ইখনৰ পিছত সিখন গাড়ীত খুন্দিয়াই দুৰ্ঘটনাগ্ৰস্ত বাছ; ৭ জনৰ মৃত্যু, কমেও ৪০ জন আহত

মুম্বাইত এক ভয়ংকৰ দুৰ্ঘটনা সংঘটিত হৈছে। নিয়ন্ত্ৰণ হেৰুৱাই বাছখনে ইখনৰ পিছত সিখন গাড়ীত খুন্দা মৰাৰ ফলত পথত খোজ কঢ়া মানুহক মহতিয়াই নিয়ে। জানিব পৰা মতে এই মৰ্মান্তিক ঘটনাত ৭ জন লোকৰ মৃত্যু হৈছে। ইয়াৰ উপৰিও আন ৪০ জন লোক আহত হয়। প্ৰথম অৱস্থাত বাছখনৰ ব্ৰেক বিকল হোৱাৰ বাবেই এই ঘটনা সংঘটিত হোৱা বুলি জানিব পৰা গৈছে।

আৰক্ষীৰ সূত্ৰ অনুসৰি, সোমবাৰে নিশা প্ৰায় ৯.৫০ বজাত মুম্বাইৰ কুৰলা পশ্চিম অঞ্চলত সংঘটিত হয় এই দুৰ্ঘটনা। এই ঘটনাৰ চিচিটিভি ফুটেজ পোহৰলৈ আহিছে য’ত দেখা গৈছে যে দ্ৰুতবেগী বাছখনে প্ৰথমে এখন অটো ৰিক্সাত খুন্দা মাৰে। ইয়াৰ পিছত ২০০ মিটাৰ দূৰত্বৰ ভিতৰত গাড়ী আৰু মটৰ চাইকেলক ইখনৰ পিছত সিখনত খুন্দা মাৰি গৈ থাকে।

লগতে পঢ়কঃ বেংগালুৰুক আই টি কেপিটেল গঢ়াৰ ৰূপকাৰ কৰ্ণাটকৰ প্ৰাক্তন মুখ্যমন্ত্ৰী এছ এম কৃষ্ণৰ দেহাৱসান

এই ঘটনাৰ ফলত ৰাস্তাৰ কাষেৰে খোজ কাঢ়ি যোৱা সাধাৰণ মানুহক মহতিয়াই পেলায়। এই ভয়ংকৰ ঘটনাটো দেখি চৌপাশৰ মানুহবোৰ লৰালৰিকৈ দৌৰি ওলাই আহে। আহতসকলক উদ্ধাৰ কৰি ততাতৈয়াকৈ চিকিৎসালয়লৈ প্ৰেৰণ কৰা হয়। সমগ্ৰ ঘটনাৰ তদন্ত আৰম্ভ কৰিছে আৰক্ষীয়ে।

ইতিমধ্যে জব্দ কৰা হৈছে দুৰ্ঘটনা সংঘটিত কৰা বাছখন। তদন্তকাৰীয়ে প্ৰথমে অনুমান কৰে যে বাছখনৰ ব্ৰেকত কেনেবাকৈ সমস্যাৰ সৃষ্টি হৈছে। যাৰ বাবে বাছখনে নিয়ন্ত্ৰণ হেৰুৱাই পেলায়। এনে পৰিস্থিতিত চালকজনে ব্ৰেক মাৰি থাকোঁতে ভুলতে এক্সিলেটৰত হেঁচা মাৰিলে। সেইবাবেই পৰিস্থিতি ইমান ভয়াৱহ হৈ পৰে। এই দুৰ্ঘটনাত এতিয়ালৈকে ৭ জন লোকৰ মৃত্যু হৈছে আৰু আন ৪০ জন লোক আহত হয়।

লগতে পঢ়কঃ শক্তিকান্তৰ বিদায়, ৰিজাৰ্ভ বেংকৰ নতুন গৱৰ্ণৰ হ’ল সঞ্জয় মালহোত্ৰা

আনহাতে, দুৰ্ঘটনাটোৰ আঁৰৰ আন এক তথ্য পোহৰলৈ আহিছে। বাছখনৰ চালকজনে মদ্যপান কৰা বুলি দাবী কৰা হৈছে। যাৰ বাবে এই ভয়ংকৰ দুৰ্ঘটনা সংঘটিত হয়। দুৰ্ঘটনা সংঘটিত হোৱাৰ পিছৰে পৰা চালকজনৰ সন্ধান পোৱা হোৱা নাই। আৰক্ষীয়ে তেওঁৰ সন্ধানত অভিযান আৰম্ভ কৰিছে।