মৈত্ৰী আঁচনিৰ অধীনত মুখ্য মন্ত্ৰীয়ে উদ্বোধন কৰিলে মাৰ্ঘেৰিটাৰ নৱ নিৰ্মিত আৰক্ষী ভৱন
মৈত্ৰী আঁচনিৰ অধীনত শতবৰ্ষ গৰকা নৱনিৰ্মিত মাৰ্ঘেৰিটা আৰক্ষী থানাৰ ভৱন আজি শুভ উদ্বোধন কৰে মুখ্য মন্ত্ৰী সৰ্বানন্দ সোণোৱালে।
ভাষণ প্ৰসংগত মুখ্য মন্ত্ৰী সৰ্বানন্দ সোণোৱালে কয় যে চৰকাৰ গঠন হোৱাৰ পাছতেই বিগত বাজেটত দায়িত্বশীল ভাৱমূৰ্তিৰ বাবে থানাসমূহৰ সৰ্বাংগীণ উন্নয়ন অভিযান চমুকৈ “মৈত্ৰী“ শীৰ্ষক অভিলাষী আঁচনিখন ৰূপায়ণ কৰাৰ কথা ঘোষণা কৰা হৈছিল।
সন্ত্ৰাসবাদ প্ৰতিহত কৰা, চাইবাৰ ক্ৰাইমকে ধৰি সাম্প্ৰতিক সময়ত যিবোৰ অপৰাধে ৰাজ্যত গা কৰি উঠিছে তাৰ সৈতে মুখামুখি হ’ব পৰাকৈয়ে মৈত্ৰী আঁচনিখন প্ৰস্তুত কৰা হোৱা বুলি সোণোৱালে উল্লেখ কৰে।
এই আঁচনিৰ প্ৰথম পৰ্যায়ৰ থানা সমূহৰ অন্যতম মাৰ্ঘেৰিটা আৰক্ষী থানাখনৰ ভৱন শুভ উদ্বোধন কৰা হয়।
বিশিষ্ট অতিথি হিচাপে উপস্থিত থাকি আৰক্ষী সঞ্চালক প্ৰধান ভাস্কৰ জ্যোতি মহন্তই ভাষণ প্ৰসংগত কয় যে চৰকাৰে আৰক্ষী বিভাগটোৰ উন্নীতকৰণৰ ক্ষেত্ৰত এনেধৰণৰ বৃহৎ আঁচনি হাতত লৈছে।
ৰাজ্য চৰকাৰৰ দায়িত্বশীল মনোভাৱৰ বাবেই ৰাজ্যৰ ৩৫৫খন থানাক ‘মৈত্ৰী’ আঁচনিৰ অধীনত উন্নীত কৰাৰ লক্ষ্য স্থিৰ কৰি লোৱা হৈছে। প্ৰথম পৰ্যায়ত ইয়াৰে ৭৩খন থানাক অত্যাধুনিকভাৱে সজাই-পৰাই তোলাৰ বাবে ৰাজ্য চৰকাৰৰ বিত্ত বিভাগে ইতিমধ্যে ধন মুকলি কৰি দিয়া বুলিও তেওঁ উল্লেখ কৰে।
থানাসমূহক ‘গ্ৰীণ ফিল্ড আৰু ব্ৰাউন ফিল্ড’ ভাগত ভাগ কৰা হৈছে। গ্ৰীণ ফিল্ড আঁচনিত থানাসমূহ নতুনকৈ নিৰ্মাণ কৰা হ’ব আৰু ব্ৰাউন ফিল্ড আঁচনিত থানাসমূহ মেৰামতি কৰা হ’ব।
নতুনকৈ নিৰ্মাণ কৰা থানাসমূহত সভাকক্ষ, বিশেষভাৱে সক্ষম লোকৰ বাবে আৰু মহিলা-যুৱতীৰ বাবে বিশেষ কোঠা, ড্ৰাগছ আসক্ত আৰু শিশু অপৰাধীৰ বাবে বিশেষ কোঠাৰ উপৰি বিভিন্ন সা-সুবিধা উপলব্ধ হ’ব।
তদুপৰি আৰক্ষী বিষয়া-কৰ্মচাৰীৰ মানসিকতা সলনিৰ বাবে বিশেষ প্ৰশিক্ষণৰ ব্যৱস্থা কৰা হ’ব বুলিও জানিবলৈ দিয়ে।
আজিৰ কাৰ্যসূচীত কেন্দ্ৰীয় ৰাজ্যিক মন্ত্ৰী ৰামেশ্বৰ তেলী, ডিগবৈ সমষ্টিৰ বিধায়ক সুৰেণ ফুকন, মাৰ্ঘেৰিটাৰ বিধায়ক ভাস্কৰ শৰ্মা, অসম এথলেটিকছ সন্থাৰ সভাপতি তথা ছাত্ৰ ক্ৰীড়া যুৱ কল্যাণৰ উপদেষ্টা পৰিষদৰ সচিব লক্ষ্য কোঁৱৰ সহ কেইবাগৰাকীও বিশিষ্ট ব্যক্তি উপস্থিত থাকে।