সমাগত লোকসভা নিৰ্বাচন। লোকসভা নিৰ্বাচনৰ দিন চমু চাপি অহাৰ লগে লগে তৎপৰ হৈ পৰিছে ৰাজ্যৰ ৰাজনৈতিক দলসমুহ। প্ৰতিটো দলেই নিজ নিজ নিৰ্বাচনী ৰণকৌশলেৰে এতিয়া ভোটাৰৰ মাজলৈ আগবাঢ়িছে। তেনে সময়তে আঞ্চলিক দল অগপই বৰ্তমানৰ বিধানসভাৰ পৰা প্ৰতিনিধিত্ব কৰা কেইবাগৰাকী বিধায়কক আগন্তুক লোকসভা নিৰ্বাচনত অৱতীৰ্ণ কৰোৱাৰ যো-জা চলাইছে ।
মন কৰিবলগীয়া যে, বৰ্তমান বিধায়ক হৈ থকা বহু নেতাৰ নাম অগপৰ সম্ভাৱ্য প্ৰাৰ্থীৰ তালিকাত অন্তৰ্ভুক্ত হৈছে। অগপই প্ৰকাশ কৰা ১৩ টা সমষ্টিৰ ৫ টা সমষ্টিতে বৰ্তমানৰ বিধায়কক থিয় কৰাব বিচাৰিছে অগপই।
ইয়াৰ ভিতৰত পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতা, বঢ়মপুৰ সমষ্টিৰ বিধায়ক তথা প্ৰাক্তন মুখ্য মন্ত্ৰী প্ৰফুল্ল কুমাৰ মহন্ত, কলিয়াবৰ বিধান সভা সমষ্টিৰ বিধায়ক কেশৱ মহন্ত, তেজপুৰৰ বিধায়ক বৃন্দাবন গোস্বামী আৰু আমগুৰিৰ বিধায়ক প্ৰদীপ হাজৰিকাৰ নাম অগপৰ লোকসভা নিৰ্বাচনৰ প্ৰাৰ্থীৰ তালিকাত অন্তৰ্ভুক্ত হৈছে।
অগপৰ এক উচ্চস্তৰীয় সুত্ৰৰ পৰা পোৱা খবৰ অনুসৰি বিধায়ক ৰমেন্দ্ৰ নাৰায়ণ কলিতাই গুৱাহাটী লোকসভা সমষ্টি, বিধায়ক কেশৱ মহন্তই কলিয়াবৰ, বৃন্দাৱন গোস্বামীয়ে তেজপুৰ, প্ৰদীপ হাজৰিকাই যোৰহাট, প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই বঢ়মপুৰ সমষ্টিৰ পৰা প্ৰতিদ্বন্দ্বিতা কৰাৰ সম্ভাৱনা প্ৰকট হৈ পৰিছে।
তদুপৰি, দলটোৰ নেতৃত্বৰ ক্ষেত্ৰত কোনো পৰিৱৰ্তন নেদেখাক লৈ ৰাজ্যৰ জনসাধাৰণ বিতুষ্ট হৈ পৰা বুলি ইতিমধ্যে একাংশই মত প্ৰকাশ কৰিছে। এই ক্ষেত্ৰত লোকসভা নিৰ্বাচনতো নতুন মুখ সম্ভাৱ্য তালিকাত অন্তৰ্ভুক্ত নোহোৱাটোৱে বিশেষ তাৎপৰ্য্য বহন কৰিছে।
ইপিনে, বিজেপিৰে মিত্ৰতাক কেন্দ্ৰ কৰি ৰাজ্যত সৃষ্টি হোৱা ধুঁৱলী কুৱঁলী অৱস্থাক প্ৰত্যাহ্বান জনাই অন্য ৰাজনৈতিক দলৰ তুলনাত আগতীয়াকৈ আঞ্চলিকতাবাদী দলটোৱে ৰাজ্যখনৰ ১৪ টা সমষ্টিৰ কোকৰাঝাৰক বাদ দি প্ৰত্যেকটো সমষ্টিৰ বাবে প্ৰকাশ কৰিলে সাম্ভাৱ্য প্ৰাৰ্থীৰ নাম।
সাম্ভাৱ্য প্ৰাৰ্থীসকলৰ ভিতৰত অগপৰ বহু জ্যেষ্ঠ নেতৃত্বৰ নামো ইতিমধ্যে চৰ্চালৈ আহিছে।
লখিমপুৰত সম্ভাৱ্য প্ৰাৰ্থীৰ ভিতৰত চৰ্চাত আহিছে ড০ পৰমানন্দ সোণোৱাল আৰু অগপৰ জ্যেষ্ঠ নেতা তুলাৰাম গগৈৰ নাম।
তেজপুৰ লোকসভা সমষ্টিত বৰ্তমানৰ তেজুপৰৰ বিধায়ক বৃন্দাবন গোস্বামীৰ লগতে অধিবক্তা প্ৰেম শৰ্মাৰ নামো চৰ্চালৈ আহিছে।
ইয়াৰোপৰি, ডিব্ৰুগড়ত অগপৰ সাম্ভাৱ্য প্ৰাৰ্থী ৰাফেল কুজুৰ। লগতে যোৰহাট লোকসভা সমষ্টিত আমগুৰিৰ বিধায়ক প্ৰদীপ হাজৰিকাৰ লগতে চৰ্চালৈ আহিছে হিৰণ্য কোঁৱৰ আৰু অসম জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক পলাশ চাংমাইৰ নাম।
তাৎপয্যপূৰ্ণভাৱে মঙলদৈ লোকসভা সমষ্টিত চৰ্চালৈ আহিছে পূৰ্বতে ৰাজ্যসভা আৰু লোকসভা দুয়োখন সদনতে প্ৰতিনিধিত্ব কৰা নেতা বীৰেন্দ্ৰ প্ৰসাদ বৈশ্যৰ নাম। বৈশ্যৰ নাম চৰ্চালৈ অহাত বহু অগপ কৰ্মীৰ লগতে মঙ্গলদৈৰ ভোটাৰ ৰাইজৰ মন উৎফুল্লিত হৈ পৰিছে বুলি জানিব পৰা গৈছে।
ইয়াৰোপৰি, বহু চৰ্চিত আৰু সকলোৰে দৃষ্টি নিবদ্ধ থকা গুৱাহাটী লোকসভা সমষ্টিত সাম্ভাৱ্য প্ৰাৰ্থী হিচাপে আছে ৰমেন্দ্ৰ নাৰায়ণ কলিতাৰ লগতে প্ৰাক্তন কংগ্ৰেছী সাংসদ কিৰিপ চলিহাৰ নাম।
আনহাতে, ধুবুৰী লোকসভা সমষ্টিত জাভেদ ইছলাম, কৰিমগঞ্জত গৌতম দাস, শিলচৰত মিছবাহ উল হক, নুৰুল হুছেইন, ডিফুত প্ৰকান্ত ৱাৰিছা, দেৱজিত থাওছেনৰ নাম চৰ্চাত আহিছে।
অৱশ্যে কলিয়াবৰ লোকসভা সমষ্টিৰ পৰা অগপৰ বিধায়ক কেশৱ মহন্তৰ লগতে তেওঁৰ ভাতৃ তথা সদৌ অসম ছাত্ৰ সন্থাৰ উপ-সভাপতি মণি মাধৱ মহন্তৰ নাম চৰ্চালৈ আহিছে।
তদুপৰি বহু চৰ্চিত বৰপেটা লোকসভা সমষ্টিত অগপৰ জ্যেষ্ঠ নেতা তথা প্ৰাক্তন সাংসদ কুমাৰ দীপক দাসৰ নাম চৰ্চাত আহিছে আৰু অগপৰ পৰা প্ৰতিদ্বন্দ্বিতা আগবঢ়োৱাৰ পূৰ্ণ সম্ভাৱনা আছে।
