বাক্সা জিলাৰ বগামাটিৰ অম্বৰিচ নগৰত আজি বনভোজৰ বাবে যোৱা এখন স্কুল বাছত অগ্নিকাণ্ড সংঘটিত হোৱাত বাছখনত থকা ৮ গৰাকী ছাত্ৰ-ছাত্ৰী অগ্নিদগ্ধ হয়।
প্ৰাপ্ত তথ্য মতে শিক্ষক-শিক্ষয়ত্ৰীৰ সৈতে ওদালগুৰি জিলাৰ ৰৌতাস্থিত ছেৰেগা ফাউণ্ডেশ্যন জুনিয়ৰ কলেজৰ পৰা প্ৰায় ৪০ গৰাকী ছাত্ৰ-ছাত্ৰীয়ে এ এছ ২৫ বি চি ০৮৭২ নম্বৰৰ এখন বাছেৰে বাক্সা জিলাৰ ভাৰত-ভূটান সীমান্তৰ জনপ্ৰিয় ভনভোজস্থলী বগামাটিত বনভোজ খাবৰ কাৰণে গৈ থকা অৱস্থাতে উক্ত দুৰ্ঘটনাটো সংঘটিত হয়।
স্থানীয় একাংশ প্ৰত্যক্ষদৰ্শীয়ে সন্দেহ কৰা অনুসৰি বাছখনত ঘটা এক যান্ত্ৰিক বিজুতিৰ ফলতে আজি পুৱা ৯:৩০ বজাত সংঘটিত হয় উক্ত অগ্নিকাণ্ডটো। অৱশ্যে বাছখনৰ চালকজনে কেবিনৰ কেইডালমান তাঁৰৰ পৰা ধোঁৱা ওলাই থকা দেখা পোৱাৰ পিছতে ছাত্ৰ-ছাত্ৰী আৰু শিক্ষক-শিক্ষয়িত্ৰীসকলে ততাতৈয়াকৈ বাছখনৰ পৰা বাহিৰলৈ ওলাই কথমপি প্ৰাণ ৰক্ষা কৰিবলৈ সক্ষম হয়।
পিছত অগ্নিকাণ্ডত আহত ছাত্ৰ-ছাত্ৰী আৰু শিক্ষক-শিক্ষয়িত্ৰীসকলক সমীপৰ চিকিৎসালয়ত ভৰ্তি কৰোৱা হয়।
