শনিবাৰে পুৱতি নিশা ডিমা হাচাওৰ সদৰ চহৰ হাফলঙত সংঘটিত বিধ্বংসী অগ্নিকাণ্ডত ৮খন দোকান জ্বলি ভস্মীভূত হয়।
অগ্নিকাণ্ডৰ ঘটনাটো হাফলং নগৰৰ পৰা প্ৰায় ৪ কিলোমিটাৰ নিলগৰ নামনি হাফলঙৰ এখন বজাৰত নিশা প্ৰায় ১ বজাত সংঘটিত হৈছিল।
উক্ত অগ্নিকাণ্ডৰ ফলত কেইবা লাখ টকাৰ সা-সম্পত্তিৰ ক্ষতিসাধন হয় বুলি স্থানীয় লোকে জানিবলৈ দিছে।
জুইত জাহ যোৱা ৮খন দোকানৰ ভিতৰত আছে অশোক ঘোষ নাম এজন লোকৰ গুদামসহ এখন দোকান আৰু, সন্তোষ শাহ নামৰ লোকজনৰ এখন চৰকাৰী সুলভ মূল্যৰ দোকান।
ইয়াৰ উপৰি সম্ভু সেন, অসীম দে, উদয় ঠাকুৰ, বাপ্পা দে, আশীষ ঘোষ, সুবল বিশ্বাস, বাসক চক্ৰবৰ্ত্তী, আশ্ৰাক আলি, বিশ্বজিত কৰ নামৰ ব্যক্তিকেইজনৰ দোকান তথা দীপক দে’ নামৰ লোকজনৰ ফাৰ্মাচি আৰু শুভাশিষ পালৰ এখন অট’ ৰিক্সাও জুইত জাহ যায়।
অগ্নিকাণ্ডৰ খবৰ পাই স্থানীয় আৰক্ষী ঘটনাস্থলীত উপস্থিত হৈ তদন্ত আৰম্ভ কৰে যদিও ইয়াৰ কাৰণ নিশ্চিত কৰিব পৰা নাই। আনহাতে একাংশ দোকানীৰ মতে কোনো দুৰ্বৃত্তই এই কাণ্ড সংঘটিত কৰিছে।
