বৃহস্পতিবাৰে মুম্বাইৰ ৱানখেড়ে ষ্টেডিয়ামত শ্ৰীলংকাৰ বিৰুদ্ধে ভাৰতৰ বিশ্বকাপৰ খেল অনুষ্ঠিত হৈছে। খেলখনৰ দুদিন পূৰ্বে ৰোহিত শৰ্মাৰ দলটোৱে বলীউড চহৰখনত প্ৰৱেশ কৰিছিল। স্বাভাৱিকতে দলটোৰ সৈতে শুভমন গীলো মুম্বাইলৈ গৈছিল। অৱশ্যে মঙলবাৰে নিশা কিছু সময়ৰ বাবে তেওঁ তেণ্ডুলকাৰৰ কন্যা ছাৰা টেণ্ডুলকাৰৰ লগত আছিল।
শচীনৰ কন্যা ছাৰা টেণ্ডুলকাৰৰ সৈতে শুভমন গীলৰ প্ৰেমৰ সম্পৰ্কক লৈ জল্পনা-কল্পনাৰ অন্ত নাই। আম্বানীৰ জিঅ’ ৱৰ্ল্ড প্লাজা মুকলি অনুষ্ঠানত এই জল্পনা-কল্পনাই নতুনকৈ ইন্ধন যোগালে। তাত এটা ফ্ৰেমত ধৰা পৰিল ছাৰা-শুভমন।
মঙলবাৰে আম্বানীৰ এই অনুষ্ঠান আছিল। তাতে মুম্বাইৰ সকলো গ্লেমাৰ তাৰকাৰ পয়োভৰ ঘটিছিল। তাৰকাসকলে বিভিন্ন সাজ-পোছাক পৰিধান কৰি কেমেৰাৰ সন্মুখত পোজ দিছিল। তালৈ শুভমন গীল আৰু ছাৰা টেণ্ডুলকাৰকো নিমন্ত্ৰণ কৰা হৈছিল।
ছাৰাই ৰঙা ৰঙৰ পোছাক পিন্ধিছিল। শুভমনে পিন্ধিছিল ক’লা সাজ। দুয়োজনেই একেলগে অনুষ্ঠানটোৰ পৰা ওলাই আহিছিল। হঠাৎ শুভমনে পাপাৰাজ্জিৰ কেমেৰালৈ লক্ষ্য কৰিলে। ক্ৰিকেটাৰজনে লগে লগে ঘূৰি গ’ল। নিজকে লুকুৱাব বিচাৰিলে।
View this post on Instagram
এই কথা ছাৰাই প্ৰথমে বুজি পোৱা নাছিল। তাৰ পিছত শুভমনৰ পৰা খবৰটো পালে যে কেমেৰাত ধৰা পৰি যাব পাৰে। তেওঁৱো ৰৈ গ’ল। হয়তো অলপ বিৰক্তও হয়। কিন্তু শুভমন-ছাৰাই যিমানেই লুকুৱাবলৈ চেষ্টা নকৰক কিয়, ভিডিঅ’টো ছ’চিয়েল মিডিয়াত ভাইৰেল হৈ পৰে।
উল্লেখ্য যে শুভমন-ছাৰাৰ প্ৰেমৰ গুঞ্জন বহু দিন ধৰি শুনা গৈছে। ইফালে, যুৱ ক্ৰিকেটাৰগৰাকীৰ নাম ছৈফ আলী খানৰ কন্যা ছাৰা আলী খানৰ সৈতেও জড়িত হৈছিল। কিন্তু সেই জল্পনা-কল্পনা সময়ৰ লগে লগে ম্লান হৈ পৰিছে। বৰঞ্চ শচীনৰ কন্যাৰ লগত শুভমনৰ ঘনিষ্ঠতাৰ জল্পনা তীব্ৰতৰ হৈ পৰিছে।
