চলিত বৰ্ষৰ পৰাই গ্ৰামীণ বেংকৰ নিযুক্তিৰ বাবে হিন্দী, ইংৰাজীৰ লগতে অসমীয়াকে ধৰি তেৰটা আঞ্চলিক ভাষাত বাছনি পৰীক্ষা অনুষ্ঠিত হ’ব। লোকসভাত বৃহস্পতিবাৰে কেন্দ্ৰীয় বিত্ত মন্ত্ৰী নিৰ্মলা সীতাৰমণে এই কথা ঘোষণা কৰে।
গ্ৰামীণ বেংকত নিযুক্তি প্ৰসংগত মন্ত্ৰী গৰাকীয়ে কয় যে দেশত বৰ্তমান দেশৰ ৪৫ টা আঞ্চলিক গ্ৰামীণ বেংকত মুঠতে ৯০ হাজাৰ কৰ্মচাৰী আছে। কিন্তু এই বেংকসমূহৰ নিযুক্তিৰ বাবে বাছনি পৰীক্ষা হিন্দী আৰু ইংৰাজীত অনুষ্ঠিত হোৱাৰ বাবে স্থানীয় ভাষাত শিক্ষা লাভ কৰা যুৱক-যুৱতীসকল অসুবিধাৰ সন্মুখীন হৈ আছে।
উক্ত বেংকসমূহৰ প্ৰধান লক্ষ্য যিহেতু ৰাজ্য তথা গ্ৰাম্য এলেকা, সেয়েহে সংশ্লিষ্ট অঞ্চলৰ ভাষা জনা ব্যক্তিয়ে এনে বেংকত নিজৰ দায়িত্ব সুচাৰুৰূপে পালন কৰাত সহায়ক হ’ব।
এই কথাৰ ওপৰত গুৰুত্ব আৰোপ কৰি এতিয়াৰে পৰা আঞ্চলিক গ্ৰামীণ বেংকৰ নিযুক্তিৰ বাবে বাছনি পৰীক্ষা হিন্দী আৰু ইংৰাজীৰ লগতে তেৰটা আঞ্চলিক ভাষাতো অনুষ্ঠিক কৰাৰ সিদ্ধান্ত লোৱা হৈছে।
বিত্ত মন্ত্ৰীয়ে লোকসভাত জানিবলৈ দিয়া অনুসৰি গুজৰাটী, বাংলা, কানাড়া, মালয়ালম, মণিপুৰী, মাৰাঠীকে ধৰি অসমীয়াতো এই পৰীক্ষা অনুষ্ঠিত হ’ব।
