৰ্ণ বিবাদৰ বিষয় হৈ আছে। এই সকলো দিশত চূড়ান্ত সিদ্ধান্ত ল’বলৈ আগন্তুক দিনত ৰাজনৈতিক নেতৃত্বৰ উচ্চস্তৰীয় আলোচনা অত্যন্ত গুৰুত্বপূৰ্ণ বুলি পৰ্যবেক্ষকসকলে মত প্ৰকাশ কৰিছে।