নগাঁৱৰ পুৰণিগুদামত মঙলবাৰে নিশা আৰক্ষীয়ে এক জুৱা খেল বিৰোধী অভিযান চলায়।
পৱিত্ৰ ঈদৰ অচিলা লৈ পুৰণিগুদামৰ নিকটৱৰ্তি পুতনি গাঁৱত হোৱা জুৱা খেলৰ খবৰ লাভ কৰি চামগুৰি থানাৰ ভাৰপ্ৰাপ্ত আৰক্ষী বিষয়া জীৱন মাৰাকৰ নেতৃত্বত যোৱা এটা দলে বৃহৎ জুৱাৰ ঘাটি উৎখাত কৰিবলৈ সক্ষম হয়।
আৰক্ষীৰ দলটোৱে চলোৱা অভিযান কালত ভালে সংখ্যক জুৱা খেলৰ সামগ্ৰী জব্দ কৰিবলৈ সক্ষম হ’ল যদিও আন্ধাৰৰ সুযোগ লৈ ধনসহ একাধিক অসাধু জুৱাৰী পলাই যায়।
উল্লেখ্য যে, দীৰ্ঘদিন ধৰি পুৰণিগুদাম পুতনি অঞ্চলটোত কেইবাটাও স্থানত জুৱাৰ বৃহৎ ঘাটি স্থাপন কৰি এটা অসাধু চক্ৰই সামাজিক পৰিৱেশ বিনষ্ট কৰি অহাৰ অভিযোগ উত্থাপন হৈ আহিছিল।
বিভিন্ন সময়ত স্থানীয় ৰাইজে এই সন্দৰ্ভত অভিযোগো দি আহিছিল আৰক্ষী তথা প্ৰশাসনক আৰু ইয়াৰ ওপৰত ভিত্তি কৰিয়ে চামগুৰি আৰক্ষীয়ে মঙলবাৰে নিশা জুৱা খেলৰ বিৰুদ্ধে এই অভিযানটো চলায়।
এই অভিযানৰ বাবে চামগুৰি আৰক্ষীক ধন্যবাদ জনাইছে স্থানীয় সচেতন মহলে।