কৰ্ণাটকৰ প্ৰাক্তন মুখ্যমন্ত্ৰী ছোমনাহল্লী মল্লাইয়া কৃষ্ণৰ দেহাৱসান ঘটিছে। মঙলবাৰে পুৱা বাংগালুৰুৰ এখন ব্যক্তিগত চিকিৎসালয়ত তেওঁ শেষ নিশ্বাস ত্যাগ কৰে। বয়স আছিল ৯২ বছৰ। তেওঁ এছ এম কৃষ্ণ নামেৰে অধিক পৰিচিত আছিল।
ভাৰত চৰকাৰে যোৱা বছৰ দ্বিতীয় সৰ্বোচ্চ অসামৰিক সন্মান ‘পদ্মা বিভূষণ’ৰে তেওঁক সন্মানিত কৰিছিল। প্ৰাক্তন কংগ্ৰেছী কৃষ্ণই জীৱনৰ শেষৰ ফালে বিজেপিত যোগদান কৰে। কেইবাখনো বিদেশী শিক্ষানুষ্ঠানত অধ্যয়ন কৰা কৃষ্ণ সদায় এগৰাকী মেধাৱী ছাত্ৰ আছিল। ভাৰতৰ উচ্চ শিক্ষিত ৰাজনীতিবিদসকলৰ ভিতৰত তেওঁ আছিল অন্যতম।
১৯৯৯ চনৰ পৰা ২০০৪ চনলৈ কৰ্ণাটকৰ মুখ্যমন্ত্ৰীৰ পদ আছিল কৃষ্ণৰ ৬০ বছৰীয়া ৰাজনৈতিক জীৱনৰ সোণালী অধ্যায়। সেই সময়ত তেওঁ বাংগালোৰক দেশৰ তথ্য প্ৰযুক্তি উদ্যোগৰ ৰাজধানী কৰি তুলিছিল। ৰাজ্যৰ ৰাজধানীখনৰ ৰূপেই সলনি কৰি দিয়ে। তেওঁৰ সময়ত বাংগালুৰুৰ আন্তঃগাঁথনিৰ ব্যাপক উন্নতি ঘটিছিল।
লগতে পঢ়কঃ শক্তিকান্তৰ বিদায়, ৰিজাৰ্ভ বেংকৰ নতুন গৱৰ্ণৰ হ’ল সঞ্জয় মালহোত্ৰা
বাংগালুৰুক ভাৰতৰ ছিলিকন ভেলী হিচাপে গঢ়ি তোলাৰ কৃতিত্ব লাভ কৰিলেও ২০০৪ চনৰ বিধানসভা নিৰ্বাচনত তেওঁ দলটোক ক্ষমতালৈ ঘূৰাই অনাত ব্যৰ্থ হয়। অভিযোগ উত্থাপন হৈছিল যে কৃষ্ণ চহৰৰ উন্নয়নত ব্যস্ত আছিল। গাঁৱৰ কথা নাভাবিলে। অৱশ্যে কৃষ্ণৰ যুক্তি আছিল যে তেওঁ আই টি খণ্ডৰ পৰা পোৱা ৰাজহৰ দ্বাৰা সমগ্ৰ ৰাজ্যখনক উন্নত কৰি তুলিছে।
২০০৪ চনত দলৰ হাইকমাণ্ডে তেওঁক কংগ্ৰেছৰ বিৰোধী নেতাৰ পদৰ পৰা অপসাৰণ কৰি মহাৰাষ্ট্ৰৰ ৰাজ্যপাল হিচাপে নিযুক্তি দিয়ে। ৰাজ্যিক কংগ্ৰেছত তেওঁক লৈ হোৱা বিতৰ্কৰ বাবেই ছোনিয়া গান্ধীয়ে সেই সিদ্ধান্ত গ্ৰহণ কৰিছিল। পিছত কৃষ্ণই কেইবাটাও সাক্ষাৎকাৰত কৈছিল যে ৰাজ্যৰ ৰাজনীতি এৰি ৰাজ্যপাল হোৱাটো তেওঁৰ বাবে উচিত হোৱা নাই। কংগ্ৰেছ পুনৰ ক্ষমতালৈ আহিলে তেওঁ মুখ্যমন্ত্ৰী হ’লহেঁতেন।
২০০৪ চনৰ বিধানসভা নিৰ্বাচনত পৰাজয়ৰ বহুখিনি দায়িত্ব তেওঁ নিজৰ কান্ধত লৈছিল। স্বীকাৰ কৰিছিল যে ছমাহ নিৰ্বাচন আগবঢ়াই অনাৰ সিদ্ধান্ত শুদ্ধ নাছিল। তেওঁ কৈছিল, “ৰাজ্যৰ জনসাধাৰণে ভাবিছিল যে মই হাৰিবলৈ ভয় কৰি নিৰ্বাচন আগুৱাই আনিছিলো।”
লগতে পঢ়কঃ ফেটি লিভাৰত শংকিত? মদ্যপান এৰিলেই যথেষ্ট নহয়, জীৱনত আৰু ৭টা পৰিৱৰ্তন আনিব লাগিব
ৰাজনৈতিক মহলৰ মতে তথ্য প্ৰযুক্তি উদ্যোগৰ ওপৰত ভিত্তি কৰি নিজৰ ভাৱমূৰ্তিক লৈ কৃষ্ণৰ এক অন্ধ আস্থাৰ সৃষ্টি হৈছিল। সেয়ে একক সিদ্ধান্তেৰে নিৰ্বাচন আগবঢ়াই অনাৰ সিদ্ধান্তৰ বাবেই নিৰ্বাচনত বেয়াকৈ পৰাজিত হব লগা হৈছিল। ২০১২ চনত দলৰ সৈতে সংঘাতৰ বাবে ইউ পি এ চৰকাৰৰ বিদেশ মন্ত্ৰীৰ পদৰ পৰা তেওঁক অপসাৰণ কৰা হৈছিল।
কিন্তু কৃষ্ণৰ মুখ্যমন্ত্ৰিত্বৰ সময়ছোৱাত আটাইতকৈ বিপৰ্যয়জনক পৰ্যায়টো আছিল জনপ্ৰিয় অভিনেতা ৰাজকুমাৰক চন্দন দস্যু বীৰপ্পানে কৰা অপহৰণৰ ঘটনা। সেই ঘটনাত সমগ্ৰ কৰ্ণাটক ক্ষোভত জ্বলি উঠিছিল। আইন-শৃংখলা পৰিস্থিতি সন্দৰ্ভত কৃষ্ণ তীব্ৰ সমালোচনাৰ সন্মুখীন হ’বলগীয়া হৈছিল।
