চলিত বৰ্ষত ইণ্ডোনেছিয়াৰ বনাঞ্চল আৰু পিটভূমি এলেকাত সংঘটিত ভয়াৱহ বনজুইৰ ফলত দক্ষিণ-পূব এছিয়াৰ দেশখনৰ আৰ্থিক ক্ষতিৰ পৰিমাণ ৩০ বিলিয়ন ডলাৰ অতিক্ৰম কৰিব পাৰে। এই সন্দৰ্ভত চলোৱা এক অধ্যয়নৰ সহ-লেখকে ২০ নৱেম্বৰ শুকুৰবাৰে জাকাৰ্টাত এই আশংকা ব্যক্ত কৰিছে। জাকাৰ্টাস্থিত গৱেষণা সংস্থা চেণ্টাৰ অৱ ইক’নমিক এণ্ড ল’ ষ্টাডিজ চমুকৈ চেলিঅ’ছৰ নতুন প্ৰতিবেদনত এই ভয়াৱহ আৰ্থিক আৰু স্বাস্থ্যজনিত ক্ষতিৰ বিশদ তথ্য পোহৰলৈ আহিছে।
চেলিঅ’ছৰ গৱেষণা অনুসৰি, কেৱল ভৌতিক সম্পত্তিৰ ধ্বংস আৰু অৰ্থনৈতিক কাৰ্যকলাপ ব্যাহত হোৱাৰ বাবেই আনুমানিক ৩৪০ ট্ৰিলিয়ন ৰুপিয়া অৰ্থাৎ ১৮.৬ বিলিয়ন ডলাৰৰ ক্ষতি হ’ব পাৰে, যি ইণ্ডোনেছিয়াৰ মুঠ ঘৰুৱা উৎপাদন বা জিডিপিৰ প্ৰায় ২.৬৯ শতাংশৰ সমান। ইয়াৰ উপৰি ইণ্ডোনেছিয়াৰ বৰ্নিঅ’, সুমাত্ৰা আৰু পাপুৱা দ্বীপত বনজুইৰ ফলত সৃষ্টি হোৱা তীব্ৰ শ্বাসজনিত সংক্ৰমণৰ বাবে অতিৰিক্ত স্বাস্থ্য ব্যয় ২২৫ ট্ৰিলিয়ন ৰুপিয়া অৰ্থাৎ ১২.৩ বিলিয়ন ডলাৰ পৰ্যন্ত হ’ব পাৰে বুলি প্ৰতিবেদনখনত উল্লেখ কৰা হৈছে। এই সন্দৰ্ভত প্ৰতিবেদনখনৰ সহ-লেখক তথা চেলিঅ’ছৰ সঞ্চালক নাইলুল হুদাই সংবাদ সংস্থা এএফপিক জনায় যে এই ক্ষয়-ক্ষতিৰ উপৰি সাধাৰণ জনতাই প্ৰত্যক্ষ আৰু পৰোক্ষভাৱে আন বহু আৰ্থিক ব্যয় বহন কৰিবলগীয়া হৈছে।
বনাঞ্চল ধ্বংস নিৰীক্ষণকাৰী সংস্থা নুছান্তাৰা এটলাছৰ তথ্য অনুসৰি, ২০২৬ বৰ্ষত এতিয়ালৈকে বনজুইত ২.৮৮ নিযুত হেক্টৰ বা ৭.১ নিযুত একৰ ভূমি ভস্মীভূত হৈছে, যাৰ আয়তন লণ্ডন চহৰৰ তুলনাত ১৮ গুণ অধিক। ইণ্ডোনেছিয়াত প্ৰতিটো খৰালি বতৰত বনজুইৰ ঘটনা সংঘটিত হয় যদিও চলিত বৰ্ষত এই অগ্নিকাণ্ড বিশেষভাৱে ভয়াৱহ হৈ পৰিছে। যোৱা সপ্তাহত গৱেষকসকলে উল্লেখ কৰিছিল যে শক্তিশালী এল নিন’ বতৰৰ প্ৰভাৱ, জলবায়ু পৰিৱৰ্তন, ব্যাপক বনাঞ্চল ধ্বংস আৰু খনন তথা বাগিচা স্থাপনৰ বাবে পিটভূমিৰ পানী নিষ্কাশন কৰা কাৰ্যই চলিত বৰ্ষৰ বনজুইৰ প্ৰকোপ অতিমাত্ৰা বৃদ্ধি কৰিছে।
এই বিধ্বংসী বনজুইৰ ফলত সৃষ্টি হোৱা দুৰ্গন্ধময় ঘন ধোঁৱাই ইণ্ডোনেছিয়াৰ লাখ লাখ লোকক অসুস্থ কৰি তুলিছে। কেৱল দেশখনৰ ভিতৰতে সীমাবদ্ধ নাথাকি এই ধোঁৱা চুবুৰীয়া মালয়েছিয়া আৰু ছিংগাপুৰ পৰ্যন্ত বিয়পি পৰিছে। প্ৰাকৃতিক দুৰ্যোগ আৰু মানৱসৃষ্ট কাৰকৰ সংমিশ্ৰণত সৃষ্টি হোৱা এই পৰিস্থিতিয়ে দেশখনৰ অৰ্থনীতি আৰু জনস্বাস্থ্যৰ ওপৰত সুদূৰপ্ৰসাৰী প্ৰভাৱ পেলোৱাৰ আশংকা কৰা হৈছে।





