ইউক্ৰেইন যুদ্ধই ইতিমধ্যে তিনি সপ্তাহত ভৰি দিছে। অদ্যপি অব্যাহত আছে ৰাছিয়ান সেনাৰ আক্ৰমণ।
যুদ্ধৰ ফলশ্ৰুতিতে ৰাছিয়া মুখামুখি হ’ব লগা হৈছে অৰ্থনৈতিক নিষেধাজ্ঞাৰ। এই নিষেধাজ্ঞা জাৰি কৰিছে আমেৰিকা যুক্তৰাষ্ট্ৰ, ইউৰোপীয়ান ইউনিয়ন, ইংলেণ্ডকে ধৰি বিশ্বৰ চহকী দেশ আৰু সংস্থাসমূহে। সাধাৰণতে আন্তঃৰাষ্ট্ৰীয় আইন উলংঘা কৰা দেশসমূহে এনেধৰণে নিষেধাজ্ঞাৰ সন্মুখিন হৈ আহিছে। এতিয়ালৈ ৰাছিয়াৰ বিৰুদ্ধে কি কি নিষেধাজ্ঞা জাৰি কৰা হৈছে বাৰু?
ৰাছিয়াৰ অন্যতম অৰ্থনৈতিক সম্পদ হৈছে তেল আৰু গেছ। এই দুবিধ সম্পদেৰে ৰাছিয়াই বিশ্বৰ কেইবাখনো দেশৰ স’তে মিত্ৰতা কৰি আহিছে। আমেৰিকা যুক্তৰাষ্ট্ৰ, ইংলেণ্ডকে ধৰি পশ্চিমীয়া দেশসমূহেও ৰাছিয়াৰ তেল আৰু গেছৰ ওপৰত নিৰ্ভৰশীল। কিন্তু ইউক্ৰেইন যুদ্ধৰ ফলশ্ৰুতিত আমেৰিকা যুক্তৰাষ্ট্ৰই ইয়াক নিষেধ কৰিছে। আমেৰিকা যুক্তৰাষ্ট্ৰৰ উপৰিও ইংলেণ্ডেও এই ব্যৱস্থা ল’বলৈ উলাইছে। আনহাতে, ইউৰোপিয়ান ইউনিয়নে জনাইছে যে ২০৩০ চনৰ ভিতৰত ৰাছিয়াৰ তেল আৰু গেছ ক্ৰয় কৰা বাদ দিব। উল্লেখযোগ্য যে জাৰ্মানী, ফ্ৰান্স আদিকে ধৰি কেইবাখনো আগশাৰীৰ দেশেৰে গঠিত ইউৰোপিয়ান ইউনিয়নে ৰাছিয়াৰ তেল আৰু গেছৰ ওপৰত তীব্ৰভাৱে নিৰ্ভৰশীল।
তেল আৰু গেছৰ উপৰিও ৰাছিয়াৰ বেংকিং খণ্ডকো লক্ষ্য কৰি লৈছে পশ্চিমীয়া দেশসমূহে। ৰাছিয়াৰ কেন্দ্ৰীয় বেংকে এই দেশসমূহৰ স’তে কোনোধৰণৰ লেন-দেন কৰিব নোৱাৰিব। ইয়াৰ ভিতৰত ইংলেণ্ডে তীব্ৰ ব্যৱস্থা হাতত লৈছে। আন্তৰাষ্ট্ৰীয় বাণিজ্যৰ বাবে সেয়ে ৰাছিয়াই এই নিষেধাজ্ঞাৰ ফলত তীব্ৰ সমস্যাৰ সমুখীন হ’ব।
এইসমূহ হৈছে ৰাছিয়াৰ পৰা আমদানিকৃত দ্ৰব্যৰ ওপৰত কৰা নিষেধাজ্ঞা। কিন্তু পশ্চিমীয়া দেশসমূহে ৰাছিয়া ৰাপ্তানী কৰা দ্ৰব্যসমূহো নিষেধ কৰা হৈছে। ইয়াৰ ভিতৰত অন্যতম হৈছে ৰাছিয়ান এয়াৰলাইনক বিক্ৰী কৰা বিমান, যন্ত্ৰপাতি আৰু বিভিন্ন ৰাসায়নিক দ্ৰব্য। ইতিমধ্যে আমেৰিকান বহুজাতিক কোম্পানী মেকডণাল্ড্ছ, কোকা কোলা আৰু ষ্টাৰবাকছে ৰাছিয়াত ব্যৱসায় বাদ দিছে।
অৰ্থনৈতিক নিষেধাজ্ঞাৰ ফলত আমেৰিকা যুক্তৰাষ্ট্ৰ, ইংলেণ্ড, ইউৰোপিয়ান ইউনিয়ন আৰু কানাডাৰ আকাশত ৰাছিয়াৰ বিমান উৰিব নোৱাৰি। আনকি ইংলেণ্ডত ৰাছিয়াৰ লোকসকলৰ ব্যক্তিগত বিমানো নিষেধ কৰা হৈছে।
.কেৱল সেয়াই নহয়, ৰাছিয়াৰ পুঁজিপতি ব্যৱসায়ীসকলো এই নিষেধাজ্ঞাৰ সমুখিন হ’ব। পুটিনৰ অতি ঘনিষ্ঠ এই ব্যৱসায়ীকলৰ ভিতৰত অন্যতম হৈছে ৰোমান আব্ৰাম’ভিছ। এওঁ হৈছে বিশ্ববিখ্যাত ফুটবল ক্লাব তথা ইংলিছ প্ৰিমিয়াৰ লীগৰ অন্যতম আগশাৰীৰ ক্লাব চেলছিৰ স্বত্বাধিকাৰ। অৰ্থনৈতিক নিষেধাজ্ঞাৰ ফলশ্ৰুতিতে আব্ৰাম’ভিছৰ এই ক্লাবটো এতিয়া তীব্ৰ সমস্যাৰ সমুখীন হৈছে। শেষত ক্লাবটো বিক্ৰী কৰি দিয়া হ’ব বুলি ধাৰণা কৰা হৈছে।
ৰাছিয়াৰ সাংসদসকলৰ ওপৰতো পশ্চিমীয়া দেশসমূহে অৰ্থনৈতিক নিষেধাজ্ঞা জাৰি কৰিছে। উল্লেখযোগ্য যে ৰাছিয়াৰ সংসদত ৩৮৬ জন সদস্য আছে। এই সাংসদসকলে পশ্চিমীয়া দেশসমূহত বিভিন্ন সম্পত্তি ক্ৰয় আৰু ব্যৱসায় কৰি আহিছে। ইতিমধ্যে আমেৰিকা যুক্তৰাষ্ট্ৰ, ইউৰোপ, ইংলেণ্ড আৰু অষ্ট্ৰেলিয়াত থকা ভ্লাদিমিৰ পুটিনৰ সম্পত্তিসমূহ জব্দ কৰি ৰখা হৈছে।
অৱশ্যে পুটিন আৰু তেওঁৰ ঘনিষ্ঠ পুঁজিপতিসকলৰ ওপৰত এই নিষেধাজ্ঞাই বিশেষভাৱে প্ৰভাৱ পেলাব নোৱাৰে। কিন্তু ৰাছিয়াৰ সৰ্বসাধাৰণ নাগৰিকসকলৰ জীৱন-জীৱিকাৰ ওপৰত এই নিষেধাজ্ঞাসমূহে মাধমাৰ শোধাইছে। প্ৰশ্ন উত্থাপন হৈছে যে যুদ্ধৰ নামত ভ্লাদিমিৰ পুটিনে ৰাছিয়াৰ অৰ্থনীতি আৰু জনসাধাৰণক অন্ধকাৰৰ গৰ্ভলৈ ঠেলি পঠাইছে নেকি?
