এতিয়াও সেই ক্ৰান্তিকাৰী প্ৰতিভা ম্লান পৰা নাই! দেওবাৰে আন্তঃৰাষ্ট্ৰীয় মাষ্টাৰ্ছ লীগৰ ফাইনেলত শচীনৰ নেতৃত্বত ভাৰতে নিজৰ অনবদ্য প্ৰদৰ্শন দাঙি ধৰে। শচীন, আম্বাতি ৰায়ুডু, যুৱৰাজৰ দমনীয় ইনিংছৰ বাবে প্ৰায় বিধ্বস্ত হৈ পৰিল ব্রায়ান লাৰা নেতৃত্বাধীন ৱেষ্ট ইণ্ডিজ। শচীনৰ টীম ইণ্ডিয়া মাষ্টাৰ্ছ লীগত চেম্পিয়ন হয়।
২০০৭ চনত লাৰাই আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰাৰ বিপৰীতে শচীনে ২০১২ চনত অৱসৰ গ্ৰহণ কৰে। তথাপিও এটা সময় আছিল যেতিয়া এই দুই তাৰকাৰ বেটিং চাবলৈ গোটেই বিশ্ব উন্মুখ হৈ ৰৈছিল। আলোচনা আৰু সমালোচনাৰ বাবে বাতৰি কাকতৰ কিমান পৃষ্ঠা খৰচ হৈছে তাৰ হিচাপ নাই।
দুটা দশকৰো অধিক সময়ৰ পাছত মাষ্টাৰ্ছ লীগৰ ফাইনেলত মুখামুখি হয় বিশ্ব চেম্পিয়ন শচীন টেণ্ডুলকাৰ আৰু ব্রায়ান লাৰা৷ ৱেষ্ট ইণ্ডিজে টছত জয়লাভ কৰি ২০ অভাৰৰ এই উত্তেজনাপূৰ্ণ মেচখনত প্ৰথমে বেটিং কৰিবলৈ সিদ্ধান্ত লয়। লাৰাৰ দলটোৱে ২০ অভাৰত ৭ উইকেট হেৰুৱাই ১৪৮ ৰান সংগ্ৰহ কৰে।
লেণ্ডল ছিমনছ (৫৭) আৰু ড্ৱেইন স্মিথ (৪৫)ৰ বাহিৰে আন কোনোৱে ভাৰতীয় বলাৰৰ সন্মুখত তিষ্ঠিব নোৱাৰিলে। ৬ বলত ৬ ৰান কৰি আউট হয় ব্রায়ান লাৰা। ভাৰতৰ বিনয় কুমাৰে ৩টা উইকেট দখল কৰে। শ্বাহবাজ নাদীমে ২টা, ষ্টুয়াৰ্ট বিন্নি আৰু পৱন নেগীয়ে এটাকৈ উইকেট দখল কৰে।
ৱেষ্ট ইণ্ডিজৰ ১৪৮ ৰানৰ প্ৰত্যুত্তৰত আম্বাতি ৰায়ুডু আৰু শচীনে বেটিং কৰিবলৈ নামে। ১৮টা বলত ২৫ ৰান সংগ্ৰহ কৰি অষ্টম অভাৰত বিষ্টৰ হাতত ধৰা পৰে মাষ্টাৰ ব্লাষ্টাৰ। তাৰ পাছত ৰায়ডুৰ বেটৰ ওপৰত নিৰ্ভৰ কৰি ভাৰতে ১৭.১ অভাৰত ৬ টা উইকেট বাকী থকা অৱস্থাতে খেলখনত জয়ী হয়।
ৰায়ডুৱে ৫০টা বলত ৭৪ ৰান সংগ্ৰহ কৰি ১৫ নং অভাৰত আউট হৈছিল। তেতিয়ালৈকে অৱশ্যে মেচখনৰ ভাগ্য নিৰ্ণয় হৈ গৈছিল। বাকী কাম চম্ভালিছিল যুৱৰাজ সিং (১৩) আৰু ষ্টুয়াৰ্ট বিনি (১৬)য়ে। ইয়াৰ উপৰিও গুৰকিৰাট সিঙে ১২টা বলত ১৪ ৰান সংগ্ৰহ কৰে।
এচলে নাৰ্ছে ৱেষ্ট ইণ্ডিজৰ হৈ ২টা উইকেট দখল কৰে। ইয়াৰ উপৰিও চুলেইমান বেন আৰু টিনো বেষ্টে এটাকৈ উইকেট দখল কৰে।
