অসমৰ সনন্ত তাঁতি, ৰিতুৰাজ বসুমতাৰী আৰু লোকনাথ উপাধ্যায়লৈ ক্ৰমে অসমীয়া, বড়ো আৰু নেপালী ভাষাত ২০১৮ বৰ্ষৰ বাবে আগবঢ়োৱা হৈছে ভাৰতীয় সাহিত্যৰ বহুজন আকাংক্ষিত বিশেষ স্বীকৃতি সাহিত্য অকাদেমি বঁটা।
মণিপুৰী সাহিত্যৰ বাবে উত্তৰ-পূবৰ আন এগৰাকী লেখক মণিপুৰৰ বুধিচন্দ্ৰ হেইচনাম্বালৈও আগবঢ়োৱা হৈছে এই বঁটা।
তাঁতিক তেওঁৰ কাব্য ‘কাইলৈৰ দিনটো আমাৰ হ’ব’, বসুমতাৰীক গল্প পুথি ‘Dwngse Lama’ আৰু উপাধ্যায়ক ‘Kino Royeu Upamaa’ গল্প সংকলনৰ বাবে এই বঁটা আগবঢ়োৱা হৈছে।
বিদ্ৰোহী ভাবৰ কবিতাৰে জনাজাত হোৱা অসমীয়া কবি তাঁতিৰ জন্ম হৈছিল কৰিমগঞ্জ জিলাৰ কালিনগৰ চাহ বাগিচাত, ১৯৫২ চনত। তাঁতিৰ কবিতা প্ৰায়বোৰ ভাৰতীয় ভাষালৈ অনূদিত হৈছে। ‘উজ্জ্বল নক্ষত্ৰৰ সন্ধানত’ কাব্য সংকলনেৰে যাত্ৰা আৰম্ভ কৰা তাঁতিৰ কাব্য সংকলনৰ সংখ্যা ১০খনতকৈও অধিক।
সাহিত্য অকাদেমিৰ পূৰ্বে তাঁতিয়ে বৃহৎ চাহ কোম্পানি উইলিয়ামছন মেগৰৰ শৈক্ষিক ন্যাসে আগবঢ়োৱা অসম উপত্যকা সাহিত্য বঁটা গ্ৰহণ কৰিছিল। কেন্সাৰ ৰোগত আক্ৰান্ত হৈ বৰ্তমান নতুন দিল্লীত চিকিৎসাধীন হৈ থকা তাঁতি বৃত্তিত আছিল অসম চাহ কৰ্মচাৰী পি এফ সংস্থাৰ উপ আয়ুক্ত।
বড়ো সাহিত্যিক বসুমতাৰী অসমৰ কাৰ্বি আংলং জিলাৰ ডকমকাৰ লাংহিনৰ। একেখন গল্প সংকলনৰ বাবে তেওঁ পূৰ্বে গ্ৰহণ কৰিছিল বড়ো সাহিত্য সভাই আগবঢ়োৱা ২০১৬ বৰ্ষৰ সোমেশ্বৰী ব্ৰহ্ম সাহিত্য বঁটা।
নেপালী গল্প পুথিৰে সাহিত্য অকাদেমি বঁটা লাভ কৰা উপাধ্যায় অসমৰ ডিগবৈৰ লোক যদিও ১৪ বছৰ পূৰ্বে তেওঁ শিলিগুৰিত বসতি স্থাপন কৰিছে।
এই বঁটাত আছে নগদ ১ লাখ টকা, এখন স্বীকৃতি খোদিত তামৰ পত্ৰ আৰু এখন গাত লোৱা চাদৰ। অহা ২৯ জানুৱাৰিত নতুন দিল্লীত এক অনুষ্ঠানত এই সন্মানসমূহ বিতৰণ কৰিব সাহিত্য অকাদেমিয়ে।
অকাদেমি ভাৰত চৰকাৰে ১৯৫২ চনত গঠন কৰা এক ৰাষ্ট্ৰীয় সংস্থা। মুঠ ২৪টা ভাষাৰ সাহিত্যলৈ ২০১৮ বৰ্ষত এই বঁটাটো ঘোষণা কৰা হৈছে।
