শেহতীয়াকৈ প্ৰকাশ পোৱা এটা বৃহৎ পৰিসৰৰ গৱেষণা পত্ৰত ভাৰতত বৃদ্ধি পোৱা মুখৰ কৰ্কট ৰোগৰ এক ভয়ংকৰ তথ্য পোহৰলৈ আহিছে। বুধবাৰে প্ৰকাশিত এই অধ্যয়নটোত কোৱা হৈছে যে ভাৰতত প্ৰতি ১০ জন মুখৰ কৰ্কট ৰোগীৰ ভিতৰত ৬ জনেই সঘনাই সুৰা সেৱন আৰু ধোঁৱাবিহীন ধঁপাত যেনে গুটখা, খাইনি বা পান মচলা সেৱন কৰাৰ ফলত এই ৰোগত আক্ৰান্ত হৈছে। মহাৰাষ্ট্ৰৰ চেণ্টাৰ ফৰ কেন্সাৰ এপিডেমিঅ’লজী আৰু হোমি ভাভা নেশ্যনেল ইনষ্টিটিউটৰ গৱেষকসকলে চলোৱা এই অধ্যয়নত দেখা গৈছে যে ধঁপাতৰ সৈতে সুৰাৰ সংমিশ্ৰণে মানুহৰ মুখৰ ভিতৰৰ অংশত হোৱা কৰ্কট ৰোগৰ সম্ভাৱনা বহুগুণে বৃদ্ধি কৰে।
অধ্যয়নটোত এটা বিশেষ সতৰ্কবাণী দিয়া হৈছে যে অতি কম পৰিমাণৰ সুৰা সেৱনো শৰীৰৰ বাবে বিপদজনক হ’ব পাৰে। গৱেষকসকলৰ মতে, দিনটোত মাত্ৰ ২ গ্ৰামতকৈ কম সুৰা বা বিয়েৰ খালেও মুখৰ ভিতৰৰ আৱৰণীৰ কৰ্কট ৰোগৰ আশংকা বাঢ়ি যায়। আনহাতে, দিনে ৯ গ্ৰাম বা এটা সাধাৰণ পেগৰ সমতুল্য সুৰা সেৱন কৰিলে এই কৰ্কট ৰোগৰ সম্ভাৱনা ৫০ শতাংশ পৰ্যন্ত বৃদ্ধি পাব পাৰে। ভাৰতৰ বিভিন্ন ৰাজ্যৰ ভিতৰত মেঘালয়, অসম আৰু মধ্যপ্ৰদেশত সুৰাৰ কাৰণে হোৱা এনে কৰ্কট ৰোগৰ প্ৰাদুৰ্ভাৱ অধিক দেখা গৈছে। অৰুণাচল প্ৰদেশত সুৰা সেৱনৰ হাৰ সৰ্বাধিক হোৱাৰ বিপৰীতে গুজৰাটত ইয়াৰ মাত্ৰা তুলনামূলকভাৱে যথেষ্ট কম।
তথ্য অনুসৰি ভাৰতত মুখৰ কৰ্কট ৰোগ বৰ্তমান দ্বিতীয় সৰ্বাধিক সাধাৰণ কৰ্কট ৰোগ হিচাপে থিয় দিছে। প্ৰতি বছৰে দেশখনত প্ৰায় ১.৪ লাখতকৈ অধিক লোক নতুনকৈ এই ৰোগত আক্ৰান্ত হয় আৰু প্ৰায় ৮০ হাজাৰ লোকে প্ৰাণ হেৰুৱাব লগা হয়। এই ৰোগৰ পৰা পৰিত্ৰাণ পোৱাৰ হাৰো খুবেই কম। গৱেষণাৰ বাবে ২০১০ চনৰ পৰা ২০২১ চনৰ ভিতৰত দেশৰ বিভিন্ন প্ৰান্তৰ পৰা হাজাৰ হাজাৰ লোকৰ তথ্য সংগ্ৰহ কৰা হৈছিল। ইয়াত দেখা গৈছে যে যিসকলে সুৰা সেৱন নকৰে, তেওঁলোকৰ তুলনাত সুৰা সেৱন কৰা লোকসকলৰ এই ৰোগ হোৱাৰ আশংকা ৬৮ শতাংশ বেছি। বিশেষকৈ থলুৱাভাৱে প্ৰস্তুত কৰা মদ বা দেশী মদ খোৱা লোকসকলৰ ক্ষেত্ৰত এই আশংকা ৮৭ শতাংশলৈ বৃদ্ধি পায়।
এই গৱেষণাত অংশ লোৱা লোকসকলৰ বেছিভাগেই ৩৫ ৰ পৰা ৫৪ বছৰ বয়সৰ আছিল। ইয়াৰ পৰা স্পষ্ট হৈছে যে দেশৰ কৰ্মক্ষম যুৱপ্ৰজন্ম এই মাৰাত্মক ৰোগৰ সহজ লক্ষ্য হৈ পৰিছে। গৱেষকসকলে মত প্ৰকাশ কৰিছে যে যদিহে সমাজৰ পৰা ধঁপাত আৰু সুৰা একেলগে সেৱন কৰা অভ্যাসটো সম্পূৰ্ণৰূপে বন্ধ কৰিব পৰা যায়, তেন্তে মুখৰ কৰ্কট ৰোগৰ হাৰ বহুখিনি হ্ৰাস পাব। জনসাধাৰণে সজাগ হৈ এই মাৰাত্মক নিচাজাতীয় দ্ৰব্যসমূহ ত্যাগ কৰিলেহে দেশত কৰ্কট ৰোগৰ এই ভয়াৱহতা ৰোধ কৰা সম্ভৱ হ’ব।
