পানীৰ মাজত বেছিসময় বাছি থাকিব নোৱাৰে কৰ’না ভাইৰাছ। ইমানদিনে কৈ অহা ধাৰণাক প্ৰায় নস্যাৎ কৰি এনে চাঞ্চল্যকৰ দাবী কৰিছে ৰাছিয়াৰ বিজ্ঞানীয়ে।
ৰাছিয়াৰ ষ্টেট ৰিচাৰ্ছ চেন্টাৰ অফ ভাইৰ’লজি এণ্ড বায়’টেকন’লজিৰ গৱেষণাত পোৱা গৈছে যে পানীত থাকিলে ২৪ ঘন্টাৰ ভিতৰতে ৯০শতাংশ কৰ’না ভাইৰাছ মৰি গৈছে।
সেয়া ৭২ঘন্টা পানীত থাকিলে ৯৯.৯৯শতাংশ কৰ’না ভাইৰাছৰ মৃত্যু হৈছে। সেইদৰে গৱেশকসকলে দাবী কৰা মতে উতলা পানীত সম্পূৰ্ণ ধ্বংস হৈছে ভাইৰাছটো।
শেহতীয়াভাৱে প্ৰকাশ পোৱা এই গৱেষণা অনুসৰি, ক্ল’ৰিণযুক্ত পানীত এই ভাইৰাছ দুৰ্বল হৈ পৰা বুলিও কোৱা হৈছে।
ৰাছিয়াৰ বিজ্ঞানীসকলে দাবী কৰা মতে সাগৰৰ পানীত কৰ’না ভাইৰাছ সম্পূৰ্ণ নিষ্ক্ৰিয় হৈ পৰে।
গৱেষকসকলে ইয়াৰ প্ৰমান হিচাপে উপকূলীয় অঞ্চলৰ সাগৰীয় পানীৰ উপৰি ছুইমিং পুল, ৱাটাৰ পাৰ্ক তথা খোৱা পানীৰ নমুনা পৰীক্ষা কৰি চাই ইয়াত কোনো সক্ৰিয় কোভিড সৃষ্টি কৰিব পৰা ভাইৰাছৰ অস্তিত্ব বিচাৰি পোৱা নাই।
তেওঁলোকে অৱশ্যে পানীত থকা উপাদান আৰু তাপমাত্ৰাৰ ওপৰত ভাইৰাছৰ অস্তিত্ব নিৰ্ভৰ কৰে বুলি জানিব দিয়ে।
কোৱা হৈছে যে পানীৰ মাজত ভাইৰাছ প্ৰৱেশ কৰাৰ পাছত তাৰ বৰ্তি থকাটো নিৰ্ভৰ কৰে পানীত থকা উপাদান আৰু তাপমাত্ৰাৰ ওপৰত। তাপমাত্ৰা বৃদ্ধি পালে ভাইৰাছ নিষ্ক্ৰিয় হৈ পৰে।
ৰাছিয়াত এই বিষয়ক লৈ বিস্তৃত গৱেষণা চলিছে। ইয়াৰ পূৰ্বে বিশ্ব স্বাস্থ্য সংস্থাই জানিবলৈ দিছিল যে ২০০৮চনৰ গৱেষণা অনুসৰি পানীৰ মাজত কৰ’না ভাইৰাছ কেইবা সপ্তাহো ধৰি সক্ৰিয় হৈ বৰ্তি থাকে।
বৰ্তমান ৰাছিয়াৰ গৱেষণাই এইক্ষেত্ৰত নতুন আশাৰ সঞ্চাৰ কৰিছে।
